DEUTERONOMA 17

₁O se ke wa hlabela Jehova, Modimo wa hao, kgomo, leha e le nku, e nang le sekodi kapa molato o mong; hobane hoo ke manyala ho Jehova, Modimo wa hao.

₂Ha ho fumanwa ha eno, motseng o mong wa eo Jehova, Modimo wa hao, a tla o nea yona, monna, kapa mosadi ya etsang bobe pela Jehova, Modimo wa hao, ka ho tlola selekane sa hae; ₃leha e le ya yang ho sebeletsa le ho kgumamela medimo esele, leha e ka ba letsatsi, kapa kgwedi, kapa makgotla wohle a dinaledi tsa lehodimo, e leng taba eo ke sa kang ka o laela yona; ₄ha o ka bolellwa, wa utlwa hoo, batlisisa hantle, mme ha o fumana hobane taba e boletsweng ke ya nnete, mme ho tiiswa hore manyala a itseng a entswe Iseraeleng; ₅ntsha monna eo, kapa mosadi eo, ya entseng taba eo e mpe, o mo ise dikgorong tsa hao; mme kapa e leng monna, kapa e leng mosadi, o tle o mo tlepetse ka majwe, a shwe. ₆Ya tshwanelwang ke lefu, a bolawe ka melomo ya dipaki tse pedi, kapa tse tharo; empa a se ke a bolawa ka molomo wa paki e le nngwe. ₇Matsoho a dipaki e be wona a bewang pele hodima hae ho mmolaya, e ntano ba matsoho a batho bohle. Tlosa bobe haeno jwalo.

₈Ekare ha ho hlaha taba e thata, eo o sitwang ho e ahlola mahareng a madi le madi, le mahareng a nyewe le nyewe, le mahareng a leqeba le leqeba, e leng ditaba tse tsekwang metseng ya hao, teng o tla tloha, o nyolohele nqalong eo Jehova, Modimo wa hao, a tla e kgetha; ₉o tla ya ho baprista ba Balevi, le ho moahlodi ya tla bang teng mohlang oo, o ba botse; mme ba tla o tsebisa kahlolo e loketseng. ₁₀O tla etsa ka tseo ba tla o bolella tsona nqalong e tla kgethwa ke Jehova, o hlokomele ho etsa ka tsohle tseo ba tla o ruta tsona. ₁₁O etse se bolelwang ke molao oo ba tla o ruta ka wona, le ka kahlolo eo ba tla o bolella yona; o se fapohe taba tseo ba tla o bolella tsona ka ho ya ka letsohong le letona, leha e le ho le letshehadi. ₁₂Haele motho ya etsang ka boikgohomoso, ya hanang ho utlwa moprista ya emeng hona teng ho sebeletsa Jehova, Modimo wa hao, kapa moahlodi, motho eo a shwe, mme o tlose bobe Iseraeleng. ₁₃Batho bohle ba tla utlwa, ba tshabe, mme ba ke ke ba hlola ba ikgantsha le ka mohla o le mong.

₁₄Etlare hobane o kene naheng eo Jehova, Modimo wa hao, a o neang yona, ha o se o e ruile, o ahile ho yona, leha o ka re: Ke tla ipeela morena jwaloka ditjhaba tsohle tse nteetseng hare; ₁₅o ipeele morena ya tla kgethwa ke Jehova, Modimo wa hao; motho ya tla bewa morena ke wena, e be e mong wa banabeno; o ke ke wa bea moditjhaba, e leng motho eo e seng ngwaneno. ₁₆Feela a se ke a ipokellela dipere tse ngata, mme a se ke a busetsa setjhaba Egepeta, ho bokella dipere tse ngata; hobane Jehova o le boleletse, a re: Le se ke la boela la tsamaya ka tsela eo. ₁₇Hape, a se ke a nyala basadi ba bangata, pelo ya hae e tle e se ke ya kgeloha; silefera le kgauta a se ke a ipokellela tsona haholo. ₁₈Etlare hobane a dule setulong sa borena ba hae, a ingolle buka ya molao oo, a nke ditaba bukeng e leng ho baprista ba Balevi. ₁₉Buka eo e dule ho yena, a e bale ka matsatsi wohle a ho phela ha hae, a tle a ithute ho tshaba Jehova, Modimo wa hae, le ho boloka ditaba tsohle tsa molao ona, le tsa taelo tsena, mme a etse ka tsona. ₂₀Pelo ya hae e tle e se ke ya ikgohomosetsa banababo, mme a se ke a kgeloha molao ona ho ya ka letsohong le letona, kapa ho le letshehadi, a tle a ngatafatse matsatsi a hae a puso ya hae, e le yena le bana ba hae, hara setjhaba sa Iseraele.