MAREKA 10

₁Jesu ha a tloha moo, a ya meeding ya Judea, mose ho Jordane; bongata ba boela ba bokana ho yena, mme a boela a ba ruta jwalokaha e ne e le mokgwa wa hae.

₂Bafarisi ba tla ho yena, ba mmotsa, ka ho mo leka, hore na monna o dumeletswe ho hlala mosadi wa hae. ₃A ba araba, a re: Moshe o le laetseng? ₄Ba re: Moshe o dumetse hoba lengolo la hlalo le ngolwe, mme ho hlalwe. ₅Jesu a ba araba, a re: O le ngoletse taelo eo ka baka la bothata ba dipelo tsa lona. ₆Empa tshimolohong ya hlolo ya dintho tsohle, Modimo o ba entse e le e motona le e motshehadi. ₇Ka baka leo, motho o tla tlohela ntatae le mmae, a kgomarele mosadi wa hae; ₈ba babedi e tla ba nama e le nngwe. Ha ho le jwalo, ha ba sa le babedi, e se e le nama e le nngwe. ₉Ka baka leo, seo Modimo o se kopantseng hammoho, se se ke sa arolwa ke motho. ₁₀Ka tlung, barutuwa ba hae ba boela ba mmotsa hodima taba eo. ₁₁A re ho bona: E mong le e mong ya hlalang mosadi wa hae, mme a nyala e mong, o a mo feba. ₁₂Le mosadi ha a hlala monna wa hae, a nyalwa ke e mong, o a feba.

₁₃Yaba o tlisetswa bana, hore a ba ame; barutuwa ba hae ba ne ba kgalemela ba ba tlisang. ₁₄Jesu, ha a bona hoo, a ba bohale, a re ho bona: Lesang bana ba tle ho nna, mme le se ke la ba thibela; hobane mmuso wa Modimo ke wa ba jwaloka bona. ₁₅Kannete ke re ho lona: E mong le e mong ya sa amoheleng mmuso wa Modimo jwaloka ngwana, a ke ke a kena teng. ₁₆Mme ha a ba sikile, a ba bea matsoho hodimo, a ba hlohonolofatsa.

₁₇Ha a tswela tseleng, e mong a mo mathela, a kgumama ka mangwele pela hae, a mmotsa, a re: Moruti ya molemo, ke tla etsang ke tle ke rue lefa la bophelo bo sa feleng? ₁₈Jesu a re ho yena: O mpiletsang ya molemo? Ha ho ya molemo haese a le mong, e leng Modimo. ₁₉O tseba melao e reng: O se ke wa feba, o se ke wa bolaya, o se ke wa utswa, o se ke wa bea bopaki ba bohata, o se ke wa ja tsa e mong, hlonepha ntatao le mmao. ₂₀Eo a araba, a re ho yena: Moruti, tseo tsohle ke di bolokile haesale le bonyenyaneng ba ka. ₂₁Jesu ha a mo shadima, a mo rata, mme a re ho yena: O hloka ntho e le nngwe: Tsamaya, o rekise ka tsohle tseo o nang le tsona, o di fe bafumanehi, mme o tla ba le letlotlo lehodimong; o ntano tla, o ntatele o ipelesitse sefapano. ₂₂Eo a mpa a hlajwa ke polelo eo, a ikela a swabile; hobane e ne e le ya nang le maruo a maholo. ₂₃Jesu a qamaka, a re ho barutuwa ba hae: Ho ya ba thata hakakang ho ba nang le maruo ho kena mmusong wa Modimo! ₂₄Barutuwa ba makala ke polelo tsa hae. Empa Jesu a boela a bua, a re ho bona: Bana, ho thata hakakang ho ba tshepileng maruo ho kena mmusong wa Modimo! ₂₅Ho ka ba bonolo ha kamele e feta ka lesoba la lemao, ho ena le hore morui a kene mmusong wa Modimo. ₂₆Jwale ho tsota ha bona ha eketseha; ba botsana, ba re: Homme ho ka bolokeha mang? ₂₇Jesu a ba shadima, a re: Ke ntho e sitang batho, empa ha e site Modimo; hobane Modimo tsohle o ka di etsa.

