II DIKRONIKE 34

₁Josiase o ne a le dilemo tse robileng meno e le mmedi ha a qala ho busa, a busa ka dilemo tse mashome a mararo a motso o mong Jerusalema.

₂A etsa ho lokileng mahlong a Jehova, a tsamaya ka mehlala ya Davida ntatae, mme ha a ka a e kgeloha ho ya leha e le ka ho le letona, leha e le ka ho le letshehadi.

₃Ka selemo sa boroba meno e le mmedi sa puso ya hae, a sa ntsane a le motjha, a qala ho batla Modimo wa Davida ntatae; mme ka lemo sa leshome le metso e mmedi, a qala ho hlwekisa Juda le Jerusalema ka ho tlosa dinqalo tse diphahameng, le diashera, le ditshwantsho tse betlilweng, le ditshwantsho tse tsholotsweng. ₄Ha qhaqhwa pela hae dialetare tsa boBaale; a heletsa ditshiya tsa letsatsi tse neng di beilwe hodima tsona; a robaka diashera, le ditshwantsho tse betlilweng, le ditshwantsho tse tsholotsweng; a di sila phofo, mme a e tshollela mabitleng a ba neng ba di hlabetse mahlabelo. ₅Hape, a tjhesetsa masapo a baprista dialetareng tsa bona; a hlwekisa Juda le Jerusalema jwalo. ₆Le metseng ya Manasse, le ya Efraime, le ya Simeone, le ho ya fihla ho ya Nefthali, esita le dithakong tsa yona, le ka mathoko wohle, ₇a qhaqha dialetare, a pshatla diashera le ditshwantsho tse betlilweng, mme a di etsa phofo; hape, a heletsa ditshiya tsohle tsa letsatsi lefatsheng lohle la Iseraele; a ntoo kgutlela Jerusalema.

₈Ka selemo sa leshome le metso e robileng meno e le mmedi sa ho busa ha hae, ha a se a hlwekisitse lefatshe le ntlo ya Jehova, a roma Shafane, mora Atsaila, le Maaseia, mmusi wa motse, le Jowa, mora Joakase mongodi, hore ba ye ho tsosa ntlo ya Jehova, Modimo wa hae. ₉Ba fihla ho Hilkia, moprista e moholo, ba newa ditjhelete tse neng di tlisitswe tlung ya Modimo, tseo Balevi, balebedi ba monyako, ba neng ba di amohetse ho Manasse le Efraime, le ho Baiseraele bohle ba bang, le ho Bajuda bohle le ho Benjamine, le ho baahi ba Jerusalema. ₁₀Tsa bewa matsohong a beng ba mosebetsi, ba lebelang mosebetsi wa ntlo ya Jehova; beng ba mosebetsi ba di nea ba sebetsang tlung ya Jehova ho tsosa le ho lokisa ntlo. ₁₁Ba di nea le dibetli tsa difate le dihahi, hore di reke majwe a betlilweng, le difate tse tla kopanngwa, le ho etsa difate tsa ho fera matlo a heleditsweng ke marena a Juda. ₁₂Batho bao ba nna ba sebetsa mosebetsi oo ka botshepehi. Balebedi ba bona e ne e le Jahathe le Obadia, Balevi, ho bara ba Merari, le Sakaria le Meshullame, ho bara ba Bakehathe; Balevi bohle, ba neng ba tseba ho letsa diletsa, ₁₃ba ne ba lebela ba tlisang dintho, ba tsamaisa bohle ba sebetsang mosebetsi wa mofuta ofe le ofe; hape, hara Balevi ho ne ho na le bangodi, le bahlahlobi, le balebedi ba menyako.

₁₄Eitse ha ho ntse ho ntshwa ditjhelete tse tlisitsweng tlung ya Jehova, Hilkia, moprista, a fumana buka ya molao wa Jehova o neilweng ka Moshe. ₁₅Hilkia a bua, a re ho Shafane, mongodi: Ke fumane buka ya molao ka tlung ya Jehova. Hilkia a nea Shafane buka. ₁₆Shafane a tlisa buka ho Morena, hape a behela morena ditaba, a re: Bahlanka ba hao ba sebeditse tsohle tseo ba di laetsweng. ₁₇Ba bokeletse tjhelete tse neng di le ka tlung ya Jehova, mme ba di beile matsohong a balebedi le matsohong a ba sebetsang mosebetsi. ₁₈Hape, Shafane, mongodi, a behela morena, a re: Hilkia moprista o nneile buka e nngwe. Mme Shafane a e bala pela morena.

