III JOHANNE 1

₁Nna, moholo, ke ngolla Gaiuse, moratuwa, eo ke mo ratang nneteng.

₂Moratuwa, ke rata hoba o atlehe nthong tsohle, mme o iketle mmeleng wa hao, jwalokaha moya wa hao o atlehile. ₃Hobane ke thabile haholo ha baena ba fihlileng mona ba pakile nnete ya hao, kamoo o tsamayang nneteng kateng. ₄Ho nna ha ho thabo e fetisang ena, ya ho utlwa hoba bana ba ka ba tsamaya nneteng.

₅Moratuwa, o etsa ka bokgabane ho tsohle tseo o di etsetsang baena le baeti. ₆Ke bona ba pakileng lerato la hao pela kereke; mme o tla etsa hantle ha o ba baballa leetong la bona ka mokgwa o ka bokwang ke Modimo. ₇Hobane ba tsamaile ka baka la lebitso la wona, ba sa amohele letho ho baditjhaba. ₈Efela re tshwanetse ho amohela ba jwalo, hore re sebedisane le nnete.

₉Ke ngoletse kereke; empa Diotrefe, ya ratang ho ba wa pele wa bona, ha a re amohele. ₁₀Ka baka leo, mohla ke tlang ha heno, ke tla le hopotsa diketso tsa hae, tseo a di etsang, ha a ntse a re seba ka mantswe a lonya, mme ha a kgolwe ke hoo, empa, ere a sa amohele baena, o thibela le ba ratang ho ba amohela, a be a ba leleke kerekeng.

₁₁Moratuwa, o se ke wa etsisa bobe, o mpe o etsise botle. Ya etsang hantle o tswa ho Modima; empa ya etsang hampe ha a ka a bona Modimo.

₁₂Demetriuse o bokwa ke bohle, le ke yona nnete; le rona re a mmoka, mme le a tseba hobane poko ya rona ke ya nnete.

₁₃Ke ne ke na le ditaba tse ngata tseo nka beng ke o ngolla tsona; empa ha ke rate ho di ngola ka pene le ka enke; ₁₄empa ke tshepile hoba ke tla o bona kapele, le ho buisana le wena ka molomo.

₁₅Kgotso e be ho wena! Metswalle e a o dumedisa. Dumedisa metswalle ka mabitso a yona.