LEVITIKE 9

₁Ka letsatsi la boroba meno e le mmedi, Moshe a bitsa Aarone, le bara ba hae, le baholo ba Iseraele, a re ho Aarone: ₂Nka pohwana e be sehlabelo sa sebe, le pheleu ya setjheso, di hloka sekodi tse pedi, mme o di hlabe pela Jehova. ₃O tla bolella bana ba Iseraele, o re: Nkang phooko ya sehlabelo sa sebe; le nke le namane le konyana tsa setjheso, e be tse lemo se le seng, tse hlokang sekodi; ₄le nke le kgomo le pheleu tsa sehlabelo sa teboho, tse tla hlajwa pela Jehova; le nke le nyehelo e dubilweng ka ole; hobane kajeno, Jehova o tla iponahatsa ho lona.

₅Yaba ba tlisa monyako wa tente ya pokano tseo Moshe a di laetseng; phutheho kaofela ya atamela, ya ema pela Jehova. ₆Moshe a re: Ke tseo Jehova a di laetseng; di etseng, mme kganya ya Jehova e tla iponahatsa ho lona. ₇Moshe a re ho Aarone: Atamela pela aletare, o etse sehlabelo sa hao sa sebe, le setjheso sa hao; o etse le pheko ya hao le ya setjhaba; o etse le setjheso sa setjhaba, le pheko bakeng sa sona, kamoo Jehova a laetseng kateng.

₈Yaba Aarone o atamela pela aletare, mme namane a e hlabela sehlabelo sa sebe. ₉Bara ba Aarone ba mo tlisetsa madi; a qopetsa monwana wa hae mading, a a bea manakeng a aletare; a ntoo tshollela fatshe aletareng madi a setseng. ₁₀Mafura, le diphio, le mafura a kguto a katlasa sebete, a sehlabelo sa sebe, a a tjhesa aletareng, kamoo Jehova a neng a laetse Moshe kateng. ₁₁Nama le letlalo a di tjhesetsa kantle ho diahelo.

₁₂A ntoo hlaba setjheso; bara ba Aarone ba mo tlisetsa madi, mme a a tshollela aletareng ka nqa tsohle. ₁₃Ba mo hlahisetsa setjheso se diretsweng ka dikarolo tsa sona, le hlooho, mme a di tjhese aletareng. ₁₄A hlatswa diteng le ditlhako, mme a di tjhesa hodima setjheso, aletareng.

₁₅A ntoo hlahisa sehlabelo sa setjhaba; a nka phooko ya sehlabelo sa sebe sa setjhaba; a e hlaba, a e etsa sehlabelo sa sebe, kamoo a neng a entse sa pele kateng. ₁₆A etsa setjheso, mme a ya ka molao wa teng. ₁₇A hlahisa nyehelo, a qotsa ho yona ka seatla, a e tjhesa aletareng kantle ho setjheso sa hosasa. ₁₈A hlaba kgomo le pheleu, e be sehlabelo sa teboho bakeng sa setjhaba; bara ba Aarone ba mo tlisetsa madi, mme a a tshollela aletareng ka nqa tsohle. ₁₉Ba mo tlisetsa le mafura a kgomo le a pheleu, mohatla, le mohlehlo, le diphio, le mafura a kguto a katlasa sebete; ₂₀ba bea mafura hodima difuba, mme a tjhesa mafura aletareng. ₂₁Aarone a tsokotsa difuba tseo le letsoho le letona pela Jehova, e le kabelo e tsokotswang, kamoo Jehova a neng a laetse Moshe kateng.

₂₂Aarone a otlollela matsoho a hae ka nqa setjhabeng, a se hlohonolofatsa; a ntoo theoha ha a se a qetile sehlabelo sa sebe, le setjheso, le sehlabelo sa teboho.

₂₃Moshe le Aarone ba kena tenteng ya pokano, mme ha ba etswa ho yona, ba hlohonolofatsa setjhaba. Yaba kganya ya Jehova e iponahatsa ho setjhaba kaofela. ₂₄Ha tswa mollo pontsheng ya Jehova, wa tjhesa setjheso le mafura aletareng; setjhaba kaofela sa ba sa bona, mme batho ba tshela mehoo ya thabo, ba wela fatshe ka difahleho.