UTITOSI 3

₁Bakhumbuze bona bathobele ababusi neemphathimandla, babe ngabalalelako bebazimisele emisebenzini yoke emihle, ₂bangakhulumi kumbi nanyana kubani; bangabi zizilwi kodwana babe ngabathobekileko, bakhombise ukuba nommoya ophasi komunye nomunye. ₃Nathi ngokwethu khesaba ziindlhayela, saba mahlongandlebe, sadukiswa, saba makhoboka wemihlobohlobo yeenkanuko nokuzithokozisa. Saphila ebumbini nemoneni, sahloywa nathi sahloya abanye. ₄Kodwana lokha ukulunga nethando lakaZimu uMsindisethu nalibonakaliswako, ₅wasisindisa, ingasi ngebanga lemisebenzi yokulunga esiyenzileko, kodwana ngebanga lomusa wakhe, ngokuhlanjwa kokuzalwa butjha nokuvuselelwa ngoMoya oCwengileko, ₆othelwe phezu kwethu ngobunengi ngoJesu Krestu uMsindisi wethu ₇ukuze kuthi sesilungisisiwe ngomusa wakhe, sibe ziindlalifa ngokwethemba lokuphila okungapheliko.

₈Liqinisile ilizwi leli. Ngithanda bona ugandelele ezintweni lezi khona kuzakuthi labo abakholwa kuZimu bayelele ukuzinikela ekwenzeni imisebenzi emihle. Izinto lezo zihle begodu zilisizo kibo boke. ₉Kodwana gegeda iimpikiswano zobudlhayela, imilando yokubelethana kanye nokusolana ngomthetho ngombana lokho akusizi begodu kulilize. ₁₀Umuntu obanga ukuhlukana emva kobana sele elulekwe kanye namkha kabili umale ₁₁ngombana uyazi bona onjalo uphambukile, wonakele sele azigwebe yena.

₁₂Lokha nangithumela kuwe u-Arithema namkha uThikiku, yiza msinyana kimi eNikhopholi ngombana ngizimisele ukudlela ubusika lapho. ₁₃Linga ngamandlakho woke uthumele umjameli uZena no-Apholo utjheje bona bangatlhogi ilitho endleleni. ₁₄Abantu bethu kufanele bafunde ukuzinikela ekwenzeni imisebenzi emihle, khona bazakwazi ukusiza lapho kuhlongeka khona, bangabi ngabanganazo iinthelo.

₁₅Boke abanami lapha bayakulotjhisa. Lotjhisa abasithandako ekukholweni.