JOBO 33

₁Empa wena, Jobo, mamela dipolelo tsa ka, o sekehele mantswe a ka kaofela tsebe! ₂Bona, ke se ke ahlamisitse molomo wa ka, leleme la ka le se le bua mahalapeng a ka. ₃Taba tsa ka di tla bapa le nnete ya pelo ya ka, melomo ya ka e bolele mehopolo ya ka e hlwekileng. ₄Moya wa Modimo o nkentse, pudulo ya Ya matla wohle e a mphedisa. ₅Ha o ena le matla, o nkarabe, o emele nyewe ya hao, o itokise. ₆Bona, ke ntse ke tshwana le wena pela Modimo; le nna ke bopilwe ka letsopa. ₇Ha ho le jwalo, o se ke wa tshoswa ke letsoso la ka, matla a ka a se ke a o imela!

₈Tjhe, o se o boletse ditsebeng tsa ka, ke utlwile modumo wa mantswe a hao, wa re: ₉Ke hlwekile, ha ho sebe ho nna; ha ke na molato, ha ho bokgopo ho nna; ₁₀bonang, Modimo o batla sebaka sa ho nqala, o ntadimile jwaloka hoja ke le sera ho wona; ₁₁o tshwasitse maoto a ka, o hlwela mehato ya ka kaofela. ₁₂Bona, karabo ya ka ke yona ena: O fositse tabeng tseo; hobane Modimo o moholo ho ena le motho. ₁₃O o tsekisa keng ka ho re, ha o ikarabele diketsong tsohle tsa wona?

₁₄Leha ho le jwalo, Modimo o bua ka mokgwa o mong, o ntoo bua ka o mong hape, empa ha ho lemohe motho. ₁₅O bua ka ditoro, ka dipono tsa bosiu, ha batho ba tshwerwe ke boroko, mme ba robetse diphateng tsa bona. ₁₆Ke moo o itshenolang ho batho, o tiisang thuto eo o ba rutang yona; ₁₇hore o tle o ntshe motho ketsong tse mpe tsa hae, o mo sesefise boikgantsho; ₁₈hore o pholose moya wa hae lebitleng, o mo phemise lerumo le bohale. ₁₉Bohloko le bona bo tla ho mo laya diphateng tsa hae, ha a utlwa masapo a hae a opa ho sa kgutse; ₂₀ha mahalapa a hae a tenwa ke bohobe, a se a sa lakatse dijo tse hlabosang; ₂₁ha dinama tsa hae di fela, ho senyeha botle ba hae, mme ho bonwa masapo feela a hlobodisitsweng; ₂₂ha moya wa hae o se o atametse lebitla, mme bophelo ba hae bo se bo tla kgaolwa. ₂₃Jwale ha ho ka tla ho yena lengeloi le mo hlalosetsang ditaba, le tswang makgotleng a lehodimo, la mo kenya tseleng e lokileng, ₂₄eba Modimo o a mo hauhela, mme o re ho lona: Mo namole, a tle a se ke a theohela lebitleng, ke bone se ka mo lopollang. ₂₅Ke ha nama ya hae e se e ntjhafala ho fetisa bonyenyaneng ba hae; o kgutlela matsatsing a botjha ba hae. ₂₆Ha a rapela Modimo, o tla mo etsetsa mohau, mme o tla bona sefahleho sa wona ka thabo, a buseletswe ho loka ha hae. ₂₇O bina pela batho, o re: Ke na be ke sitilwe, ka kgopamisa ho loka; empa ha ke a ka ka otlelwa ho tlola ha ka; ₂₈o lopolotse moya wa ka hore ke se theohele lebitleng; bophelo ba ka bo ntse bo thabetse lesedi. ₂₉Bona, Modimo o etsa tseo tsohle habedi, hararo, ho motho, ₃₀ho kgutlisa moya wa motho lebitleng, hore a tle a bonesetswe ke lesedi la bophelo.

₃₁Mamela, Jobo, o be o nkutlwe! o thole, mme ke tla bolela! ₃₂Ha o ena le pelaelo, o nkarabe; bua, hobane ke rata ho o lokafatsa! ₃₃Ha ho se jwalo, o mmamele: Thola, mme ke tla o ruta bohlale.