DEUTERONOMA 19

₁Etlare hobane Jehova, Modimo wa hao, a fedise ditjhaba tseo Jehova, Modimo wa hao, a o neang lefatshe la tsona, mme o se o ruile lefatshe la bona, mme o ahile metseng ya bona le matlung a bona, ₂o tla ikgethela metse e meraro lefatsheng leo Jehova, Modimo wa hao, a o fang lona ho le rua. ₃O tla lokisa ditsela, mme o tla arola dinaha tsa lefatshe leo Jehova o a fang lona ho le rua, o etse dikarolo tse tharo, hore mmolai e mong le e mong a balehele teng. ₄Haele mmolai ya ka balehelang teng ho boloka ho phela ha hae, ha e ke e be ya tshohileng a bolaya wa habo a sa rate, eo a neng a sa mo hloya maoba le maobane. ₅Jwaloka e mong ha a ka ya le wa habo morung ho rema difate, mme ha a otlolla letsoho la hae ho rema sefate ka selepe, tshepe ya pshemoha morianeng, mme wa habo a batwa ke yona, a shwa; motho eo a ke a balehele ho o mong wa metse eo, mme a pholohe; ₆esere mohlomong mophetetsi wa madi a phallela mmolai, ha pelo ya hae e sa le bohale, mme ha tsela e le telele, a mo tshwara, mme a mmolaya, leha a sa tshwanelwa ke lefu; athe o ne a sa hloya wa habo maobane le maoba. ₇Ke ka baka leo ke o laelang, ke re: Ikgethele metse e meraro. ₈Etlare ha Jehova, Modimo wa hao, a namisa meedi ya hao, kamoo a anetseng bontatao kateng, mme a o nea lefatshe lohle leo a le baletseng bontatao hore o tla ba fa lona; ₉ha efela wena o boloka ditaelo tsohle tseo ke o laelang tsona kajeno, o rata Jehova, Modimo wa hao, mme o tsamaya kamehla tseleng tsa hae, o tla eketsa metse eo e meraro ka metse e meng e meraro, ₁₀hore madi a se nang molato a se ke a tshollwa lefatsheng la hao, leo Jehova, Modimo wa hao, a o fang lona ho le rua, mme molato wa madi o be siyo ho wena.

₁₁Empa ekare ha e mong a hloile wa habo, a mo lalla, a mo tsohela matla, mme a mmolaya a eshwa, mme a balehela ho o mong wa metse eo, ₁₂moo, baholo ba motse wa habo ba tla romela ho mo ntsha teng, ba mo neele matsohong a mophetetsi wa madi, a tle a shwe. ₁₃Mahlo a hao a se ke a mo qenehela, o mpe o tlose Iseraeleng madi a se nang molato, o tle o be le lehlohonolo.

₁₄O se ke wa suthisa mekolokotwane ya wa heno e beilweng ke baholo ba hao, lefeng leo o tla le rua naheng eo Jehova, Modimo wa hao, a o fang yona hore o e rue.

₁₅Paki e le nngwe e ke ke ya lekana ho bea motho molato wa bokgopo, kapa wa sebe sefe le sefe, kapa wa tshito efe le efe eo a ka beng a sitilwe ka yona; empa taba e tla tiiswa ke melomo ya paki tse pedi, kapa ke melomo ya dipaki tse tharo.

₁₆Ekare ha paki ya leshano e ema ho qosa motho ka taba ya molato, ₁₇batho ba babedi ba nang le nyewe hammoho, ba tla hlaha pela Jehova, pela baprista le baahlodi ba leng teng mehleng eo; ₁₈Baahlodi ba tla batlisisa haholo, mme ha ho fumanwa hobane paki eo ke paki ya leshano e qositseng ngwanabo yona ka leshano, ₁₉moo le tla etsa ho motho eo jwalokaha a ne a hopotse ho etsa ho ngwanabo. Tlosa bobe haeno jwalo. ₂₀Ba bang ba tla utlwa hoo, ba tla tshaba, mme ba ke ke ba etsa bobe bo bokalo haeno le ka mohla o le mong. ₂₁Mahlo a hao a se ke a mo qenehela; bophelo bo lefuwe ka bophelo, leihlo ka leihlo, leino ka leino, letsoho ka letsoho, le leoto ka leoto.