Saule o a lahlwa. — Davida o tlotsetswa ho ba morena. — Saule o kenwa ke moya o mobe. — Davida o kena tshebeletsong ya Saule.
1Yaba Jehova o re ho Samuele: O tla hlomohela Saule ho le hokae, athe ke mo lahlile, hore e se hlole e eba morena wa Iseraele? Tlatsa lenaka la hao ole, o ye, ke o rome ho Jese wa Bethlehema, hobane ke iponetse morena hara bara ba hae. 2Samuele a re: Nka ya jwang? Saule ha a ka utlwa, o tla mpolaya. Jehova a re: Eya le sethole, o tle o re, o tlile ho hlabela Jehova. 3O biletse Jese sehlabelong, mme ke tla o tsebisa seo o tla se etsa, mme o tla ntlotsetsa eo ke tla o laela yena.
4Samuele a etsa ka polelo ya Jehova; a ya Bethlehema. Ebile baholo ba motse ba mo kgahlanyetsa ba tshohile, ba re: Na o tlile ka kgotso na? 5A re: Ke tlile ka kgotso ho hlabela Jehova; le ke le itokise, re ye le lona sehlabelong. A lokisa Jese le bara ba hae, mme a ba biletsa sehlabelong.
6Ha ba fihla, a bona Eliabe, a re: Ruri, motlotsuwa wa Jehova o pela hae. 7Jehova a re ho Samuele: O se ke wa tadima tshobotsi ya hae, leha e le bolelele ba seemo sa hae; nna ke mo lahlile; hobane Jehova ha a bone kamoo motho a bonang kateng; hobane motho o tadima tshobotsi, empa Jehova yena o tadima pelo. 8Jese a bitsa Abinadabe, a mo fetisa pela Samuele. Samuele a re: Le enwa Jehova ha a mo kgethe. 9Jese a fetisa le Shamma; Samuele a re: Le enwa Jehova ha a mo kgethe. 10Jese a fetisa bara ba hae ba supileng jwalo pela Samuele, empa Samuele a re ho Jese: Jehova bao ha a ba kgethe. 11Samuele a eketsa a re ho Jese: Na bao ke bara ba hao kaofela na? A re: Ho sa setse e monyenyane; o mpa a disitse dinku. Samuele a re ho Jese: Romela ho mo lata, hobane re ke ke ra dula dijong, a eso ho fihle. 12A romela ke hona, a mo hlahisa; o ne a le mokgunong, a le mahlo a matle, le ka sebopeho a le motle. Ebile Jehova o re: Tsoha, o mo tlotse, hobane ke yena eo. 13Yaba Samuele o nka lenaka la ole, a mo tlotsa hara banababo, mme moya wa Jehova wa tshwara Davida, ho qala tsatsing lona leo.
Samuele a ntoo tloha, a ikela Rama.
14Jwale, moya wa Jehova wa tloha ho Saule, mme moya o mobe o tswang ho Jehova, wa mo ferekanya. 15Bahlanka ba Saule ba re ho yena: Bona, moya o mobe o tswang ho Modimo o a o ferekanya. 16Ha ho le jwalo, monga rona, ako laele bahlanka ba hao ba leng pela hao, hore ba batle motho ya tsebang ho letsa harepa; etlere ha moya o mobe o tswang ho Modimo o etla ho wena, o tla letsa ka letsoho la hae, mme o tla thuseha. 17Ebile Saule o re ho bahlanka ba hae: Mpatleleng motho ya letsang hantle, le mo tlise ho nna. 18E mong wa bahlanka a fetola, a re: Bona, ke bone mora e mong wa Jese wa Bethlehema, ya tsebang ho letsa; hape, ke motho ya matla, ya bohale, motho wa ntwa, ya kelello ditabeng, ya sebopeho se setle, mme Jehova o ho yena. 19Ebile Saule o romela manqosa ho Jese, a re: Nthomele mora hao Davida, ya disang dinku. 20Jese a nka esele ya ho belesa bohobe le lekuka la veine le potsanyane, a di romela ho Saule ka mora hae Davida. 21Davida, ha a fihla ho Saule, a fihla a ema pela hae, mme Saule a mo rata haholo, a mmea lehlahana la hae. 22Saule a ntano romela ho Jese, a re: Davida a ke a eme pela ka, hobane o bone mohau ho nna. 23Enere ha moya o mobe o tswang ho Modimo o tlela Saule, Davida o ne a nka harepa, a e letse, mme thuso e ne e hlahela Saule, a ikutlwe monate, mme moya o mobe o mo tlohele.
