I SAMUELE 2

₁Anna a rapela, a re: Pelo ya ka e thabetse Jehova, lenaka la ka le emisitswe ke Jehova; molomo wa ka o ahlametse dira tsa ka, ke tswe ke nyakaletse ke poloko ya hao.

₂Ha ho ya kgethehileng jwaloka Jehova; ha ho Modimo o mong haese wena; ha ho lefika le kang Modimo wa rona. ₃Le se ke la hlola le bua ka boikgohomoso, boikgantsho bo se ke ba tswa melomong ya lona; hobane Jehova ke Modimo o tsebang, mme diketso di lekanngwa ke yena. ₄Diqha tsa dinatla di robehile; ba tetemang ba tlamilwe letheka ka matla a hae. ₅Ba neng ba kgora, ba ile ho sebeletsa dijo; mme ba neng ba lapa, ha ba sa lapa; nyopa yona e tswetse ba supileng, mme ya nang le bana ba bangata o swabile. ₆Jehova o a timetsa, mme o a pholosa, o theosetsa lebitleng, mme o nyolla teng. ₇Jehova o a fumanehisa, mme o a ruisa, o a kokobetsa, mme o a phahamisa. ₈O ntsha mofutsana ditholeng; o tlosa mofumanehi thotobolong, e le hore a ba dudise hara marena, mme a ba ruise terone ya kganya. Hobane metheo ya lefatshe ke ya Jehova; o tiisitse lefatshe lohle hodima yona.

₉O tla tiisa maoto a ba mo ratang, bakgopo bona ba tla kgutsiswa lefifing; hobane ha ho motho ya ka hlolang ka matla a hae. ₁₀Jehova o tla tshosa ba mo tsekisang, o tla ba dumisetsa a le lehodimong. Jehova o tla ahlola dipheletso tsa lefatshe; o tla nea morena wa hae matla, a emise lenaka la motlotsuwa wa hae!

₁₁Ebile Elkana o boela Rama tlung ya hae; ngwana yena a sala a sebeletsa Jehova pela moprista Eli.

₁₂Haele bara ba Eli, e ne e le bara ba Beliale; ba ne ba sa re letho ka Jehova. ₁₃Mokgwa wa baprista bao ho setjhaba e be e le hore, motho ha a hlaba sehlabelo, mohlankana wa moprista o ne a ya tle, ha nama e ntse e apehilwe, a tshwere fereko e meno a mararo. ₁₄O ne a hlaba paneng, kapa pitseng, kapa pitsaneng, kapa morifing, mme hohle ho neng ho ntshwa ke fereko, moprista o ne a inkela hona. Ba ne ba etsa jwalo ho Baiseraele bohle ba tlang Silo. ₁₅Hape, mohlankana wa moprista o ne a etla, ba eso ho tjhese mafura, a re ho motho ya hlabileng: Ntsha nama ya ho besetswa moprista, hobane a ke ke a amohela ho wena nama e apehilweng, haese e tala feela. ₁₆Ha e mong a ba a ka re ho yena: Mafura a ke a tjheswe pele, o ntoo inkela kamoo pelo ya hao e ratang kateng, eo o ne a re: Tjhe, o nnee jwale: ha ho se jwalo, ke tla nka ka matla. ₁₇Ka baka leo, sebe sa bahlankana bao se ne se le seholo haholo pela Jehova, hobane le batho ba ne ba se ba nyedisa tse beelwang Jehova.

₁₈Haele mohlankana Samuele, o ne a ntse a sebeletsa Jehova, a apere efoda ya lene. ₁₉Hape, mmae o ne a mo etsetsa seaparonyana ka dilemo tsohle, a mo tlisetse sona mohla ba tlang le monna wa hae ho hlaba sehlabelo sa selemo se seng le se seng. ₂₀Jwale, Eli a hlohonolofatsa Elkana le mosadi wa hae, a re: Jehova a o tsosetse bana ka mosadi enwa bakeng sa ngwana eo a kileng a mo abela Jehova. Ba ntoo kgutlela habo. ₂₁Ka baka lena, Jehova a etela Anna; mme Anna a emola, a tswala bashemane ba bararo le basetsana ba babedi; haele mohlankanyana Samuele, o ne a ntse a hola pela Jehova.

