Esekiase, morena wa Juda. — Tempele e a hlwekiswa; ho tsoswa tshebeletso ya Jehova.
1Esekiase o ne a le dilemo tse mashome a mabedi a metso e mehlano, ha a qala ho busa, a busa ka dilemo tse mashome a mabedi a metso e robileng mono o le mong Jerusalema; lebitso la mmae e ne e le Abija, moradi wa Sakaria.
2A etsa ho lokileng mahlong a Jehova, kahohle kamoo ho neng ho entse Davida ntatae kateng.
3Ka selemo sa ho qala sa ho busa ha hae, ka kgwedi ya pele, a bula mamati a ntlo ya Jehova, mme a a lokisa. 4A mema baprista le Balevi, a ba phuthela lepatlelong le ka nqa botjhabatsatsi; 5a re ho bona: Mmameleng, lona Balevi! Itlhwekiseng jwale, le hlwekise ntlo ya Jehova, Modimo wa bontata lona, mme le lahlele ditshila kantle ho sehalalelo. 6Hobane bontata rona ba sitilwe; ba entse ho leng hobe mahlong a Jehova, Modimo wa rona; ba mo furaletse; ba furallisitse difahleho tsa bona bodulo ba Jehova, mme ba bo neile mokokotlo. 7Ba bile ba kwetse mamati a mathule, ba timile dilampi; ha ba ka ba tjhesa dibano, hape ha ba ka ba hlaba ditjheso sehalalelong sa Modimo wa Iseraele. 8Ka baka la tseo, bohale ba Jehova bo wetse Juda le Jerusalema hodimo; o ba neetse botubong le tshenyehong le ditshomong, jwalokaha le bona ka mahlo a lona. 9Mme bonang, ka baka leo, bontata rona ba nnile ba dihuwa ke lerumo, mme bara ba rona le baradi ba rona le basadi ba rona ba kgolehong. 10Jwale, ke na le pelo ya ho hlaba selekane le Jehova, Modimo wa Iseraele, hore bohale ba kgalefo ya hae bo ke bo re kgelohe. 11Ha ho le jwalo, bara ba ka, le se ke la dieha; ke lona bao Jehova a le kgethileng hore le eme pela hae le ho etsa mosebetsi wa hae, le ho ba basebeletsi ba hae le ba mo tjhesetsang dibano.
12Yaba Balevi ba tloha, e le Mahathe, mora Amasai, le Joele, mora Asaria, wa bara ba Bakehathe; ho bara ba Merari ya eba Kishe, mora Abdi, le Asaria, mora Jahalleleele; ho Bagershone ya eba Jowa, mora Simma, le Edene, mora Jowa; 13ho bara ba Elitsafane ya eba Shimri le Jeiele; ho bara ba Asafe, Sakaria le Matthania; 14ho bara ba Hemane, Jehiele le Shimei; ho bara ba Jeduthune, Shemaia le Ussiele. 15Ba phutha banababo bona, ba itlhwekisa, mme ka taelo ya morena, le ka ho ya ka mantswe a Jehova, ba kena ho hlwekisa ntlo ya Jehova. 16Baprista ba kena kahare ho ntlo ya Jehova ho e hlwekisa; ba lahlela ntle, lebaleng la ntlo ya Jehova, ditshila tsohle tseo ba di fumaneng tempeleng ya Jehova, mme Balevi ba di nka ho di isa kantle, molatswaneng wa Kedrone. 17Ba qala hlwekiso eo ka tsatsi la pele la kgwedi ya pele; ka letsatsi la boroba meno e le mmedi la kgwedi ba kena mathuleng a Jehova, mme ba halaletsa ntlo ya Jehova ka tshiu tse robileng meno e le mmedi; ba qetella ka letsatsi la leshome le metso e tsheletseng la kgwedi ya pele.
18Ba ntoo ya ho morena Esekiase, ba re: Re hlwekisitse ntlo yohle ya Jehova, le aletare ya ditjheso le mesebetsi yohle ya yona, le tafole ya Mahobe a pontsha le mesebetsi yohle ya yona. 19Hape, re boetse re lokisitse, mme re halaleditse mesebetsi yohle eo morena Akase a neng a e silafaditse, ha a sa busa, mohla a sitelwang Jehova; bona, e pela aletare ya Jehova.
