BAHEBERU 8

₁Jwale, sehlooho sa ditaba tseo re di boletseng, ke hoba re na le moprista e moholo hakalo, ya dutseng letsohong le letona ho terone ya Boholo mahodimong; ₂eo e leng mosebeletsi wa sehalalelo, le wa tabernakele ya sebele e hlomilweng ke Morena, e seng ke motho.

₃Hobane moprista e moholo e mong le e mong o ye a bewe ho hlahisetsa Modimo dinyehelo le mahlabelo; ka baka leo, e ka kgona eo le yena a be le seo a se hlahisang. ₄Hojane a le lefatsheng, o ne a ya hloka tokelo ya ho ba moprista, kahobane baprista ba teng ba hlahisang dinyehelo ka molao; ₅ba sebetsang ka tse tshwantshang dintho tsa lehodimo le diriti tsa tsona, kamoo Modimo o neng o laetse Moshe kateng, ha a tla etsa tabernakele, wa re: Lemoha hantle, o etse ntho tsohle ka tekanyetso ya tseo o di bontshitsweng. ₆Empa moprista e moholo wa rona o filwe tshebeletso e fetisang, kahobane e le mmuelli wa selekane se fetisang, se hlabilweng ka dipallo tse fetisang le tsona.

₇Hobane hoja sa pele ha se a ka sa hloka letho, sebaka sa ho batla sa bobedi se ka be se bile siyo. ₈Athe ke ka nyatso Modimo o itseng ho Bajuda: Bonang, nako e sa tla eo ke tla etsa selekane se setjha le ntlo ya Iseraele le ntlo ya Juda: ho itswalo ke Morena; ₉e seng jwaloka selekane seo ke neng ke se etse le bontata bona, mohla ke ba tshwereng ka letsoho, ka ba ka ba ntsha naheng ya Egepeta; hobane ha ba ka ba tiisetsa selekaneng sa ka, mme ke ba lahlile ke hona, ho itswalo ke Morena. ₁₀Haele selekane seo ke tla se hlaba le ntlo ya Iseraele kamora ditshiu tseo, ke sona sena, ho bolela Morena: Ke tla kenya melao ya ka kelellong tsa bona, ke e ngole dipelong tsa bona; mme ke tla ba Modimo wa bona, le bona e tla ba setjhaba sa ka. ₁₁Mme ha ho ka ke ha hlola ho eba ya rutang ya ahisaneng le yena, kapa ngwanabo, ka ho re: Tseba Morena! Hobane ba tla ntseba bohle, ho qala ka e monyenyane ho qetella ka e moholo. ₁₂Hobane ke tla ba rekolohela makgopong a bona, mme nke ke ka hlola ke sa hopola dibe tsa bona le ditlolo tsa bona. ₁₃Jwale, ha a bolela selekane se setjha, sa pele o se etsa ntho e tsofetseng, mme ntho e tsofetseng, ya mokgulela, e se e ya timela.