₂₂Eli yena o ne a se a hodile haholo; o ne a ntse a utlwa tsohle tse etswang ke bara ba hae ho Baiseraele bohle, le kamoo ba neng ba robala le basadi kateng, ba phuthehang pela monyako wa tente ya pokano. ₂₃O ne a re ho bona: Le etsetsang taba tse jwalo? Ke ntse ke utlwa ka setjhaba kaofela ditaba tsa lona tse manyala tseo le di etsang. ₂₄Tjhe, bara ba ka, hase ditaba tse ntle tseo ke di utlwang; le fosisa setjhaba sa Jehova. ₂₅Ha motho e mong a sitelwa e mong, Modimo o tla mo ahlola; empa ha motho a sitelwa Jehova, o tla rapellwa ke mang? Leha ho le jwalo, ba se ke ba utlwa lentswe la ntata bona, hobane Jehova o ne a se a hopotse ho ba timetsa.

₂₆Haele mohlankana Samuele, o ne a ntse a hola, a ntse a kgahlisa Jehova le batho.

₂₇Yaba monna e mong wa Modimo o tla ho Eli, a re ho yena: Jehova o re: Ha ke re, nkile ka itshenolela ba ntlo ya ntatao, ha ba sa le Egepeta, ha Faro; ₂₈ka ba ka mo kgetha melokong yohle ya Iseraele, hore e be moprista wa ka, ya hlabang aletareng ya ka, le ho tjhesa dibano, le ho apara efoda pela ka; mme ka nea ntlo ya ntatao ditjheso tsohle tsa bana ba Iseraele na? ₂₉Le hatakeletseng ka maoto mahlabelo a ka le diabelo tsa ka, tseo ke di laetseng tlung ya ka? O hlomphile bara ba hao ho fetisa nna, le tle le inontshe ka tse kgolo tsa dineo tsohle, tseo setjhaba sa ka sa Iseraele se ananelang ka tsona. ₃₀Ha ho le jwalo, Jehova, Modimo wa Iseraele, o re: Ke fela ke boletse hore ntlo ya hao le ntlo ya ntatao e tla nne e tsamaye pela ka kamehla; empa jwale, Jehova o re: Le ho leka; hobane ba ntlotlisang, le nna ke a ba tlotlisa; haele ba nnyedisang, ba tla nyediswa. ₃₁Bona, ditshiu di a tla, tseo ke tla poma letsoho la hao le letsoho la ntlo ya ntatao, ho tle ho se ke ha eba monna wa leqheku tlung ya hao. ₃₂Mme o tla bona sera tlung ya ka, ha bana ba Iseraele ba ntse ba newa ke Modimo melemo yohle, mme ha ho ka ke ha eba monna wa leqheku tlung ya hao, le ka ho sa feleng. ₃₃Monna wa ba heno eo ke sa mo kgaolang aletareng ya ka, o tla salla ho llisa mahlo a hao, le ho hlomola pelo ya hao, mme bohle ba hlahang tlung ya hao, ba tla timela botjheng ba bona. ₃₄Seo e tla ba pontsho ho wena, ke se tla hlahela bara ba hao ba babedi, Hofni le Finease: ba tla shwa ba babedi ka tsatsi le le leng. ₃₅Ke tla ipatlela moprista wa nnete, ya tla etsa kahohle kamoo ho ratang pelo ya ka le moya wa ka kateng; ke tla mo hahela ntlo e tiileng, mme o tla nne a itsamaele pela motlotsuwa wa ka, ka ho sa feleng. ₃₆Haele ya tla sala wa ntlo ya hao, o tla tla, a mo kgumamelle tjhelete le sengwatho sa bohobe, a re: Ako mpee ho o mong wa mesebetsi ya boprista, ke nne ke je sengwathwana sa bohobe.