EKSODA 39

₁Ka purepera, le sekarelata, le krimsone, ha etswa diaparo tsa tshebetso e phethwang sehalalelong; ha etswa diaparo tse kgethehileng tsa Aarone, jwalokaha Jehova a ne a laetse Moshe.

₂Efoda ya etswa ka kgauta, le purepera, le sekarelata, le krimsone, le lene e ntle e lohilweng. ₃Ha otlollwa maleme a kgauta, a sehwa ho etsa dikgole tsa ho lohanngwa le purepera, le sekarelata, le krimsone, le lene e ntle e lohilweng, ka mokgwa wa mosebetsi o etswang ka masene. ₄Efoda ya etsetswa mabanta a ho kopanya, ya kopanngwa dintlheng tse pedi tsa yona. ₅Haele senyepa sa ho e tlama, se hodima efoda, se ne se etswa ho yona, e le mosebetsi o le mong le yona, e le sa kgauta, le purepera, le sekarelata, le krimsone, le lene e ntle e lohilweng, jwalokaha Jehova a ne a laetse Moshe. ₆Ha sebetswa mahakwe a onikse, a kenngwa dikoomaneng tsa kgauta; a ngolwa ka mokgwa wa tiiso ya mangolo, a ngolwa mabitso a bana ba Iseraele; ₇a bewa mabanteng a efoda, e le mahakwe a kgopotso ho bana ba Iseraele; jwalokaha Jehova a ne a laetse Moshe.

₈Mokgajwana wona wa etswa ka mokgwa oa mosebetsi o etswang ka masene, le ka mokgwa o le mong le efoda; wa etswa ka kgauta, le purepera, le sekarelata, le krimsone, le lene e ntle e lohilweng; ₉o ne o na le mahlakore a mane. Mokgajwana wa etswa o mennwe; o ne o le bolelele ba boahlamo ba menwana, le bophara ba wona e ne e le ba boahlamo ba menwana; o ne o mennwe. ₁₀Wa etsetswa melana e mene ya mahakwe: molaneng o mong ha bewa rubise, le topase, le emeralde; ke wona mola wa pele; ₁₁molaneng wa bobedi ha bewa karabunkle, le safire, le daemane; ₁₂molaneng wa boraro, ha bewa hiasinthe, le agate, le amethiste; ₁₃molaneng a bone, ha bewa krisolite, le onikse, le jaspe. Mahakwe ana a ne a dikadikeditswe ka kgauta dikoomeneng tsa wona. ₁₄Mahakwe a ne a dutse ka ho ya ka lenaneo la mabitso a bana ba Iseraele a leshome le metso e mmedi, e leng mabitso a leshome le metso e mmedi a meloko e leshome le metso e mmedi, le leng le le leng ha ngolwa lebitso la lona, ka mokgwa wa tiiso. ₁₅Mokgajwaneng ha etswa maqakatsa a lohilweng, ka mokgwa wa mosebetsi o tshopilweng, a kgauta e hlwekileng. ₁₆Ha etswa dikotjana tse pedi tsa kgauta le mehwele e mmedi ya kgauta; mehwele e mmedi ya bewa dintlheng tsa mokgajwana. ₁₇Ha bewa maqakatsa a mabedi a kgauta mehweleng e mmedi, dintlheng tsa mokgajwana; ₁₈dintlha tse ding tse pedi tsa maqakatsa a mabedi tsa kenngwa dikotjaneng tse pedi; tsa bewa mabanteng a efoda, kapele ho wona. ₁₉Hape, ha etswa mehwele e mmedi ya kgauta, ya bewa dintlheng tse pedi tsa mokgajwana, mophethong o bapileng le efoda, kahare. ₂₀Ha ha etswa mehwele e meng e mmedi ya kgauta ya bewa mabanteng a mabedi a efoda, katlase, kantle ho yona, haufiufi le moo e rokahantsweng teng, kahodima senyepa sa efoda. ₂₁Mokgajwana wa hokelwa ka mehwele ya wona mehweleng ya efoda ka kgole ya purepera, o tle o eme hodima senyepa sa efoda, le hore makgajwana o se ke wa sutha efodeng, jwalokaha Jehova a ne a laetse Moshe.

