LUKA 22

₁Mokete wa mahobe a se nang ditomoso, o bitswang Paseka, o ne o atametse. ₂Baprista ba baholo le bangodi ba ne ba batla kamoo ba ka bolayang Jesu kateng; hobane ba ne ba tshaba setjhaba.

₃Yaba Satane o kena ho Judase, ya bitswang Iskariota, eo e neng e le wa palo ya ba leshome le metso e mmedi. ₄A ya ho baprista ba baholo, le ho balaodi ba makgotla, ho rera le bona kamoo a tla ba neela yena kateng. ₅Ba thaba haholo, mme ba dumellana hammoho ho mo nea tjhelete. ₆Mme ha a se a dumetse, a batla sebaka sa ho ba neela yena, setjhaba se sa tsebe.

₇Eitse letsatsi la mahobe a se nang ditomoso ha le fihlile, leo batho ba tshwanetseng ho hlaba Paseka ka lona, ₈Jesu a roma Petrose le Johanne, a re: Eyang, le re lokisetse Paseka, re tle re e je. ₉Ba re ho yena: O rata hore re e lokise kae? ₁₀A re ho bona: Etlare ha le kena motseng, le tla kgahlana le motho ya jereng nkgo ya metsi; le mo latelle tlung eo a tla kena ho yona; ₁₁mme le re ho monga ntlo: Moruti o re ho wena: Ntlo e kae eo ke tla jela Paseka le barutuwa ba ka ho yona? ₁₂O tla le bontsha ntlo e kahodimo e kgolo, e kgabisitsweng. Le lokise Paseka teng. ₁₃Eitse ha ba ile, ba fihlela ho le jwalokaha a ba boleletse; mme ba lokisa Paseka.

₁₄Nako ha e tlile, a dula tafoleng le baapostola ba leshome le metso e mmedi. ₁₅A re ho bona: Ke lakaditse haholo ho ja Paseka ena le lona, ke eso ho utlwe bohloko. ₁₆Hobane ke re ho lona: Ha ke sa tla hlola ke e ja, e tle e be e phethehe mmusong wa Modimo.

₁₇Jwale a nka senwelo, a leboha, a re: Se nkeng, le se sielane. ₁₈Hobane ke re ho lona: Ha ke sa tla hlola ke enwa se behwang ke morara, ho tle ho be ho fihle mmuso wa Modimo. ₁₉A ntoo nka bohobe, mme eitse hobane a lebohe, a bo ngwatha, a ba nea bona, a re: Hona ke mmele wa ka, o neelwang lona; etsang hona hore le tle le nne le nkgopole. ₂₀A etsa jwalo le ka senwelo, ha ba se ba laletse, a re: Senwelo sena ke selekane se setjha mading a ka, a tshollelwang lona.

₂₁Empa, bonang, letsoho la ya nkekang le na le nna tafoleng. ₂₂Haele Mora motho, o ikela jwalokaha ho laetswe; empa ho madimabe motho ya mo ekang. ₂₃Mme ba qala ho botsana hore na ekaba ke mang hara bona ya tla etsa hona!

₂₄Kgang le yona ya eba teng hara bona ya ho tseba hore na ke ofe wa bona ya ka lekanngwang hoba ke e moholo. ₂₅Empa a re ho bona: Marena a ditjhaba a di busa, mme ba di busang ho thwe, ke bababalli ba tsona. ₂₆Ho se ke ha eba jwalo ho lona; empa e moholo hara lona a be jwaloka e monyenyane, mme ya busang a be jwaloka ya sebeletsang. ₂₇Hobane e moholo ke mang? A ke ya dutseng tafoleng, kapa a ke ya sebeletsang na? Na hase ya dutseng tafoleng na? Empa nna, ke hara lona jwaloka ya sebeletsang. ₂₈Ke lona ba tiiseditseng le nna melekong ya ka. ₂₉Mme nna ke le nea mmuso, jwalokaha Ntate a nneile wona, ₃₀le tle le be ba jang le ba nwang tafoleng ya ka mmusong wa ka; mme le tle le dule diteroneng, le ahlole meloko e leshome le metso e mmedi ya Iseraele.

₃₁Morena a re: Simone! Simone! bona, Satane o le qetse hore a le hlokole jwaloka koro; ₃₂empa nna ke o rapeletse hore tumelo ya hao e tle e se ke ya fela. Jwale, wena, etlere hobane o bake, o tiise banabeno. ₃₃Simone a re ho yena: Morena, ke itokisitse ho ya le wena teronkong, leha e le lefung. ₃₄Empa Jesu a re: Petrose, ke a o bolella hoba mokoko o ke ke wa lla kajeno, o eso ho latole hararo hore o a ntseba.

₃₅Yaba o re ho bona: Mohla ke neng ke le romile le se na mokotlana wa ditjhelete, le mokotla wa tsela, le dieta, na le kile la hloka ho hong na? Ba re: Ha ho letho leo re kileng ra le hloka. ₃₆A re ho bona: Empa jwale, ya nang le mokotlana wa ditjhelete a o nke le wona makotla wa tsela; ya hlokang sabole a ithekele yona ka kobo ya hae. ₃₇Hobane ke le bolella hore taba e ngodilweng e tshwanetse ho phethehala ho nna, e reng: O badilwe le bakgopo. Hobane ditaba tsa ka di ya ho feleng ha tsona. ₃₈Yaba ba re: Morena, bona, disabole tse pedi ke tsena. A re ho bona: Ho lekane.

