MAREKA 13

₁A re a sa tloha tempeleng, e mong wa barutuwa ba hae a re ho yena: Moruti, bona, ke majwe a makakang, le mehaho e mekakang! ₂Jesu a araba, a re ho yena: O a e bona mehaho e meholo eo? Ha ho ka ke ha leswa mona lejwe hodima lejwe le leng, le sa heletswang.

₃Yare ha a dutse thabeng ya Mehlwaare, mabapa le tempele, Petrose, le Jakobo, le Johanne, le Andrease, ba mmotsa kathoko, ₄ba re: Re bolelle nako eo taba tseo di tla etsahala ka yona, mme pontsho ya mohla tseo tsohle di tla etsahala e tla ba eng?

₅Yaba Jesu o qala ho ba bolella, a re: Iponeleng hore le se ke la thetswa ke motho. ₆Hobane ba bangata ba tla tla ka lebitso la ka, ba re: Ke nna Kreste. Mme ba tla thetsa ba bangata. ₇Mohla le utlwang dintwa le medumo ya dintwa, le se ke la tshoha; hobane e ka kgona hoo ho etsahale; empa le moo ha e eso ho be bona bofelo. ₈Hobane setjhaba se seng se tla tsohela setjhaba se seng matla, mmuso o mong o lwantshe mmuso o mong; ditshisinyeho tsa lefatshe di tla ba teng ka nqa tse ngata, le ditlala di tla ba teng le meferefere. ₉Tseo ke qalo ya tlokotsi. Empa lona le iponele: hobane ba tla le isa makgotleng le masinagogeng; le tla otlwa, le emiswe pela babusisi le marena ka baka la ka, le tle le be dipaki ho bona. ₁₀E ka kgona Evangeli e bolelwe ditjhaba tsohle pele. ₁₁Mohla ba le hulang ho le isa kahlolong, le se ke la belaela pele ka seo le tla se bolela, mme le se ke la se nahana, empa seo le tla se newa nakong yona eo, le bolele sona; hobane e ke ke ya eba lona le buang, empa e tla ba Moya o Halalelang. ₁₂Ngwanabo motho o tla neela ngwanabo polaong, ntata motho a etse ngwana hae jwalo, mme bana ba tla tsohela batswadi ba bona matla, ba ba bolaye. ₁₃Le tla hlouwa ke bohle ka baka la lebitso la ka; empa ya tiisetsang ho fihlela qetellong, ke yena ya tla bolokeha.

₁₄Etlare ha le bona manyala a bofediso, a boletsweng ke moporofeta Daniele, a eme moo a sa lokelang — ya balang a lemohe — mohlang oo, ba leng Judea ba balehele dithabeng; ₁₅ya leng hodima ntlo, a se ke a theohela tlung, a se ke a kena ho nka letho tlung ya hae; ₁₆le ya leng naheng, a se ke a kgutlela hae ho nka kobo ya hae. ₁₇Ho mpa ho tla ba madimabe basadi ba baimana le ba anyesang mehleng eo. ₁₈Hape, le rapele hore paleho ya lona e se hlahe mariha. ₁₉Hobane mehla eo e tla ba ya mahlomola ao ho esong ho ka ho bonwa a makalo haesa le tshimolohong ya hlolo, ha Modimo o ne o hlola dintho, ho fihlela jwale, mme ho ke ke ha eba teng a jwalo le ka mohla o le mong. ₂₀Le hojane Morena a sa ka a kgutshofatsa matsatsi ao, ekabeba ho ne ho ke ke ha phela motho; empa ka baka la bakgethwa bao a ba kgethileng, o kgutsofaditse matsatsi ao. ₂₁Mohlang oo, ha motho a re ho lona: Bonang, Kreste o mona, kapa: Bonang, o mane, le se ke la dumela. ₂₂Hobane ho tla hlaha Bokreste ba bohata, le baporofeta ba bohata, mme ba tla etsa dipontsho le mehlolo, ba tle ba thetse le bona bakgethwa, hola ke ntho e ka etswang. ₂₃Lona, le iponele. Bonang, ke le boleletse tsohle pele.

₂₄Empa mehleng eo, kamora mahlomola ao, letsatsi le tla fifala; kgwedi e ke ke ya kgantsha lesedi la yona; ₂₅dinaledi di tla wa lehodimong, mme tse matla tse mahodimong di tla sisinyeha. ₂₆Ke moo ba tla bona Mora motho a etla ka maru, ka matla a maholo le ka kganya. ₂₇Ke moo a tla roma mangeloi a hae, le ho bokella bakgethwa ba hae meyeng e mene, ho qala pheletsong ya lefatshe ho isa pheletsong ya lehodimo. ₂₈Ithuteng, ho lekanya ditaba ka sefate sa feiye. Lekala la sona ha le se le le bonolo, mme le se le hlahisa mahlaku, le tseba kahoo hobane lehlabula le haufi. ₂₉Ka mokgwa o jwalo, le lona, etlare ha le bona tseo di hlaha, le tsebe hoba Mora motho o haufi, o monyako. ₃₀Kannete ke re ho lona: Moloko wona o ke ke wa feta, tseo tsohle di eso ho etsahale. ₃₁Lehodimo le lefatshe di tla feta, empa dipolelo tsa ka di ke ke tsa feta.

₃₂Empa haele bakeng sa letsatsi leo le hora eo, ha ho ya tsebang, leha e le mangeloi a lehodimong, leha e le Mora, haese Ntate feela. ₃₃Iponeleng, le fadimehe, mme le rapele, hobane ha le tsebe mohla e tla ba nako. ₃₄Ho jwaloka motho ha a etile, a tlohetse ntlo ya hae, a neile bahlanka ba hae ditaelo tsa hae, a laetse e mong le e mong mosebetsi wa hae, mme a laetse molebedi wa monyako ho lebela. ₃₅Lebelang ke hona; hobane ha le tsebe mohla monga ntlo a tla tla, kapa mantsiboya, kapa bosiu bo boholo, kapa mokoko ha o lla, kapa kameso; ₃₆esere, ha a etla ka ho le tsometsa, a le fihlela le robetse. ₃₇Seo ke le bolellang sona, ke se bolella bohle: Lebelang!