JOBO 41

₁Na o ka tshwasa Leviathane (kwena) ka selope le ho tshwasa leleme la yona ka kgole na? ₂O ka kenya mohala dinkong tsa yona, le ho e phunya lehlaya ho kenya lesale na? ₃Na e tla o rapela haholo, kapa e bue le wena ka lentswe la ho o qeka na? ₄Na e tla itlama ho wena hore e tla o sebeletsa kamehla na? ₅Na o tla ya bapala le yona jwalokaha o ka etsa le nonyana, o e holehe ho bapadisa banana ba hao na? ₆Na e balwa kgwebong ke batshwasi ba dihlapi, kapa na ba ka e arolela bareki na? ₇Na o ka hlaba letlalo la yona ka dikwebe, le hlooho ya yona ka ditsenene? ₈Leka hle ho bea letsoho la hao hodima yona! ha o sa tla hlola o e qala. ₉Ha ho kamoo o ka tshepang kateng ho e hlola; ere o qala ho e bona, o ya fela pelo. ₁₀Ha ho mohale ya ka betang pelo ho ya e tsosa. Ha ho le jwalo, ke mang ya ka emang pela ka na? ₁₁Ke mang eo ke nang le molato wa hae, ke tle ke tshwanele ho mo lefela? Tsohle tse katlasa lehodimo kaofela ke tsa ka.

₁₂Nke ke ka kgutsa kamoo ditho tsa yona di bopehileng kateng, le matla a yona, le botle ba sebopeho sa yona. ₁₃Ke mang ya ka karapang makgapetla a yona? Ke mang ya ka kenang hara mehlahare ya yona? ₁₄Ke mang ya ka bulang menyako ya ditlena tsa yona? Mela ya meno a yona e a tshabeha. ₁₅Mokokotlo wa yona o apesitswe ka thebe ya dikgetla tse tiisitsweng hammoho. ₁₆Di kopane hammoho, esita le moya o ke ke wa kena dipakeng tsa tsona; ₁₇di kgomarelane, di momahane, di ke se ke tsa arolwa. ₁₈Ho ethimola ha yona ho hlahisa ngata ya lesedi, mahlo a yona a jwaloka dintshi tsa mafube. ₁₉Dirumula di tswa molomong wa yona, le dihlase tsa mollo tse kubellang. ₂₀Mosi o tswa dinkong tsa yona jwaloka sesi se tswang nkgong le pitseng e belang. ₂₁Pudulo ya yona e tshwana le mashala a hlenneng, malakabe a tswa ditleneng tsa yona. ₂₂Matla a ikgaheletse molaleng wa yona, tshoho e tsamaya pela yona. ₂₃Mesifa ya yona e kopane hammoho, e tiile, ha e sisinyehe. ₂₄Pelo ya yona e thata jwaloka lejwe, jwaloka letlapa la lelwala. ₂₅Ha e ka tsoha, bahale ba tshoha, mme ba thethelwa ke ho tshaba. ₂₆Ha o ka e hlatha, tjhaka ha e kene; ha e re letho ka tsenene le lerumo le kwebe. ₂₇Ho yona tshepe e jwaloka jwang, le koporo jwaloka patsi e bodileng. ₂₈Motsu o phoswang ha o e balehise, majwe a betswang ka letjeketjane a jwaloka mooko ho yona. ₂₉Melamu ho yona e ka mahlokwa feela; e tsheha modumo wa marumo. ₃₀Mpa ya yona e mangeta a thata; e ka selei se hulwang seretseng. ₃₁E tsapodisa bodiba jwaloka pitsa e belang, e bedisa lewatle jwaloka pitsa ya dihlare. ₃₂Tsela ya yona e benya mehlaleng ya yona, ho le jwaloka hoja lewatle e le moriri o moputswa. ₃₃Ha ho letho le lekanang le yona lefatsheng, e entswe e le e hlokang tshabo. ₃₄Ha e tshabe ho tadima tsa phahameng kaofela, ke morena wa dibatana kaofela.