₁₉Eitse ha morena a utlwa dipolelo tsa molao, a hahola diaparo tsa hae; ₂₀mme morena a laela Hilkia, le Akikame, mora Shafane, le Abdone, mora Mikea, le Shafane, mongodi, le Asaia mohlanka wa morena, ₂₁a re: Eyang, le mpotsetse Jehova bakeng sa ka le bakeng sa masala a Iseraele le Juda, hodima dipolelo tsa buka e fumanweng; hobane kgalefo ya Jehova e tsholletsweng rona e kgolo, ka baka la hobane bontata rona ba sa ka ba boloka lentswe la Jehova, ho etsa ka tsohle tse ngodilweng bukeng ena.

₂₂Yaba Hilkia le ba romilweng ke morena ba ya ho Hulda, moporofeta wa mosadi, mosadi wa Shallume, mora Thokehathe, mora Hasra, molebedi wa diaparo, ya ahileng Jerusalema, karolong e nngwe ya motse, mme ba mmolella tseo. ₂₃Yaba o re ho bona: Ho itswe ke Jehova, Modimo wa Iseraele: Ereng ho monna ya le rometseng ho nna: ₂₄Ho thwe ke Jehova: Ke se ke ya hlahisetsa motse ona le ba ahileng ho wona kotsi, ka dithohako tsohle tse ngodilweng bukeng e badilweng pela morena wa Juda. ₂₅Kahobane ba mphuraletse, mme ba tjheseditse medimo esele dibano, hore ba nkgalefise ka mesebetsi yohle ya matsoho a bona; ka baka leo, kgalefo ya ka e tsholletswe nnqalong ena, mme e ke ke ya tingwa. ₂₆Haele morena wa Juda, ya le romileng ho botsa Jehova, ereng ho yena: Ho itswe ke Jehova, Modimo wa Iseraele, hodima dipolelo tseo o di utlwileng: ₂₇Erekaha pelo ya hao e nolofetse, wa ikokobetsa pela Modimo, mohla o utlwang dipolelo tsa wona bakeng sa motse wona le bakeng sa ba ahileng ho wona, wa ikokobetsa pela ka, wa hahola diaparo tsa hao, wa ba wa lla pela ka, le nna ke utlwile, ho itsalo Jehova. ₂₈Ke se ke tla o orosetsa ho bontatao, mme o tla phuthelwa lebitleng la hao ka kgotso, mme mahlo a hao a ke ke a bona dikotsi tsohle tseo ke tla di hlahisetsa motse ona le ba ahileng ho wona.

Ba busetsa polelo eo ho morena.

₂₉Yaba morena o romela ho bokella baholo bohle ba Juda le ba Jerusalema. ₃₀Morena a nyolohela ka tlung ya Jehova, yena le batho bohle ba Juda, le baahi ba Jerusalema, le baprista, le Balevi, le setjhaba kaofela, ho qala ka ba baholo ho isa ho ba banyenyane; a bala ditsebeng tsa bona dipolelo tsohle tsa buka ya selekane e fumanweng ka tlung ya Jehova; ₃₁morena a ema tulong tsa hae, a hlaba selekane pela Jehova, sa ho latela Jehova le sa ho boloka ditaelo tsa hae, le ditemoso tsa hae, le dikomelo tsa hae, ka pelo yohle ya hae le ka moya wohle wa hae, sa ho re, o tla etsa ka dipolelo tsa selekane tse ngodilweng bukeng ena. ₃₂A kenya bohle ba neng ba le Jerusalema le Benjamine selekaneng seo; mme baahi ba Jerusalema ba ya ka selekane sa Modimo, Modimo wa bontata bona.

₃₃Yaba Josiase o tlosa manyala wohle a mafatshe wohle ao e leng a bana ba Iseraele; a kganna bohle ba naheng ya Iseraele hore ba sebeletse Jehova, Modimo wa bona. Ka ditshiu tsohle tsa ho phela ha hae, ha ba ka ba kgeloha tshebeletso ya Jehova, Modimo wa bontata bona.