II DIKRONIKE 26

₁Yaba setjhaba kaofela sa Juda se nka Osiase, ya neng a le dilemo tse leshome le metso e tsheletseng, sa mmea morena tulong tsa ntatae Amatsia. ₂Ke yena ya kileng a tsosa Elothe, a o busetsa ho Juda; ke ha morena ntatae a se a orohetse ho bontatae.

₃Osiase o ne a le dilemo tse leshome le metso e tsheletseng ha a qala ho busa, mme a busa ka dilemo tse mashome a mahlano a metso e mmedi Jerusalema; lebitso la mmae e ne e le Jekolia wa Jerusalema. ₄A etsa ho lokileng mahlong a Jehova, kahohle kamoo ho neng ho entse Amatsia ntatae kateng. ₅A nna a batla Jehova ka tshiu tsohle Sakaria, monna ya kelello diponong tsa Modimo; mme matsatsing ao a batlileng Jehova ka wona, Modimo wa nna wa mo atlisa.

₆A tswa, a futuhela Bafilesta, a heletsa lerako la Gathe, le lerako la Jabne, le lerako la Ashdode, mme a haha metse Ashdode le naheng ya Bafilesta. ₇Mme Modimo wa mo tlatsa ho lwantsha Bafilesta le Baarabe ba ahileng Gure-Baale, le Bamaone. ₈Haele Baammone, ba ntshetsa Osiase dinyehelo; mme botumo ba hae ba utlwahala ho fihlela moeding wa Egepeta, hobane a ne a iphile matla ka ho fetisisa.

₉Hape, Osiase a haha ditora Jerusalema monyakong wa Kou le monyakong wa Kgohlo, le moo lerako le kgutlang teng, mme a di tiisa. ₁₀Hape, a haha ditora lefeelleng, mme a tjheka didiba tse ngata, estwe a ne a ruile makgomo a mangata a fulang dithoteng le masabasabeng, a ruile le balemi ba dikoro le ba merara dithabeng le Karmele, hobane a ne a rata masimo haholo. ₁₁Osiase o ne a na le makgotla a futuhang, a yang ntweng ka dihlopha, ka palo ya wona e neng e entswe ke Jeiele mongodi le Maaseia mohlahlobi; a ne a laolwa ke Hanania, molaodi e mong wa morena. ₁₂Palo kaofela ya dihlooho tsa matlo a bontata Bajuda, banna ba bahale, e ne e le dikete tse pedi tse nang le makgolo a tsheletseng. ₁₃Tsamaisong ya bona ho ne ho na le sera sa batho ba dikete tse makgolo a mararo a metso e supileng tse nang le makgolo a mahlano, ba neng ba futuha ka matla le bohale ba tlatsa morena ho lwantsha dira. ₁₄Osiase o ne a lokiseditse makgotla dithebe, le marumo, le diheleme, le ditshireletso tsa difuba, le diqha le matjeketjane. ₁₅Hape, a etsa Jerusalema dibetsa tse qapilweng ke monna ya masene, tse bewang ditoreng le dikoung, ho betsa ka metsu le ka majwe a maholohadi. Botumo ba hae ba hasana hole, hobane a nna a tlatswa ka mokgwa o makatsang, ho fihlela a ba a ipha matla.

₁₆Empa eitse hobane a iphe matla, pelo ya hae ya ikakasa ho fihlela a ba a etsa sebe, a sitelwa Jehova, Modimo wa hae; hobane a kena tempeleng ya Jehova a tle a tjhese dibano aletareng ya dibano. ₁₇Moprista Asaria a kena kamora hae, a ena le baprista ba mashome a robileng meno e le mmedi ba Jehova, banna ba bahale; ₁₈ba hanela morena Osiase, ba re ho yena: Ha o na tokelo, Osiase, ya ho tjhesetsa Jehova dibano; ke ya baprista, bara ba Aarone, ba kgethetsweng ho di tjhesa. Tswa sehalalelong, hobane o sitilwe, mme ka hona o ke ke wa bona sebaka sa boithoriso ho Jehova Modimo. ₁₉Empa Osiase a halefa; letsohong la hae o ne a tshwere pitsa ya ho tjhesa dibano. A re a sa halefetse baprista, lepera la hlaha phatleng ya hae pontsheng ya baprista, a le ka tlung ya Jehova, pela aletare ya dibano. ₂₀Asaria, moprista e moholo, le baprista bohle ha ba mo tadima, ba bona a ena le lepera phatleng; yaba ba mo ntsha kapele, le yena a phakisa ho tswa, kahobane Jehova a mo otlile. ₂₁Morena Osiase ya eba molepera ho isa tsatsing la ho shwa ha hae; mme a nna a dula tlung e kathoko, e le molepera; hobane a ne a lelekilwe tlung ya Jehova. Mme Jothame, mora hae, o ne a laela tlung ya morena, a ntse a ahlola setjhaba sa naha ya Juda.

₂₂Haele ditaba tse ding tsa Osiase, tsa ho qala le tsa ho qetella, di ngodilwe ke Esaia, mora Amotse, moporofeta.

₂₃Osiase a orohela ho bontatae, mme a patwa ho bontatae serapeng sa mabitla a marena, hobane ho ne ho thwe: Ke molepera. Mme Jothame, mora hae, ya eba morena tulong tsa hae.