₃₉Yaba o a tloha, a ya thabeng ya Mehlwaare, ka temalo ya hae; mme barutuwa ba hae ba mo latela. ₄₀Yare ha a fihlile teng, a re ho bona: Rapelang, hore le se kene molekong. ₄₁A ntoo ya hojana le bona, sebaka se ka fihlewang ke lejwe ha le betswa; a kgumama ka mangwele a rapela, ₄₂a re: Ntate, hoja o ka rata ho suthisa senwelo sena pela ka! empa ho se ke ha etswa thato ya ka, ho etswe ya hao. ₄₃Yaba lengeloi le hlaha ho yena, le etswa lehodimong, la mo matlafatsa. ₄₄Eitse ha a le matswalong a maholo, a eketsa ho rapela ka matla; mme dikgororo tsa hae tsa eba jwaloka marothodi a madi a rothelang fatshe. ₄₅Yare ha a tsoha thapelong, a tla ho barutuwa ba hae, a ba fumana ba robetse ke ho swaba; ₄₆a re ho bona: Na le robetse keng? Tsohang, le rapele, hore le se kene molekong.

₄₇A re a sa bua, sehlopha sa hlaha, mme ya bitswang Judase, e mong wa ba leshome le metso e mmedi, o ne a se eteletse pele; a atamela ho Jesu ho mo aka. ₄₈Empa Jesu a re ho yena: Judase, hleka o eka Mora motho ka kako na? ₄₉Yaba ba nang le yena, ha ba bona se tla hlaha, ba re ho yena: Morena, a re tla hlatha ka sabole na? ₅₀Yaba e mong wa bona o hlatha mohlanka wa moprista e moholo, a mo kgaola tsebe e tona. ₅₁Empa Jesu a bua, a re: Ba leseleng ho fihlela hona! Mme a ama tsebe ya motho eo, a mo fodisa.

₅₂Yaba Jesu o bolella baprista ba baholo, le balaodi ba tempele, le baholo ba tlileng ho mo tshwara, a re: Le tlile ka disabole le ka melamu, jwalokaha eka le batla leshodu! ₅₃Ke ne ke ntse ke na le lona tempeleng ka tsatsi le leng le le leng, mme ha le a ka la bea matsoho ho nna; empa ke yona nako ya lona le matla a lefifi. ₅₄Jwale ba phakisa ba mo tshwara, ba ya le yena, ba mo isa tlung ya moprista e moholo. Haele Petrose a latela a le hole.

₅₅Eitse ha ba besitse mollo kahara lebala, ba dutse hammoho, Petrose a dula hara bona. ₅₆Jwale, lekgabunyane le leng, ha le mmona a dutse pela mollo, la mo hlaba ka mahlo, la re: Le enwa o ne a na le yena. ₅₇Empa a mo latola, a re: Mosadi, ha ke mo tsebe. ₅₈Hamoraonyana, e mong a mmona, a re: Le wena o wa bona. Empa Petrose a re: Monna towe, ha ke wa bona. ₅₉Ha ya motsotso o kang wa hora e le nngwe, e mong a omela, a re: Kannete le enwa o ne a na le yena; hobane ke Mogalelea. ₆₀Empa Petrose a re: Monna towe, ha ke tsebe seo o se bolelang. Empa hanghang, a re a sa bua, mokoko wa lla. ₆₁Morena a reteleha, a sheba Petrose. Mme Petrose a elellwa polelo ya Morena kamoo a neng a mmolelete kateng, a re: Mokoko ha o eso ho lle, o tla be o se o ntatotse hararo. ₆₂Yaba Petrose o tswela ntle, a lla habohloko.

₆₃Banna ba tshwereng Jesu ba ne ba mo soma, mme ba mo otla. ₆₄Ba mo kwahela mahlo, ba mo wahlela, ba mmotsa, ba re: Porofeta! ke mang ya o otlileng. ₆₅Ba mo nyefola le ka ditaba tse ding tse ngata, tseo ba mo hlabang ka tsona.

₆₆Eitse hobane bo se, baholo ba setjhaba, le baprista ba baholo, le bangodi, ba bokana, mme ba mo isa lekgotleng la bona. ₆₇Ba re ho yena: Ha o le Kreste, o re bolelle. Empa a re ho bona: Leha nka le bolella, le ke ke la dumela; ₆₈mme leha nka le botsa, le ke ke la nkaraba le hona, mme le ke ke la ntesa ka ya. ₆₉Ho qala jwale, Mora motho o tla be a dule letsohong le letona la matla a Modimo. ₇₀Yaba bohle ba re: Na ke ho re, o Mora Modimo na? A re ho bona: Le a bolela; ke yena. ₇₁Ba re: Dipaki re sa di batlelang, ha e le moo re ikutlwetse molomong wa hae?