I MARENA 3

₁Salomone a etsa setswalle le Faro, morena wa Egepeta; a nyala moradi wa Faro, a mo tlisa motseng wa Davida, ho fihlela a phetha ho haha ntlo ya hae, le ntlo ya Jehova, le lerako le teelang Jerusalema hare. ₂Batho ba ne ba ntse ba hlabela nqalong tse diphahameng, hobane mohlang oo, ntlo e be e eso ho hahelwe lebitso la Jehova. ₃Salomone a rata Jehova, a tsamaya ka melao ya ntatae Davida; feela, a nna a hlaba nqalong tse diphahameng, a tjhesa le dibano teng.

₄Morena a ya le Gibeone, ho hlabela teng, hobane e be e le yona nqalo e phahameng e kgolo; Salomone a hlaba ditjheso tse sekete aletareng ya teng. ₅Jehova a iponahatsa ho Salomone, Gibeone, ka toro ya bosiu, mme Modimo wa mmolella, wa re: Kopa seo ke tla o nea sona. ₆Salomone a re: O entse ntate Davida, mohlanka wa hao, ka lereko le leholo kamoo a nnileng a tsamaya pela hao kateng, ka nnete, le ka ho loka, le ka bokgabane ba pelo; o mmoloketse tshitso e kgolo ka ho mo nea mora, hore a dule teroneng ya hae, jwalokaha ho le jwalo kajeno. ₇Jwale, Jehova, Modimo wa ka, o beile mohlanka wa hao morena, tulong tsa ntate Davida; athe nna ke mohlankanyana feela, ha ke tsebe le ho itsamaisa. ₈Mme mohlanka wa hao o hara setjhaba sa hao seo o se kgethileng; ke setjhaba se seholohadi, se ke keng sa lekanngwa, se ke keng sa balwa ka baka la bongata ba batho ba sona.

₉O nee ke hona mohlanka wa hao pelo e kelello ya ho ahlolela setjhaba sa hao, ke tle ke tsebe ho kgetha botle le bobe. Hobane ke mang ya ka ahlolelang setjhaba sa hao se sekakale?

₁₀Polelo eo ya kgahlisa Morena, hobane Salomone a kopile taba eo. ₁₁Modimo wa re ho yena: Erekaha o kopile taba eo, o sa ka wa ikopela matsatsi a mangata, leha e le lefumo, leha e le ho shwa ha dira tsa hao, o mpa o ikopetse kelello ya ho tseba ho ahlola, ₁₂bona, ke se ke entse kamoo o boletseng kateng. Bona, ke o nea pelo e kelello le kutlwisiso; le pele ha ho a ka ha eba le a mong ya kang wena, le morao ho ke ke ha hlaha le a mong ya kang wena. ₁₃Ke o nea le seo o sa kang wa se kopa, lefumo le kganya, mme ho ke ke ha eba morena le ya mong ya tla ba ka ka wena ka matsatsi wohle a hao. ₁₄Hape, ha o tsamaya tseleng tsa ka, o boloka taelo tsa ka le melao ya ka, kamoo ntatao Davida a tsamaileng kateng, ke tla atisa matsatsi a hao.

₁₅Yaba Salomone o a tsoha, a bona e le toro. A tla Jerusalema, a ema pela areka ya selekane sa Jehova, a hlabela ditjheso, a hlaba le mahlabelo a teboho, mme a etsetsa bahlanka ba hae bohle mokete.

₁₆Ha ntoo tla ho morena basadi ba babedi ba diotswa, ba ema pela hae. ₁₇E mong mosadi a re: Oho, monga ka, re dutse ntlo e le nngwe le mosadi enwa; ka itshihlolla tlung, eo a le teng. ₁₈Ha feta matsatsi a mararo ke itshihlolotse, le mosadi enwa a itshihlolla; re ne re le hammoho, ho se motho osele ka tlung, e le rona ba babedi feela ka tlung. ₁₉Yaba ngwana wa mosadi enwa o timela bosiu, hobane mmae a mo pitlile. ₂₀A tsoha bosiu bo boholo, a tlosa mora wa ka pela lehlakore la ka, lekgabunyane la hao le sa robetse, mme a mo robatsa sefubeng sa hae, a mpa a bea mora hae ya timetseng sefubeng sa ka. ₂₁Hosasa ha ke tsoha, ke re ke anyesa mora wa ka, ka bona a se a timetse; empa ha ke mo qamakisisa hosasa, ka bona e se mora ka eo ke mo tswetseng. ₂₂Mosadi e mong a re: Tjhe, enwa ya phelang ke mora ka; ya timetseng ke mora hao. Teng, wa pele a fetola, a re: Tjhe, ya timetseng ke mora hao, mora ka ke ya phelang. Ba buisana jwalo pela morena.

₂₃Morena a re: E mong o re: Ya phelang ke mora ka; mme mora hao ke ya shweleng; wa bobedi o mo fetola, o re: Tjhe, mora hao ke ya shweleng, ya phelang ke mora ka. ₂₄Yaba morena o re: Ntlisetseng sabole. Ba tlisetsa morena sabole. ₂₅Morena a re: Petsolang ngwana ya phelang kalehare, le nee mosadi e mong mokgekgetho o mong, e mong a nke mokgekgetho o mong. ₂₆Empa mosadi eo ngwana ya phelang e leng wa hae, a sehwa ke mala ka baka la ngwana hae, mme a bolella morena, a re: Oho, monga ka, ha ho mpe ho newe enwa ngwana ya phelang, a se ke a bolawa. Empa e mong a re: E ke ke ya eba wa ka, leha e le wa hao; a petsolwe. ₂₇Yaba morena o fetola, a re: Neang eo ngwana ya phelang, a se ke a bolawa; efela ke mmae.

₂₈Baiseraele bohle, ha ba utlwa kahlolo eo morena a ahlotseng ka yona, ba tshaba morena, ba bona hobane kelello ya Modimo e ho yena, hore a tsebe ho ahlola.