NUMERE 12

₁Miriame le Aarone ba seba Moshe, bakeng sa mosadi wa Kushe, eo a neng a mo myetse; hobane o ne a nyetse mosadi wa Kushe; ba re: ₂A ruri Jehova o buile ka Moshe feela na? Hleka ha a bue le ka rona na? Jehova a utlwa hoo. ₃Haele Moshe, e ne e le monna ya mosa, ya mosa ho fetisa motho ofe le ofe ya lefatsheng. ₄Hang Jehova a re ho Moshe le Aarone le Miriame: Lona ba bararo, tlohang, le ye tenteng ya pokano. Ba tloha ba bararo, ba ya. ₅Jehova a theoha topallong ya leru, a ema monyako wa tente ya pokano, a bitsa Aarone le Miriame; mme bona ba babedi ba tswa. ₆A re: Mamelang mantswe a ka hantle: moporofeta ha a le teng hara lona, nna, Jehova, ke ipontsha ho yena ka pono, ke bua le yena ka toro. ₇Empa ha ho jwalo le mohlanka wa ka, Moshe; o tshepehile tlung ya ka kaofela; ₈ke bua le yena ka molomo o bapileng le molomo, ka ho iponahatsa, e seng ka mokgwa wa ho lotha; o boha sefahleho sa Jehova. Ha ho le jwalo, ho ile kang ha le sa ka la tshaba ho bua hampe ka mohlanka wa ka, Moshe, na?

₉Kgalefo ya Jehova ya ba tukela, mme a tloha. ₁₀Leru la tloha tenteng; mme hanghang, Miriame ya eba molepera, a ba mosuwana jwaloka lehlwa; Aarone ha a retelehela ho Miriame, a mmona hoba ke molepera. ₁₁Yaba Aarone o re ho Moshe: Oho, monga ka, ke a o rapela, o se ke wa bea hodima rona sebe seo re se entseng ka bowatla, seo re sitilweng ka sona. ₁₂Tjhe, a se ke a ba jwaloka lesea le hlahileng le kgathetse, leo nama ya lona nqe nngwe e seng e bodile ha le etswa popelong ya mma lona. ₁₃Yaba Moshe o hooeletsa ho Jehova, a re: Oho Modimo, ke a o rapela, mo fodise hle! ₁₄Jehova a re ho Moshe: Hoja ntatae a mo tshwetse ka mathe sefahlehong, se ka beng se mo loketse na hase ho dula matsatsi a supileng tlasa dihlong na? A ke a kwallwe ka matsatsi a supileng kantle ho diahelo; kamora moo, o tla amohelwa teng. ₁₅Yaba Miriame o kwallwa kantle ho diahelo matsatsi a supileng; mme setjhaba ha se a ka sa tloha, Miriame a eso ho boele teng.

₁₆Kamora tseo setjhaba sa tloha Hatserothe, sa tla emisa lefeelleng la Parane.