EKSODA 40

₁Yaba Jehova o bolella Moshe, a re: ₂Ka tsatsi la ho qala la kgwedi ya pele, o tle o hlome tabernakele ya tente ya pokano. ₃O tle o kenye ho yona areka ya bopaki, o sireletse areka ka lesira. ₄O ntoo tlisa tafole, o e lokisetse tsa yona; o ntoo tlisa kandelare, o lokise dilampi tsa yona. ₅Aletare ya kgauta ya dibano, o tla e bea pela areka ya bopaki, o bee lesela le homilweng monyakong wa tabernakele. ₆Aletare ya ditjheso yona o tla e bea pela monyako wa tabernakele ya tente ya pokano. ₇Hape, o bee morifi pela tente ya pokano le aletare, mme o o tshele metsi. ₈Lebala lona o tla le bea ka mathoko, o bee lesela le homilweng monyako wa lebala. ₉O tla nka ole ya setlolo, mme ka yona o tlotse tabernakele le tsohle tse ho yona; ka ho etsa jwalo, o tla e kgetha le yona mesebetsi yohle ya yona, mme e tla kgetheha. ₁₀Hape, o tlotse aletare ya ditjheso le mesebetsi yohle ya yona, mme o kgethe aletare; aletare e tla ba ntho e halalelang haholo. ₁₁O tlotse le morifi le sedulwana sa oona, o o kgethe. ₁₂O ntoo atametsa Aarone le bara ba hae monyako wa tente ya pokano, o ba hlatswe ka metsi. ₁₃O be o apese Aarone ka diaparo tse kgethehileng, o mo tlotse, o mo kgethe, hore a tle a etse mosebetsi wa boprista pela ka. ₁₄O atametse le bara ba hae, o ba apese dikojwana, ₁₅o ba tlotse, jwalokaha o tlotsitse ntata bona, hore ba etse mosebetsi wa boprista pela ka; mme tlolo ya bona ho bona e tla ba boprista ba kamehla, melokong ya bona.

₁₆Moshe a etsa jwalo; a etsa tsohle kamoo Jehova a mo laetseng kateng. ₁₇Ka kgwedi ya ho qala ya selemo sa bobedi, ka tsatsi la pele la kgwedi, tabernakele ya hlongwa. ₁₈Moshe a hloma tabernakele, a bea didulwana, a bea le dipolanka, a bea le maballo, a emisa ditshiya. ₁₉Hape, a ala tente hodima tabernakele, mme hodima yona a bea sekgurumetso sa tente, jwalokaha Jehova a ne a laetse Moshe. ₂₀Jwale, a nka bopaki, a bo kenya arekeng; a kenya mejaro arekeng; a ntoo bea sekwahelo hodima areka. ₂₁Yaba o tlisa areka tabernakeleng, a fanyeha lesira le homilweng le kgaolang, a sireletsa jwalo areka ya bopaki, jwalokaha Jehova a ne a laetse Moshe. ₂₂Yaba o isa tafole tenteng ya pokano, lehlakoreng la tabernakele le leng ka nqa leboya, kantle ho lesira, ₂₃a lokisa mahobe pela Jehova, jwalokaha Jehova a ne a laetse Moshe. ₂₄Kandelare yona a e bea tenteng ya pokano, mabapa le tafole, lehlakoreng la tabernakele le leng ka nqa borwa; ₂₅a lokisa dilampi pela Jehova, jwalokaha Jehova a ne a laetse Moshe. ₂₆A ntoo isa aletare ya kgauta tenteng ya pokano, pela lesira; ₂₇teng a tjhesetsa dibano tse monko o monate, jwalokaha Jehova a ne a laetse Moshe. ₂₈Lesela le homilweng lona a le fanyeha monyakong wa tabernakele. ₂₉Aletare ya ditjheso yona a e bea monyakong wa tabernakele ya tente ya pokano, a hlahisa teng mahlabelo a ditjheso le nyehelo, jwalokaha Jehova a ne a laetse Moshe. ₃₀Yaba o bea morifi pakeng tsa tente ya pokano le aletare, a o tshela metsi hore ho tle ho itlhatsuwe teng. ₃₁Moshe, le Aarone, le bara ba hae ba itlhatswa matsoho le maoto; ₃₂enere ha ba kena tenteng ya pokano, leha ba atamela pela aletare, ba ne ba itlhatswa, jwalokaha Jehova a laetse Moshe. ₃₃Hape, a hloma lebala le potang tabernakele le aletare; a fanyeha lesela le homilweng monyako wa lebala; kahoo, Moshe a phetha mosebetsi.

₃₄Yaba leru le kgurumetsa tente ya pokano, mme khanya ya Jehova ya tlala tabernakele. ₃₅Esita le Moshe a sitwa ho kena tenteng ya pokano, hobane leru le ne le dutse hodima yona, le kganya ya Jehova e ne e tletse tabernakeleng.

₃₆Enere ha leru le phahama hodima tabernakele, bana ba Iseraele ba ne ba tloha; ha eba jwalo ho tsamayeng hohle ha bona. ₃₇Empa ha leru le ne le sa phahame, ba ne ba sa tlohe, ho fihlela letsatsi leo le phahamang ka lona. ₃₈Hobane leru la Jehova le ne le le tabernakeleng motshehare, bosiu e be mollo, pontsheng ya ba ntlo yohle ya Iseraele, ho tsamayeng hohle ha bona.