₂₂Kobo ya efoda yona ya lohuwa, ya etswa ka purepera kaofela ha yona; ₂₃lesoba la kobo le hare ho yona le ne le le jwaloka lesoba la seaparo sa bahlabani; mmenong wa lesoba ho ne ho ena le moqhaka o tshophilweng o potang kahohle, hore kobo e tle e se ke ya taboha. ₂₄Melekeng ya kobo, ha etswa mohomo wa digaranata tsa purepera, le sekarelata, le krimsone, e lohilweng. ₂₅Ha etswa le dikolokonyana tsa kgauta e hlwekileng; dikolokonyana tsena tsa bewa dipakeng tsa digaranata, melekeng ya kobo, ho e potoloha dipakeng tsa digaranata; ₂₆ha bewa kolokonyana le garanata, hape kolokonyana le garanata, melekeng ya kobo ka nqa tsohle, tsa ho etsa tshebetso, jwalokaha Jehova a ne a laetse Moshe.

₂₇Yaba ho etswa dikojwana tsa lene e ntle, tse lohilweng, e le tsa Aarone le bara ba hae; ₂₈ha etswa le moqhwele wa lene e ntle, le dikatiba tsa kgabiso tsa lene e ntle, le marikgwana a lene e ntle e lohilweng; ₂₉le senyepa sa lene e ntle e lohilweng le purepera, le sekarelata, le krimsone, ka mokgwa wa mesebetsi e homilweng, jwalokaha Jehova a ne a laetse Moshe.

₃₀Hape, ha etswa lebenyane la kgauta e hlwekileng la moqhwele o kgethehileng; ha ngolwa ho lona lengolo la tiiso le reng: Kgalalelo ho Jehova; ₃₁la hokelwa ka kgole ya purepera, hore le bewe moqhweleng, kahodima wona, jwalokaha Jehova a ne a laetse Moshe.

₃₂Tsohle tsa tshebetso ya tabernakele, e leng tente ya pokano, tsa phethwa jwalo, mme bana ba Iseraele ba etsa ka tsohle tseo Jehova a di laetseng Moshe; ba etsa jwalo.

₃₃Yaba Moshe o tlisetswa tabernakele, le tente le mesebetsi yohle ya yona, le dikgoketsane tsa yona, le dipolanka tsa yona, le maballo a yona, le ditshiya tsa yona, le didulwana tsa yona; ₃₄le sekgurumetso sa matlalo a dipheleu a tlotsitsweng ka bofubedu, le sekgurumetso sa matlalo a diqibi, le lesira le homilweng le kgaolang; ₃₅le areka ya bopaki le mejaro ya yona, le sekwahelo, ₃₆le tafole, le mesebetsi yohle ya yona, le mahobe a pontsha; ₃₇le kandelare ya kgauta e hlwekileng ka dilampi tsa yona, e leng dilampi tse lokiseditsweng yona, le mesebetsi yohle ya yona le ole ya ho bonesa; ₃₈le aletare ya kgauta, le ole ya setlolo le dibano tse monko o monate, le lesela le homilweng la monyako wa tente; ₃₉le aletare ya koporo le rostere ya koporo ya yona, le mejaro ya yona le mesebetsi yohle ya yona; le morifi le sedulwana sa wona; ₄₀le masela a lepeletseng a lebala, le ditshiya tsa lona, le didulwana tsa lona, le lesela le homilweng la monyako wa lebala, le mehala ya lona, le dithakgisa tsa lona, le mesebetsi yohle ya tshebetso ya tabernakele, le ya tente ya pokano. ₄₁Ha tliswa le diaparo tsa tshebetso tsa ho sebetsa sehalalelong, e leng diaparo tse kgethehileng tsa Aarone moprista, le diaparo tsa bara ba hae tsa ho etsa mosebetsi wa boprista.

₄₂Bana ba Iseraele ba hla be etsa mosebetsi wohle kamoo Jehova a neng a laetse Moshe kateng. ₄₃Moshe a tadima mosebetsi wohle, mme a fihlela ba o entse jwalokaha Jehova a ne a laetse; ba o etsa jwalo. Yaba Moshe o a ba hlohonolofatsa.