LUKA 24

₁Ka tsatsi le qalang veke, e sa le kameso, ba ya lebitleng ho isa dinoko tseo ba di lokisetseng, ba ena le ba bang. ₂Empa ba fihlela lejwe le phikolositswe lebitleng. ₃Yare hobane ba kene, ha ba ka ba fumana setopo sa Morena Jesu teng. ₄Ba re ba sa tsielehile ke hoo, bonang, banna ba babedi ba ne ba eme pela bona ka diaparo tse hadimang. ₅Eitse basadi ha ba sa tshohile, ba kobotetse fatshe, ba re ho bona: Ya phelang na le mmatlelang hara bafu? ₆Ha a yo mona, empa o tsohile. Hopolang kamoo a le boleletseng kateng, ha a sa le Galelea, ₇a re: Mora motho o tshwanetse ho neelwa matsohong a baetsadibe, a thakgiswe, mme a tsohe bafung ka letsatsi la boraro. ₈Yaba ba elellwa ditaba tseo tsa hae.

₉Jwale ba kgutla lebitleng, ba ya bolela taba tseo tsohle ho ba leshome le motso o mong, le ho ba bang bohle. ₁₀Ba boleletseng baapostola ditaba tseo, e ne e le Maria Magdalena, le Johanna, le Maria mma Jakobo, le bang ba nang le bona. ₁₁Empa taba tsa basadi bao tsa eba jwaloka tshomo ho bona, mme ha ba ka ba dumela. ₁₂Leha ho le jwalo, Petrose a tloha, a mathela lebitleng; eitse hobane a nyarele, a bona masela a beilwe a nnotshi fatshe; a ntoo kgutla, a ntse a maketse ka ho yena ke se hlahileng.

₁₃Ka lona tsatsi leo, ba babedi ba bona ba ne ba ya motsaneng o mong, o bitswang Emmause, bohole ba wona le Jerusalema e le stadia tse mashome a tsheletseng; ₁₄ba ne ba buisana ka tseo tsohle tse hlahileng. ₁₅Ba re ba sa buisana, le ho botsana, Jesu ka sebele a ba atamela, mme a tsamaya le bona. ₁₆Empa mahlo a bona a ne a sirelwa, ba ba ba sitwa ho mo tseba. ₁₇A re ho bona: Le ntse le buisana ka taba dife le ntse le tsamaya, le bileng le swabile hahakale? ₁₈E mong, lebitso la hae e le Kleopa, a araba, a re: Ke wena o le mong hara ba ahileng Jerusalema ya sa tsebeng taba tse hlahileng teng tshiung tsena? ₁₉A re ho bona: Dife? Ba re: Tsa Jesu wa Nasaretha, eo e neng e le monna wa moporofeta ya matla mesebetsing le dipolelong tsa hae pela Modimo le pela setjhaba sohle; ₂₀le kamoo baprista ba baholo le babusi ba rona ba mo neetseng kateng, ho ahlolelwa lefu, ba ba ba mo thakgisa. ₂₁Haele rona, re ne re tshepile hobane ke yena ya tla lopolla Iseraele; leha ho le jwalo, e se e le letsatsi la boraro taba tseo di hlahile. ₂₂Kwana, basadi ba bang ba sehlopha sa rona ba re makaditse haholo; ba ile lebitleng e sa le ka meso, ₂₃mme ha ba ka ba fumana setopo sa hae, ba ba ba tla, ba bolela hore ba bone mohlolo wa mangeloi a itseng, o a phela. ₂₄Ba bang ba rona ba ile lebitleng, mme ba fihletse ho le jwalokaha basadi ba boletse; empa yena, ha ba ka ba mmona. ₂₅Yaba o re ho bona: Jo! batho ba se nang kutlwisiso, ba pelo tse diehang ho dumela tsohle tse boletsweng ke baporofeta! ₂₆Hleka e ne e se tshwanelo hore Kreste a utlwiswe bohloko boo, a ntoo kena kganyeng ya hae na? ₂₇Yaba o qala ka Moshe, a isa ho baporofeta bohle, a ntse a ba hlalosetsa Mangolong wohle tseo a boletsweng ka tsona. ₂₈Ba atamela motsana oo ba yang ho wona; empa Jesu a etsa jwaloka hoja a fetela pele. ₂₉Ba mo qophella, ba re: Hlola le rona, hobane e se e le mantsiboya, le letsatsi le se le rapame. A ba a kena, a dula le bona. ₃₀Eitse ha a dutse dijong le bona, a nka bohobe, a boka, a bo ngwatha, a ba nea bona. ₃₁Yaba mahlo a bona a tutuboloha, mme ba mo tseba; empa a ba nyamella. ₃₂Ba ba ba bolellana, ba re: Ana dipelo tsa rona di ne di sa tjhese kahare ho rona, ha a ntse a bua le rona tseleng, a re hlalosetsa Mangolo na?

