II DIKRONIKE 3

₁Yaba Salomone o qala ho haha ntlo ya Jehova, Jerusalema, thabeng ya Moria, e neng e supiswe ntatae Davida, setsheng sona seo Davida a neng a se lokisitse seotlong sa Ornane Mojebuse. ₂A qala ho haha ka letsatsi la bobedi la kgwedi ya bobedi, ka selemo sa bone sa ho busa ha hae.

₃Ke ena metheo eo Salomone a e theileng ho haha ntlo ya Modimo ka yona; bolelele e ne e le ditswe tse mashome a tsheletseng tsa ditswe tsa tekanyo ya kgale, bophara e le tswe mashome a mabedi. ₄Mathule bolelele ba wona e ne e le ditswe tse mashome a mabedi, bo lekane le bophara ba ntlo; bophahamo ba wona e ne e le ditswe tse lekgolo le nang le mashome a mabedi; a a maneha kahare ka kgauta e hlwekileng.

₅A ntoo kwahela ntlo e kgolo ka difate tsa dikiprese, a e maneha ka kgauta e hlwekileng, a e kgabisa ka dipalema le meqhaka. ₆Hape, a kgabisa ntlo ka mekgabo ya mahakwe a bohlokwa; kgauta e le kgauta ya Parvaime. ₇A maneha ntlo, le dibalaka, le mehato ya menyako, le mabota, le dikosene ka kgauta, mme a betla dikerubime maboteng.

₈A ntoo etsa ntlo ya sehalaledisiso; bolelele ba yona e ne e le ditswe tse mashome a mabedi, bo lekane le bophara ba ntlo, bophara le bona e le ditswe tse mashome a mabedi; a e maneha ka kgauta e hlwekileng ya ditalenta tse makgolo a tsheletseng; ₉boima ba dipekere ya eba dishekele tse mashome a mahlano tsa kgauta. A maneha le dikamore tse kahodima ka kgauta.

₁₀Tlung ya sehalaledisiso a etsa dikerubime tse pedi tse betlilweng, mme tsa manehwa ka kgauta. ₁₁Mapheo a dikerubime, bolelele ba wona e ne e le ditswe tse mashome a mabedi; lepheo la e nngwe bolelele ba lona e ne e le ditswe tse hlano, le ne le kgitla lebota la ntlo; lepheo le leng le lona le bolelele ba ditswe tse hlano le ne le amana le lepheo le leng la kerubime ya bobedi; ₁₂lepheo le leng la kerubime e nngwe bolelele ba lona e ne e le ditswe tse hlano; le ne le kgitla lebota la ntlo, mme lepheo le leng le bolelele ba tswe tse hlano le ne le amana le lepheo la kerubime e nngwe. ₁₃Mapheo a dikerubime tseo, ha a otlolohile, a ne a etsa sebaka sa ditswe tse mashome a mabedi. Di ne di eme ka maoto a tsona, mme difahleho tsa tsona di ne di tadimile kahare ho ntlo.

₁₄A etsa le lesela la purepera le sekarelata le vermilione le lene e ntle, mme a le kgabisa ka dikerubime.

₁₅Pela ntlo, a etsa ditshiya tse pedi, bolelele ba e nngwe le e nngwe e le ditswe tse mashome a mararo a metso e mehlano; hlooho tse hodima tsona, bolelele ba tsona e ne e le ditswe tse hlano. ₁₆A ntoo etsetsa sehalalelo meqhaka, a kgabisa le dintlha tsa ditshiya ka meqhaka, mme a etsa digaranata tse lekgolo, a di kenya ka meqhakeng. ₁₇A hloma ditshiya pela tempele, e nngwe ka ho le letona, e nngwe ka ho le letshehadi; a rea e leng ka ho le letona Jakine (o tla tiisa); e leng ka ho le letshehadi a e rea Boase (o na le matla).