DEUTERONOMA 21

₁Etlare lefatsheng leo Jehova, Modimo wa hao, a o fang lona ho le rua, ha setopo sa motho ya bolailweng, se fumanwa se rapaletse naheng, ho sa tsejwe ya mmolaileng; ₂baholo ba hao le baahlodi ba hao ba tla tswa, ba lekanye sebaka se tlohang ho motho ya bolailweng ho isa metseng e kamathokong ka nqa tsohle. ₃Ha ho tsebilwe motse o leng haufi le motho ya bolailweng, baholo ba motse oo ba tla nka kgomo ya sethole eo ho esong ho sebetswe ka yona, e esong ho hule jokong; ₄baholo ba motse oo ba tla theosetsa sethole seo molapong oo metsi a wona a mathang kamehla, moo ho sa lengweng, le moo ho sa jalweng, mme teng molapong, ba tla roba molala wa sethole seo. ₅Baprista, bara ba Levi, ba tla atamela; hobane ke bona ba kgethilweng ke Jehova, Modimo wa hao, hore ba mo sebeletse le ho hlohonolofatsa ka lebitso la Jehova, le hore dinyewe tsohle le dikotsi tsohle di ahlolwe ke melomo ya bona. ₆Baholo bohle ba motse oo o leng haufi le motho ya bolailweng, ba tla hatlela matsoho hodima sethole seo se robilweng molala molapong. ₇Ba tla bolela, ba re: matsoho a rona ha a ka a tsholla madi ana, le mahlo a rona ha a ka a bona letho. ₈Oho Jehova, o tshwarele setjhaba sa hao sa Iseraele, seo o se lopolotseng, mme o se ke wa balla setjhaba sa hao sa Iseraele madi a se nang molato. Mme ba tla leselwa molato wa madi ao. ₉Ke moo o tla tlosa madi a se nang molato haeno, ha o entse se lokileng pela Jehova.

₁₀Etlare ha o futuhela dira tsa hao, mme Jehova, Modimo wa hao, a di neela matsohong a hao, mme o kgutla o ena le bao o ba hapileng; ₁₁ha o bona hara ba hapilweng mosadi e motle, mme o mo rata, o mo nka hore e be mosadi wa hao; ₁₂o tla mo isa tlung ya hao; a beole hlooho ya hae, a pome dinala tsa hae; ₁₃a hlobole diaparo tsa hae tsa bohapuwa, mme a dule tlung ya hao, a llele ntatae le mmae ka kgwedi e le nngwe; o ntoo kena ho yena, o be monna wa hae, yena e be mosadi wa hao. ₁₄Empa mohlomong, ha o se o sa kgahliswe ke yena, o tla mo lesela, a ye moo a ratang teng; o se ke wa reka tjhelete ka yena, leha e le ho mo etsa lekgoba, hobane o mo kokobeditse.

₁₅Ekare ha motho a ena le basadi ba babedi, e mong e le ya ratwang, e mong e le ya hloilweng, mme ya ratwang le ya sa ratweng ba mo tswaletse bana, mme mora wa letsibolo e le mora wa mosadi ya hloilweng; ₁₆mohla ntata bona a abelang bana ba hae lefa la tseo a nang le tsona, a ke ke a bea mora wa ya ratilweng e moholo bakeng sa mora wa ya hloilweng, e leng yena letsibolo; ₁₇a mpe a tiise boholo ba mora wa ya hloilweng ka ho mo nea kabelo tse pedi tsa dintho tsohle tsa hae, hobane ke yena sehlooho sa bonna ba hae; tokelo ya letsibolo ke ya hae.

₁₈Etlare ha motho a ena le mora ya lonya, ya ikgantshang, ya hanang ho utlwa lentswe la ntatae le lentswe la mmae, mme leha ba ntse ba mo laya, a ntse a hana ho ba utlwa; ₁₉ntatae le mmae ba tla mo tshwara, ba mo tlise ho baholo ba motse wa habo, kgorong ya motse wa habo; ₂₀ba bolelle baholo ba motse wa habo, ba re: Mora enwa wa rona o lonya, o a ikgantsha; o hana ho utlwa lentswe la rona; ke mohlakafollela, hape ke letahwa. ₂₁Jwale batho bohle ba motse wa habo ba tla mo tlapunya ka majwe, a shwe. Tlosa bobe haeno jwalo, hore Baiseraele bohle ba utlwe, mme ba tshabe.

₂₂Etlere ha motho a entse sebe se lokelwang ke lefu, mme a bolawa, wa mo fanyeha sefateng, ₂₃setopo sa hae se se ke sa sala sefateng bosiu bohle, o mpe o se epele ka lona letsatsi leo; hobane ya fanyehilweng o rohakilwe ke Modimo, mme ha o na ho silafatsa lefatshe leo Jehova, Modimo wa hao, a o fang lona ho le rua.