₂₈Yaba Petrose o bua, a re ho yena: Bona, rona re tlohetse tsohle, mme re o latetse. ₂₉Jesu a araba, a re: Kannete ke re ho lona: Ha ho motho ya ka tlohelang ntlo, kapa banababo, leha e le bokgaitsedie, kapa ntatae, leha e le mmae, kapa bana, leha e le masimo, ka baka la ka le la Evangeli, ₃₀ya ke keng a newa ha lekgolo, jwale, mehleng ena, matlo, le banababo, le dikgaitsedi, le bommae, le bana, le masimo, hammoho le dihloriso; mme mehleng e tla tla, a newe bophelo bo sa feleng. ₃₁Empa ba bangata ba pele e tla ba ba morao, mme ba morao e tla ba ba pele.

₃₂Ba ne ba le tseleng, ba nyolohela Jerusalema, Jesu a ntse a ba eteletse pele; ba ne ba tshohile, ba mo latela ba ntse ba tshaba. A boela a ya thoko le ba leshome le metso e mmedi, a qala ho ba bolella tse tla mo hlahela, ₃₃a re: Bonang, re nyolohela Jerusalema, mme Mora motho o tla neelwa baprista ba baholo le bangodi, mme ba tla mo ahlolela lefu, ba mo neele baditjhaba. ₃₄Ba tla mo soma, ba mo shape, ba mo tshwele ka mathe, ba mmolaye; mme o tla be a tsohe ka tsatsi la boraro.

₃₅Ha tla ho yena Jakobo le Johanne, bara ba Sebedea, ba re: Moruti, re rata ha o ka re etsetsa seo re tla se kopa. ₃₆A re ho bona: Le rata ha ke le etsetsang? ₃₇Ba re ho yena: Re nee hore re dule kganyeng ya hao, e mong letsohong la hao le letona, e mong ho le letshehadi. ₃₈Empa Jesu a re ho bona: Ha le tsebe seo le se kopang. Na le ka tseba ho nwela senwelong seo ke tla nwela ho sona, le ho kolobetswa ka kolobetso eo ke tla kolobetswa ka yona na? ₃₉Ba re ho yena: Re ka tseba. Yaba Jesu o re ho bona: Efela le tla nwela senwelong seo ke tla nwela ho sona, mme le tla kolobetswa ka kolobetso eo ke tla kolobetswa ka yona. ₄₀Empa haele ho dula letsohong la ka le letona, leha e le ho le letshehadi, ha ke na ho ho nea, ho mpa ho boloketswe ba ho lokiseditsweng. ₄₁Ba leshome ha ba utlwa taba eo, ba qala ho hlonamela Jakobo le Johanne. ₄₂Empa Jesu, yare ha a ba bileditse ho yena, a re ho bona: Le a tseba hobane ba nang le lebitso la marena a ditjhaba ba di busa, mme ba baholo ba bona ba na le puso e thata hodima tsona. ₄₃Ho se ke ha eba jwalo ho lona; empa ya ratang ho ba moholo hara lona, e tla ba mohlanka wa lona; ₄₄mme ya ratang ho ba wa pele hara lona e tla ba mofo wa bohle; ₄₅hobane le yena Mora motho ha a ka a tlela ho sebeletswa, empa e le ho sebeletsa, le ho neela bophelo ba hae ho ba topollo ya ba bangata.

₄₆Ba fihla Jeriko. Jesu ha a etswa Jeriko le barutuwa ba hae, a ena le bongata bo boholo, Bartimea, mora Timea, wa sefofu, o ne a dutse pela tsela, a kopa. ₄₇Ha a utlwa hoba ke Jesu wa Nasaretha, a qala ho howa le ho re: Oho, mora Davida, Jesu, nkutlwele bohloko! ₄₈Ba bangata ba mo kgalemela, ba re, a kgutse; a mpa a aketsa a howa, a re: Mora Davida, nkutlwele bohloko! ₄₉Jesu a ema, a re, a bitswe. Yaba ba bitsa sefofu, ba re ho sona: Kgothahala, o eme, o a o bitsa. ₅₀Yaba se lahla kobo ya sona, sa ema, sa tla ho Jesu. ₅₁Jesu a bua, a re ho sona: O rata ha ke o etsetsang? Sefofu sa re ho yena: Rabboni, a nke ke boele ke bone. ₅₂Jesu a re ho sona: Eya, tumelo ya hao e o pholositse. Sa bona hang, sa ba sa latela Jesu tseleng.