I MARENA 10

₁Mofumahadi wa Sheba a re a sa utlwa botumo ba Salomone bo hlahileng ka lebitso la Jehova, a tla ho mo leka ka dilotho. ₂A fihla Jerusalema ka letshwele le leholo, le ka dikamele tse bofileng dibano le kgauta e ngata haholo le mahakwe a bohlokwa; a fihla ho Salomone, a mmehela tsohle tseo a di hopotseng pelong ya hae. ₃Salomone a mo arabela dipotso tsohle tsa hae ho se ke ha eba taba le e nngwe e hlolang morena, eo a sa kang a mo hlalosetsa yona.

₄Eitse mofumahadi wa Sheba ha a bona bohlale bohle ba Salomone, le ntlo eo a e hahileng, ₅le dijo tsa tafole ya hae, le ditulo tsa bahlanka ba hae, le dikabelo tsa matona a hae, le diaparo tsa wona, le baqhatsetsi ba hae, le methathinyana eo a nyolohelang tlung ya Jehova ka yona, a shwa pelo, ₆a re ho morena: Seo ke neng ke se utlwile naheng ya ka sa taba tsa hao le bohlale ba hao, e ne e le nnete. ₇Empa ha ke a ka ka dumela, ho fihlela ke ba ke etla, ke bona ka mahlo a ka; bona, ha ke a ka ka bolellwa le halofo; bohlale ba hao le letlotlo la hao di fetisa botumo boo ke bo utlwileng. ₈Ba lehlohonolo, batho ba hao, ba lehlohonolo, bahlanka bana ba hao, ba hlolang ba eme pela hao, ba utlwang bohlale ba hao! ₉Ha ho bokwe Jehova, Modimo wa hao, ya kgahlilweng ke wena hore a o bee teroneng ya Iseraele! Erekaha Jehova a rata Iseraele kamehla, Jehova o o beile morena, hore o etse ka ho loka le ka tokelo.

₁₀A ntoo nea morena ditalenta tse lekgolo le mashome a mabedi tsa kgauta, le dibano tse ngatangata, le mahakwe a bohlokwa; ha ho a ka ha hlola ho tliswa le ka mohla o le mong dibano tse ngata tse ka ka tsee mofumahadi wa Sheba a di neileng morena Salomone.

₁₁Le dikepe tsa Hirame, tse neng di latile kgauta Ofire, tsa lata Ofire le difate tsa almuge tse ngatangata, le mahakwe a bohlokwa. ₁₂Morena a nka difate tsa almuge, a etsetsa ntlo ya Jehova le ntlo ya morena metero, le diharepa le diviole tsa dibini. Ho ne ho eso ho tle difate tsa almuge tse kalo, le ho bonwa, ho ne ho eso ho bonwe tse kalo, le kajeno.

₁₃Morena Salomone yena a nea mofumahadi wa Sheba tsohle tseo a di lakaditseng, le tseo a di kopileng, ho sa balwe tseo morena Salomone a mo fileng tsona, kamoo a ratileng ho mo fa kateng ka phano ya borena. Yaba o tloha, a kgutlela naheng ya hae le bahlanka ba hae.

₁₄Haele boima ba kgauta e neng e tlisetswa Salomone ka lemo se seng le se seng, e ne e le ditalenta tsa kgauta tse makgolo a tsheletseng a nang le mashome a tsheletseng a metso e tsheletseng, ₁₅ho sa balwe e tliswang ke bahwebi, le e bapatswang ke barekisi, le e tswang ho marena wohle a Arabia le ho babusisi ba naha ya hae.

₁₆Morena Salomone a etsa mekoko e makgolo a mabedi ya kgauta e teilweng; mokoko o mong le o mong wa etswa ka dishekele tse makgolo a tsheletseng tsa kgauta. ₁₇A etsa le dithebe tse makgolo a mararo tsa kgauta e teilweng; thebe e nngwe le e nngwe ya etswa ka kgauta e boima ba pondo tse tharo, mme morena a di bea tlung ya Moru wa Lebanone. ₁₈Morena a etsa terone e kgolo ya naka tsa ditlou, a e maneha ka kgauta e hlwekileng. ₁₉Terone eo e ne e na le methatinyana e tsheletseng, hlooho ya boitshetleho ba terone e ne e le tjhitja; matsoho a ne a le mabedi, a le ka nqa tse pedi ho setulo, le ditau tse pedi di ne di eme pela matsoho. ₂₀Hape, ditau tse leshome le metso e mmedi di ne di eme ka nqa tse pedi ho methatinyana e tsheletseng. Ha ho a ka ha etswa e jwalo mebusong yohle e meng. ₂₁Mehope yohle ya morena Salomone e ne e le ya kgauta, le dipitsa tsohle tsa ntlo ya Moru wa Lebanone e ne e le tsa kgauta e hlwekileng; ho ne ho se pitsa ya silefera: ho ne ho sa thwe letho ka yona mehleng ya Salomone. ₂₂Hobane morena o ne a na le sehlopha sa dikepe tsa Tarshishe lewatleng, hammoho le dikepe tsa Hirame; kepe tsa Tarshishe di ne di tlisa hang ka dilemo tse tharo kgauta, le silefera, le naka tsa ditlou, le ditshwene, le dipikoke.

₂₃Morena Salomone a feta marena wohle a lefatshe ka leruo le ka bohlale. ₂₄Ba lefatshe lohle ba ne ba etela Salomone ho tla utlwa bohlale ba hae, boo Modimo o bo kentseng pelong ya hae. ₂₅E mong le e mong o ne a tlisa mpho ya hae ya dipitsa tsa silefera, le dipitsa tsa kgauta, le diaparo, le dihlomo, le dinoko, le dipere, le diesele. E bile taba tsa lemo se seng le se seng. ₂₆Hape, Salomone a ipokellela makoloi le bakalli, e le makoloi a sekete se le seng se makgolo a mane, le bakalli ba kete tse leshome le metso e mmedi, ba abetsweng metseng ya makoloi le moreneng, Jerusalema. ₂₇Morena a etsa hore silefera e be jwaloka majwe Jerusalema, le dikedare di be ngata jwaloka disikomora tse dithoteng. ₂₈Haele dipere tseo Salomone a neng a di rua, di ne di tswa Egepeta; mehlape ya tsona e ne e latwa ke letshwele la bahwebi ba morena, mohlape o mong le o mong ka theko e beilweng. ₂₉Haele makoloi a latwang Egepeta, e nngwe le e nngwe e be e rekwa ka dishekele tse makgolo a tsheletseng tsa silefera; pere e ne e nka tse lekgolo le mashome a mahlano. Ba ne ba tlisetsa le marena wohle a Bahethe le marena a Siria.