Majwe a leshome le metso e mmedi.
1Setjhaba kaofela hobane se qetelle ho tshela Jordane, Jehova a bolella Joshua, a re: 2Ikgetheleng hara setjhaba banna ba leshome le metso e mmedi, monna a le mong lelokong le leng le le leng; 3le ba laele, le re: Itholleng mona, kahare ho Jordane, moo maoto a baprista a neng a eme teng a sataletse, majwe a leshome le metso e mmedi; le ye le wona, mme le a bee moo le tla emisa ka bosiu bona. 4Yaba Joshua o bitsa banna ba leshome le metso e mmedi, bao a ba kgethileng hara bana ba Iseraele, monna a le mong lelokong le leng le le leng. 5Joshua a re ho bona: Etellang areka ya Jehova, Modimo wa lona, pele kahare ho Jordane, mme monna e mong le e mong a nke lejwe teng, a le jare lehetleng, ka palo ya meloko ya bana ba Iseraele; 6e tle e be pontsho ho lona, hore, ha bana ba lona ba ka le botsa mehleng e tlang, ba re: Majwe aa a reng ho lona? 7le no re ho bona: Ke hobane metsi a Jordane a ne a kgaolwe pela areka ya selekane sa Jehova; mohla e tshelang Jordane, metsi a Jordane a kgaolwa; mme majwe ana ke kgopotso ya kamehlamehla ho bana ba Iseraele.
8Bana ba Iseraele ba etsa jwalokaha Joshua a ba laetse, ba thola majwe a leshome le metso e mmedi kahare ho Jordane, jwalokaha Jehova a ne a boleletse Joshua, ka palo ya meloko ya bana ba Iseraele, ba ya le wona moo ba tla emisa teng, ba a bea hona teng. 9Hape, Joshua a hloma majwe a leshome le metso e mmedi kahare ho Jordane, hona moo maoto a baprista ba jereng areka ya selekane a neng a eme teng; a sa le teng le kajeno. 10Baprista ba jereng areka ba ema kahare ho Jordane, ho fihlela ha ho phethehile tsohle tseo Jehova a neng a di laetse Joshua hore a di bolelle setjhaba, kahohle kamoo Moshe a neng a laetse Joshua kateng. Setjhaba sa akofa, sa tshela. 11Setjhaba ha se qetile ho tshela, areka ya Jehova le yona ya tshela, le bona baprista ba tshela pela setjhaba.
12Bana ba Rubene, le bana ba Gade, le ba mothapo o mong wa leloko la Manasse, ba tshela ba etella bana ba Iseraele pele ba hlometse, jwalokaha Moshe a ne a ba boleletse. 13Ya batla ho ba banna ba kete tse mashome a mane ba hlometseng, ba loketseng ntwa, ba feta pela Jehova, ba kena mahwatateng a Jeriko. 14Tsatsing lona leo, Jehova a hodisa Joshua pepeneneng ho Baiseraele bohle; ba mo tshaba ke hona ka tshiu tsohle tsa ho phela ha hae, jwalokaha ba ne ba tshabile Moshe.
15Yaba Jehova o bolella Joshua, a re: 16Laela baprista ba jereng areka ya bopaki. hore ba tswe hara Jordane. 17Joshua a laela baprista, a re: Tswang hara Jordane. 18Baprista ba jereng areka ya selekane sa Jehova, ha ba etswa hara Jordane, mme bohato ba maoto a baprista ha bo hata mobu o omileng, metsi a Jordane a boela tulong tsa wona, mme a nna a matha a tlotse mabopo wohle a wona, jwaloka maoba le maobane.
19Ke oo mokgwa oo setjhaba se tswileng hara Jordane ka letsatsi la leshome la kgwedi ya pele, mme ba emisa Gilgale, ka nqa botjhabela ho Jeriko.
20Majwe a leshome le metso e mmedi ao ba neng ba a nkile Jordane, Joshua a a hloma Gilgale. 21A bolella bana ba Iseraele, a re: Etlare ha bana ba lona ba botsa bontata bona mehleng e tlang, ba re: Majwe ana a reng? 22le tla ruta bana ba lona, le re: Baiseraele ba ne ke ba tshela Jordane ena ba hatile mobu o omileng; 23hobane Jehova, Modimo wa lona, o ne a pshese metsi a Jordane pela lona, la ba la tshela, jwalokaha Jehova, Modimo wa lona, a ne a etse Lewatleng le Lefubedu, leo a le pshesitseng pela rona, ra ba ra tshela. 24E le hore tjhaba tsohle tsa lefatshe di tle di tsebe letsoho la Jehova hobane le matla, le hore le tshabe Jehova, Modimo wa lona, kamehla.
