I PETROSE 3

₁Haele lona basadi, le utlwe banna bao e leng ba lona jwalo, hore leha ba bang ba ka ba teng ba sa dumeleng lentswe, ba mpe ba hapuwe, leha e ke ke ya eba ka lentswe, e be ka metsamao ya basadi ba bona, ₂ha ba lemoha metsamao ya lona e hlwekileng, e nang le hlompho. ₃Ho hlopheha ha lona e se ke ya eba ho kantle, e leng moriri o forilweng, kapa dikgabisotsa kgauta, kapa diaparo tsa ho kgaba; ₄empa le hlophise motho ya ka sephiring, e leng wa pelo, ka kgabo e sa senyeheng ya moya o mosa, o bonolo; hlopheho eo hase le ho rateha ho Modimo. ₅Hobane ke ka mokgwa o jwalo, kgale, le bona basadi ba halalelang, ba tshepileng Modimo, ba neng ba ikgabisa, ha ba ne ba utlwa banna ba bona; ₆jwalokaha Sara a ne a utlwa Abrahama, a mmitsa morena wa hae; eo le lona le leng baradi ba hae, ha le etsa hantle, le sa tshoswe ke letho.

₇Ka mokgwa o jwalo, le lona banna, le phedisane le bona ka hlokomelo, ka ho re, mosadi ke pitsa e fetisang ka ho fokola, mme le ba hlomphe, etswe e le majalefa hammoho le lona a mohau wa bophelo, merapelo ya lona e tle e se ke ya sitiswa.

₈Haele ka ho hong, ke re: Bohle le be le kgopolo e le nngwe, le hauhelane, le ratane le baena, le be le mohau, le be le mosa; ₉le se ke la phetetsa bobe ka bobe, le hlapa ka hlapa; le mpe le hlohonolofatse, ke ho tseba hobane le bileditswe hona, hore le tle le rue hlohonolofatso. ₁₀Hobane ya lakatsang ho rata ho phela le ho bona matsatsi a monate, e ka kgona a kganne leleme la hae bobeng, le melomo ya hae puong tsa thetso; ₁₁a kgelohe bobe, mme a etse ho molemo, a batle kgotso, a e phehelle. ₁₂Hobane mahlo a Morena a tadima ba lokileng, mme ditsebe tsa hae di mamela thapelo ya bona; empa sefahleho sa Morena se bohale ho ba etsang hampe.

₁₃Mme ke mang ya tla le etsa hampe, ha le tjhesehela botle? ₁₄Empa esita leha le ka utlwiswa bohloko ka baka la ho loka, le lehlohonolo; se tshabeng ditshokelo tsa bona, mme le se ke la tshoha; ₁₅le mpe le tshabe Morena Jesu dipelong tsa lona, mme le itokisetse kamehla ho ikarabela, ka mosa le ka hlompho, ho ya le botsang tshepo e ho lona. ₁₆Le be le letswalo le letle, hore, tabeng tsona tseo ba le etselletsang ho tsona, jwaloka hoja le le disenyi, bona bao ba sebang metsamao ya lona e metle ho Kreste ba hlajwe ke dihlong. ₁₇Hobane, ha ekaba ke thato ya Modimo hore le utlwiswe bohloko, ho ka fetisa hore le bo utlwe le ntse le etsa hantle, e seng hampe.

₁₈Hobane le yena Kreste o ne a utlwiswe bohloko hang ka baka la dibe; yena ya lokileng o bolaetswe bakgopo, hore a tsebe ho re tlisa ho Modimo; o shwele ka nqeng ya nama, empa o phedisitswe ka nqeng ya moya. ₁₉Ke ka wona moya oo a ileng ho bolella meya e teronkong, ₂₀e neng e ikgantshitse kgale, ha Modimo o ne o sa mameletse ka sebete, e leng mehleng ya Nowe, ha ho ne ho hahuwa areka, eo batho ba seng bakae, e leng ba robileng meno e le mmedi, ba pholositsweng ka yona metsing. ₂₁Se tshwantswang ke hoo ke kolobetso e re pholosang jwale — e seng e hlatswang ditshila tsa mmele, empa eo e leng ho itlama ha letswalo le letle pela Modimo — ka tsoho ya Jesu Kreste, ₂₂ya ileng lehodimong, ya dutseng letsohong le letona la Modimo, eo mangeloi, le marena, le mebuso e beilweng tlasa hae.