JOBO 13

₁Bona, le wona mahlo a ka a bone taba tseo kaofela, tsebe tsa ka di di utlwile, mme di di etse hloko. ₂Seo le se tsebang ke a se tseba le nna, ha ke monyenyane ho lona.

₃Empa nka rata ho bua le Ya matla wohle, nka lakatsa ho kena tsekong le Modimo; ₄hobane lona, le balohi ba mashano, kaofela ha lona le dingaka tse se nang molemo. ₅Hoja la na la kgutsa, ho bo ho tla thwe: le bohlale. ₆Mamelang hle phetolo ya ka, molomong wa ka le utlwe ditaba tseo ke ikemelang ka tsona. ₇Na le rata ho bua leshano bakeng sa Modimo na? Na le ka bua tse thetsang sebakeng sa wona na? ₈Na le o emela feela na? Kapa le rata ho ipea babuelli ba Modimo na? ₉Na le ka rata hore o le botsisise hohle na? Kapa le ka o thetsa jwalokaha ho thetswa batho na? ₁₀Kannete, o tla le kgalemela, ha le ka ahlola ka tshobotsi sephiring sa lona. ₁₁Boholo ba wona bo tla le tshosa, letsoso la wona le le tshware. ₁₂Mantswe a eletsang a lona ke dithole feela. Qhobosheane tsa lona ke diqhobosheane tsa mobu.

₁₃Kgutsang, le ntese ke bue; nke ke hlahelwe ke seo nka hlahelwang ke sona. ₁₄Ke thusang, leha nka tshwara nama ya ka ka meno a ka, ka fuparela moya wa ka letsohong la ka? ₁₅Bonang, o ka mpolaya, ha ho sa le kamoo nka tshepang kateng. Ke mpa ke rata ho hlahisa mekgwa ya ka pela wona; ₁₆ke hona ho tla ba poloko ho nna; hobane moikaketsi a ke ke a itlhahisa pela wona. ₁₇Elang hloko, le mamele polelo tsa ka, mme ditaba tsa ka di kene ditsebeng tsa lona. ₁₈Bonang, ke hlomahantse taba ya ka, ke tseba hobane ke tla bewa ya lokileng. ₁₉O kae ya ratang ho tsekisana le nna? Ha ho se jwalo nka kgutsa, ka shwa.

₂₀Feela, o ntshitse ka ntho tse pedi, etlaba ke moo nke keng ka pata sefahleho sa ka pela hao. ₂₁O honyetse letsoho la hao hole le nna, mme o se ke wa ntshosa ka letsoso la hao. ₂₂O bitse, mme ke tla araba, kapa ho bue nna, mme wena o nkarabe.

₂₃Makgopo a ka le dibe tsa ka di kae na? O ntsebise tshito ya ka le molato wa ka. ₂₄O patelang sefahleho sa hao? O ntadimelang jwaloka eka ke sera ho wena? ₂₅Na o rata ho roba lehlaku le fefolwang, leha e le ho phallela mooko o omeletseng na? ₂₆Ke kang ha o mpeetse ntho tse babang, leha o nkotlela makgopo a botjha ba ka? ₂₇Ho ya kang ha o tshwasitse maoto a ka ka difate, leha e le ho hlwela dika tsa ka kaofela le ho dikadiketsa bohato ba maoto a ka; ₂₈athe ke pherehlana jwaloka ntho e jelweng ke diboko, jwaloka kobo e jewang ke tshwele?