Setshwantsho sa aletare ya mahlabelo le sa lebala.
1O tla etsa aletare ya sefate sa leoka; bolelele ba yona e be tswe tse hlano, bophara ba yona e be tswe tse hlano. Aletare e be le mahlakore a mane a lekanang, mme bophahamo ba yona e be tswe tse hlano. 2Dintlheng tse nne tsa aletare o tle o etse dinaka; naka tseo di tswe ho yona, mme o tle o e manehe ka koporo. 3O tla etsa dipitsana tsa yona tsa molora, le dikgarafu, le mehope, le difereko, le dipitsa tsa mashala; mesebetsi yohle ya yona o e etse ka koporo. 4O tla e etsetsa rostere ya koporo; rostereng eo o tla etsa mehwele e mene ya koporo dintlheng tse nne tsa yona; 5o e kenye tlasa moseho wa aletare, mme e fihle mahareng a aletare. 6O tla etsetsa aletare mejaro, mejaro ya sefate sa leoka, mme o e manehe ka koporo. 7Mejaro e tle e kenngwe mehweleng. Mejaro eo e tla ba mahlakoreng a aletare, mohla e jarwang. 8O tla e etsa sekoti kahare, ka dipolanka, kamoo o e bontshitsweng thabeng kateng; e ke e etswe jwalo.
9O tla etsa le lebala la tabernakele, ka nqa borwa lebala le tle le etsetswe masela a lepeletseng a line e ntle e lohilweng; a be bolelele ba tswe tse lekgolo ka lehlakoreng le leng; 10ho etswe tshiya tse mashome a mabedi le didulwana tsa tsona tsa koporo tse mashome a mabedi; dipekere tsa ditshiya le dithupa tsa tsona e be tsa silefera. 11Ho etswe jwalo le ka nqa leboya; ka boleleleng ba lebala, masela a lepeletseng a etswe bolelele ba tswe tse lekgolo, ho etswe le tshiya tsa wona tse mashome a mabedi le didulwana tsa tsona tsa koporo tse mashome a mabedi; haele dipekere tsa ditshiya le dithupa tsa tsona, e tla ba silefera. 12Haele bakeng sa bophara ba lebala, ka nqa bophirimela, ho bewe masela a lepeletseng a ditswe tse mashome a mahlano, le tshiya tsa wona tse leshome, le didulwana tsa tsona tse leshome. 13Haele bakeng sa bophara ba lebala, ka nqa botjhabela, ho lekanngwe ditswe tse mashome a mahlano; 14ho etswe masela a lepeletseng a ditswe tse leshome le metso e mehlano ka lehlakoreng le leng; 15mme ka lehlakoreng le leng, ho be masela a lepeletseng a ditswe tse leshome le metso e mehlano, le tshiya tsa wona tse tharo, le didulwana tsa tsona tse tharo. 16Haele monyako wa lebala, ho etswe lesela la wona le ditswe tse mashome a mabedi la purepera le sekarelata le krimsone le lene e ntle e lohilweng, e be lesela le homilweng; ho etswe le ditshiya tsa lona tse nne, le didulwana tsa tsona tse nne. 17Ditshiya tsohle tse kopileng lebala di tla ballwa ka dithupa tsa silefera; dipekere tsa tsona e be tsa silefera, didulwana tsa tsona e be tsa koporo. 18Bolelele ba lebala e be tswe tse lekgolo, bophara ba lona e be tse mashome a mahlano kahohle, mme bophahamo ba lona e be tswe tse hlano. Masela a lona a tla etswa ka lene e ntle e lohilweng; didulwana tsona e be tsa koporo. 19Haele dintho tsohle tsa tabernakele, le tsa tshebeletso yohle ya yona, le dithakgisa tsohle tsa yona, le dithakgisa tsohle tsa lebala, e be tsa koporo.
20O tla laela bana ba Iseraele hore ba o tlisetse ole e hlwekileng ya ditholwana tsa mohlwaare tse tutsweng, e tle e be ya ho bonesa, hore lampi e tuke kamehla. 21Aarone le bara ba hae ba tla e qhatsa ka tenteng ya pokano, kantle ho lesira le pela bopaki, hore e bonese ho tloha mantsiboya ho isa hosasa, pela Jehova. Hoo e tla ba taelo e sa feleng ho bana ba Iseraele melokong ya bona.
