NUMERE 10

₁Yaba Jehova o bua le Moshe, a re: ₂O iketsetse diterompeta tse pedi tsa silefera. O di etse ka silefera e teilweng. Di tla o thusa ho mema phutheho le ho laela makgotla hore a tlohe. ₃Etlare ha di letswa, phutheho yohle e tla bokana ho wena monyako wa tente ya pokano. ₄Ha ho letswa e le nngwe feela, marena, e leng dihlooho tsa dikete tsa Iseraele, a tla phuthehela ho wena. ₅Etlare ha le di letsa haholo, makgotla a ka nqa botjhabela a tla tloha. ₆Etlare ha le boela le di letsa haholo la bobedi, makgotla a ka nqa borwa a tla tloha; di tla letswa haholo hore makgotla a tlohe. ₇Etlare ha le mema phutheho, le tla di letsa, empa e seng ka modumo o moholo. ₈Bara ba Aarone, baprista, ba tla letsa diterompeta; ke taelo e sa feleng ho lona le ho meloko ya lona. ₉Etlare ha le eya ntweng fatsheng la lona, le ya lwantsha dira tse le qalang, le tla letsa diterompeta haholo, mme le tla hopolwa pela Jehova, Modimo wa lona, mme le tla namolelwa matsohong a dira tsa lona. ₁₀Matsatsing a lona a ho thaba, mohla mekete ya lona, le thwasong ya dikgwedi tsa lona, le tla letsa diterompeta, le ntse le hlahisa ditjheso tsa lona, le mahlabelo a lona a teboho, mme le tla hopolwa jwalo pela Modimo wa lona. Ke nna Jehova, Modimo wa lona.

₁₁Ka tsatsi la mashome a mabedi la kgwedi ya bobedi, ka selemo sa bobedi, leru la phahama, la tloha tabernakeleng ya bopaki; ₁₂bana ba Iseraele ba tloha lefeelleng la Sinai, ka lenaneo la ho tsamaya leo ba neng ba le laetswe; mme leru la ema lefeelleng la Parane. ₁₃Ya eba hona ba qalang ho tloha ka taelo ya Jehova, eo ba e neilweng ka Moshe.

₁₄Folaga ya ntlo ya bana ba Juda ya tloha pele: ba tloha ka makgotla a bona; lekgotla la Juda le ne le laolwa ke Nasone, mora Amminadabe; ₁₅lekgotla la leloko la bana ba Issaskare le ne le laolwa ke Nethaneele, mora Tsuare; ₁₆lekgotla la leloko la bana ba Sabulone le ne le laolwa ke Eliabe, mora Helone.

₁₇Tabernakele ya qhaqhollwa: yaba bara ba Gershone le bara ba Merari ba tloha, ba jere tabernakele.

₁₈Yaba folaga ya ntlo ya Rubene e a tloha; ba tloha ka makgotla a bona; lekgotla la Rubene le ne le laolwa ke Elitsure, mora Shedeure; ₁₉lekgotla la leloko la bana ba Simeone le ne le laolwa ke Shelumiele, mora Tsurishaddai; ₂₀lekgotla la leloko la bana ba Gade le ne le laolwa ke Eliasafe, mora Deuele.

₂₁Bakehathe ba tloha le bona, ba jere dintho tse kgethehileng; mme ho ne ho emiswa tabernakele, ba ntse ba lebeletswe ho fihla.

₂₂Yaba folaga ya ntlo ya bana ba Efraime e a tloha; ba tloha ka makgotla a bona; lekgotla la Efraime le ne le laolwa ke Elishama, mora Ammihude; ₂₃lekgotla la leloko la bana ba Manasse le ne le laolwa ke Gamaliele, mora Pedahtsure; ₂₄lekgotla la leloko la bana ba Benjamine le ne le laolwa ke Abidane, mora Gideoni.

₂₅Yaba ho tloha folaga ya ntlo ya bana ba Dane; ba tloha ka makgotla a bona, e le serao sa makgotla kaofela; lekgotla la bona le ne le laolwa ke Akiesere, mora Ammishaddai; ₂₆lekgotla la leloko la bana ba Asere le ne le laolwa ke Pagiele, mora Okrane; ₂₇lekgotla la leloko la bana ba Nefthali le ne le laolwa ke Akira, mora Enane.

₂₈Ke lona lenaneo leo bana ba Iseraele ba tsamaileng ka lona, ka makgotla a bona; ba tloha jwalo.

₂₉Moshe a re ho Hobabe mora Reuele, Momidiane, mohwehadi wa Moshe: Re a tloha, re ya sebakeng seo Jehova a itseng: Ke tla le nea sona. Tloo le rona; re tla o etsa hantle; hobane Jehova o itse o tla etsa Iseraele hantle. ₃₀A mo arapa, a re: Nke ke ka ya, empa ke tla kgutlela lefatsheng la heso, le ho banabeso. ₃₁Mme Moshe a re: Ke a o rapela, o se ke wa re tlohela, hobane o tseba moo re tla emisa teng feelleng, mme o tla ba mahlo a rona. ₃₂Ha o etla le rona, molemo ofe le ofe oo Jehova a tla re etsetsa wona, le rona re tla o etsetsa wona.

₃₃Ba tloha thabeng ya Jehova; ba tsamaya ka matsatsi a mararo; mme areka ya selekane sa Jehova ya ba etella pele sebaka sa matsatsi a mararo, e ba batlele moo ba tla phomola teng.

₃₄Enere ha ba tloha moo ba neng ba emisitse teng, leru la Jehova le ne le le hodima bona motshehare. ₃₅Ha areka e ne e tloha, Moshe o ne a re: Raoha, Jehova; dira tsa hao a di ke di qhalwe! mme ba o hloileng, a ba ke ba balehe pela sefahleho sa hao! ₃₆Mme ha areka e ne e ema, o ne a re: Jehova, kgutlela diketeketeng tsa dikete tsa Iseraele!