DEUTERONOMA 10

₁Mohlang oo, Jehova a re ho nna: Betla matlapa a mabedi a kang a pele, o nyolohele ho nna thabeng; hape o tla etsa areka ya difate. ₂Ke tla ngola matlapeng ao mantswe a neng a ngodilwe matlapeng a pele ao o a bolaileng, mme o tla a kenya arekeng. ₃Yaba ke etsa areka ya sefate sa leoka, ka betla matlapa a mabedi a kang a pele; ka nyolohela thabeng ke tshwere matlapa a mabedi matsohong a ka. ₄Jehova a ngola matlapeng seo a neng a se ngodile pele, mantswe a leshome ao Jehova a neng a le boleletse wona, a le thabeng, hara mollo, la letsatsi la phutheho; mme Jehova a nnea matlapa ao. ₅Ka kgutla, ka theoha thabeng, ka bea matlapa arekeng eo ke e entseng, mme a dula teng jwalokaha Jehova a ne a ntaetse.

₆[Yaba bana ba Iseraele ba tloha Beerothe-Bene-Jaakane, ba ya Mosera; ke moo Aarone a shwetseng teng, a ba a patwa teng; mme Eleasare, mora wa hae, ya eba yena moprista tulong tsa hae. ₇Ba ntoo tloha teng, ba tla Gudegoda; ha ba tloha Gudegoda, ba ya Jothbatha, e leng naha ya melapo. ₈Mohlang oo, Jehova a kgetha leloko la Levi ho jara areka ya selekane sa Jehova, le ho ema pela Jehova, le ho mo sebeletsa, le ho hlohonolofatsa setjhaba ka lebitso la hae, ho fihlela la kajeno. ₉Ke ka baka leo Levi a se nang karolo, leha e le lefa, le banababo; Jehova ke yena e leng lefa la hae, jwalokaha Jehova, Modimo wa hao, a mmoleletse.]

₁₀Haele nna, ka hlola thabeng matsatsi a mashome a mane, le masiu a mashome a mane, jwaloka mohla pele. Jehova a boela a nkutlwa le mohlang oo; mme Jehova ha a ka a rata ho o timetsa. ₁₁Yaba Jehova o re ho nna: Ema o tsamaye, o etelle setjhaba pele, hore ba kene lefatsheng leo ke anetseng bontata bona hore ke tla ba fa lona, ba le rue.

₁₂Mme jwale, Iseraele, Jehova, Modimo wa hao, o batlang ho wena, haese hore o tshabe Jehova, Modimo wa hao, o tsamaye tseleng tsa hae tsohle, o mo rate, mme o sebeletse Jehova, Modimo wa hao, ka pelo ya hao yohle, le ka moya wa hao wohle, ₁₃o boloke ditaelo tsa Jehova, le melao ya hae eo ke o laelang yona kajeno, hore o be o iketle? ₁₄Bona, mahodimo le mahodimo a mahodimo ke a Jehova, Modimo wa hao, le lona lefatshe le dintho tsohle tse ho lona. ₁₅Jehova o kgomaretse bontatao ba nnotshi hore a ba rate, mme kamora bona, o kgethile ditloholo tsa bona, ke ho re lona, hara ditjhaba tsohle, kamoo ho leng kateng le kajeno. ₁₆Ha ho le jwalo, bolotsang dipelo tsa lona, mme le se ke la hlola le satalatsa melala ya lona. ₁₇Hobane, Jehova, Modimo wa lona, ke Modimo wa medimo, le Morena wa marena, Modimo o moholo, o matla, o tshabehang, o sa tadimeng tshobotsi ya motho, o sa amoheleng dimpho, ₁₈o ahlolelang kgutsana le mosadi wa mohlolohadi, o ratang moditjhaba, o mo neang dijo le diaparo. ₁₉Le lona, ratang moditjhaba, etswe le bile baditjhaba naheng ya Egepeta. ₂₀Tshaba Jehova, Modimo wa hao, o mo sebeletse, o mo kgomarele, mme o ane ka lebitso la hae. ₂₁Ke yena e leng letlotlo la hao, ke yena e leng Modimo wa hao, o o etseditseng ntho tse kgolo tsena, tse tshabehang, tseo mahlo a hao a di boneng. ₂₂Bontatao ba ne ba theohetse Egepeta, ba le mashome a supileng, mme jwale Jehova, Modimo wa hao, o o atisitse, o bile o o entse bongata bo ka ka dinaledi tsa lehodimo.