20Yaba morena Esekiase o tsohela e sa le hosasa, mme a phutha beng ba motse, mme a nyolohela tlung ya Jehova. 21Ba tlisa dipoho tse supileng, le dipheleu tse supileng, le dikonyana tse supileng, le diphooko tse supileng, e be sehlabelo sa sebe bakeng sa mmuso le sa sehalalelo le sa Juda; mme morena a bolella baprista, bara ba Aarone, hore ba di hlabele aletareng ya Jehova. 22Yaba baprista ba hlaba dikgomo, ba amohela madi, ba tshollela madi aletareng; ba hlaba le dipheleu, ba tshollela madi a tsona aletareng; ba hlaba le dikonyana, mme ba tshollela madi a tsona aletareng. 23Ba ntoo tlisa diphooko tsa sehlabelo sa sebe pontsheng ya morena le pontsheng ya morena le pontsheng ya phutheho; ba bea matsoho a bona hodima tsona. 24Baprista ba di hlaba, ba tshollela madi a tsona aletareng, bakeng sa sebe, hore ho etsetswe Baiseraele bohle pheko; hobane morena a ne a laetse hore setjheso le sehlabelo sa sebe di etsetswe Baiseraele bohle. 25Yaba o emisa Balevi ka tlung ya Jehova ba tshwere disimbala le diviole le diharepa, kamoo ho neng ho laetse Davida le Gade seboni sa morena le Nathane moporofeta; hobane taelo eo e ne e tswile ho Jehova ka baporofeta ba hae. 26Balevi ba ema moo jwalo, ba tshwere diletsa tsa Davida, baprista bona ba tshwere diterompeta. 27Esekiase a laela hore ho hlahiswe setjheso aletareng; motsotsong oo setjheso se qadilweng ka wona, ha qaleha le pina ya Jehova hammoho le diterompeta, di thusana le diletsa tsa Davida, morena wa Iseraele. 28Yaba phutheho yohle e a inama, dibini tsa bina, diterompeta tsa letswa, ho fihlela setjheso ha se phetheha. 29Eitse hobane setjheso se qetellwe ho hlahiswa, morena le bohle bao a nang le bona ba inama, mme ba kgumama. 30Morena Esekiase le mahosana ba re, Balevi ba boke Jehova ka mantswe a Davida le a Asafe, seboni; mme ba mmoka ka thabo, ba inama le ho kgumama.
31Yaba Esekiase o bua, a re: Jwale, ha le fela le ikgethetse Jehova, le atamele, mme le tlise mahlabelo le dimpho tsa teboho tlung ya Jehova. Ba phutheho ba tlisa mahlabelo le diteboho, mme bohle ba pelo di ratang ba hlahisa ditjheso. 32Palo ya ditjheso tse tlisitsweng ke phutheho ya eba dikgomo tse mashome a supileng, le dipheleu tse lekgolo, le dikonyana tse makgolo a mabedi, kaofela ha tsona e le ditjheso tsa Jehova. 33Dintho tse kgethetsweng Jehova ya eba dikgomo tse makgolo a tsheletseng le dinku tse dikete tse tharo. 34Feela, ho ne ho se baprista ba lekaneng, ba sitwa ke hona ho buha dithjeso tsohle; yaba banababo bona, Balevi, ba ba tlatsa, ho fihlela mosebetsi o ba o phetheha, ho fihlela le bona baprista ba ba ba ikgalaletsa, etswe Balevi ba ne ba fetisa baprista ka ho rata ho ikgalaletsa. 35Hape, ditjheso tse ngata tsa eba teng, le mafura a mahlabelo a teboho, le dino tsa setjheso se seng le se seng. Tshebeletso ya ntlo ya Jehova ya tsoswa jwalo. 36Esekiase le setjhaba sohle ba thaba, ke hobane Modimo o ne o ratisitse setjhaba; etswe taba eo ya etsahala e sa ka ya rerwa.