₃₃Ka yona nako eo ba tloha, ba kgutlela Jerusalema, mme ba fihlela ba leshome le motso o mong ba phuthehile le ba nang le bona, ba re: ₃₄Morena o tsohile bafung kannete; o bile o bonwe ke Simone. ₃₅Le bona ba pheta tse ba hlahetseng tseleng, le kamoo a itsebisitseng ho bona kateng, ka ho ngwatha bohobe.

₃₆Ba re ba sa bolela tseo, Jesu a hla a ema hara bona ka sebele sa hae, a re ho bona: Kgotso e be le lona! ₃₇Ba mpa ba tshoha, ba tshaba haholo, ba hloma eka ba bona seriti. ₃₈A re ho bona: Le tshohelang? mme mehopolo e jwalo e hlahelang dipelong tsa lona? ₃₉Bonang diatla tsa ka le maoto a ka, hobane ke nna ka sebele. Ntoboketseng, le bone; hobane seriti ha se na nama le masapo, jwalokaha le mpona ke ena le wona. ₄₀Eitse ha a sa ba bolella hoo, a ba bontsha diatla tsa hae le maoto. ₄₁Mme kahobane ba ne ba sa belaela ka baka la ho thaba le ho makala, a re ho bona: Na mona le na le ntho e jewang na? ₄₂Ba mo nea sesuma sa hlapi e besitsweng le kgekge ya dinotshi; ₄₃mme a di nka, a ja pela bona.

₄₄A ntoo re ho bona: Ke tsona ditaba tseo nkileng ka le bolella tsona, ha ke sa na le lona, ka re: Tsohle tseo ke ngodilweng ka tsona molaong wa Moshe le baporofeteng le dipesalemeng, e ka kgona di etsahale. ₄₅Ya eba hona a bulang kutlwisiso ya bona, hore ba utlwisise Mangolo. ₄₆A ntoo re ho bona: Ho ne ho ngodilwe jwalo, mme ho ne ho tshwanela hore Kreste a utlwiswe bohloko, mme a tsohe bafung ka letsatsi la boraro; ₄₇ho tle ho bolelwe ka lebitso la hae pako le tshwarelo ya dibe ho ditjhaba tsohle, ho qala ka Jerusalema. ₄₈Lona, le dipaki tsa taba tseo. ₄₉Mme bonang, nna ke tla le romela pallo ya Ntate; le mpe le sale motseng wa Jerusalema, le tle le be le apeswe ka matla a tswang hodimo.

₅₀A ba isa kantle, ho ya fihla Bethania, a emisa matsoho a hae, a ba hlohonolofatsa. ₅₁A re a sa ba hlohonolofatsa, a kgaohana le bona, a nyolosetswa lehodimong. ₅₂Haele bona, ba mo kgumamela, ba ntoo kgutlela Jerusalema ka thabo e kgolo. ₅₃Ba ne ba le tempeleng kamehla, ba ntse ba boka Modimo, ba o rorisa.