HOSEA 11

₁Iseraele ha a sa le motjha, ke mo ratile; ke bitsitse mora wa ka Egepeta. ₂Ere ha baporofeta ba ba bitsa, ebe moo ba ba furallang; ba hlabela boBaale, ba tjhesetsa ditshwantsho dibano. ₃Athe nna, ke rutile Efraime ho tsamaya, ke ntse ke mo tshwere ka matsoho, empa ha ba ka ba lemoha ha ke ba fodisa. ₄Ke ne ke ba hule ka kgwele tsa batho, ka kgwele tsa lerato, ke le jwaloka ya lokollang joko melaleng ya bona, ke ne ke ba atamele ka mosa ho ba fepa.

₅Efraime a ke ke a kgutlela Egepeta, o tla buswa ke Assiria; hobane ba hanne ho kgutlela ho nna. ₆Lerumo le tla senya metseng ya hae, le fedise mekwallo ya hae, le ba qete ka baka la merero ya bona. ₇Setjhaba sa ka se tiiseditse ho nkwenehela; leha ba biletswa hodimo, ha ho le a mong ya emisetsang pelo ya hae teng.

₈Oho! nka o lahla jwang, Efraime? Iseraele, nka o tela jwang? Nka o lahla jwang jwaloka Adma? Nka o etsa jwang jwaloka Tseboime? Pelo ya ka e fetoha ka ho nna, mehauhelo ya ka yohle e tsohile. ₉Nke ke ka etsa ka ho tuka ha bohale ba ka, nke ke ka boela ka timetsa Efraime, hobane nna ke Modimo, ha ke motho, ke nna ya halalelang mahareng a hao; nke ke ka tla ka bohale.

₁₀Ba tla latela Jehova. Jwaloka tau, o tla puruma, e, yena o tla puruma, mme bana ba hae ba tla itlhahanela ho yena, ba etswa bophirimela. ₁₁Ba tla itlhahanela jwaloka nonyana, ba etswa Egepeta, le jwaloka leeba, ba etswa lefatsheng la Assiria; mme ke tla ba ahisa matlung a bona, ho bolela Jehova. ₁₂Efraime o nteela hare ka leshano, le ntlo ya Iseraele ka bohata, mme haele Juda, o sa ntse a kwetjha, o hana ho utlwa Modimo, Mohalaledi ya tshepehang.