NUMERE 34

₁Jehova a bua le Moshe, a re: Laela bana ba Iseraele, o re ho bona: ₂Etlare hobane le kene naheng ya Kanana, naha eo e tla ba lefa la lona, ke eo: naha ya Kanana ka meedi ena ya yona:

₃Ka nqa borwa, moedi e tla ba lefeella la Tsine, ho fihlela Edomo; moedi wa lona, ka nqa borwa, o tla tloha pheletsong ya Lewatle la Letswai ka nqa botjhabela; ₄o tla pota moepa wa Akrabbime, ka nqa borwa; o fete ka Tsine, mme o fihle Kadeshe-Barnea, ka nqa borwa; o tla ya ka Hatsar-Addare, mme o tla feta Atsmone, ₅ho tloha Atsmone, o tla pota ho isa molapong wa Egepeta, mme o kene Lewatleng.

₆Moedi wa lona ka nqa bophirimela, e tla ba Lewatle le Leholo; ke wona moedi wa lona ka nqa bophirimela.

₇Moedi wa lona, ka nqa leboya, e tla ba ona: O tla tloha Lewatleng le Leholo, mme le tla o fihlisa thabeng ya Hore; ₈ho tloha thabeng ya Hore le tla o fetisa ka Hamathe, o kene Tsedade, ₉o fete ka Sifrone, mme o felle Hatsar-Enane. Moedi wa lona e tla ba wona ka nqa leboya.

₁₀Le tla itshehela moedi wa lona ka nqa botjhabela, ka ho tloha Hatsar-Enane ho isa Shefame; ₁₁ho tloha Shefame, moedi o tla theohela Ribla, ka nqa botjhabela ho Aine; mme o tla theoha, o sike le Lewatle la Kinnerethe, ka nqa botjhabela, ₁₂mme o tla theosa Jordane ho ya kena Lewatleng la Letswai. Naha ya lona e tla ba jwalo, ka meedi ya yona e e teelang hare.

₁₃Moshe a nea bana ba Iseraele taelo eo, a re: Ke yona naha eo le tla arolelana yona ka lotho, eo Jehova a laetseng hore e newe meloko e robileng mono o le mong le halofo ya moloko. ₁₄Hobane leloko la bara ba Rubene ka matlo a bontata bona, le leloko la bara ba Gade ka matlo a bontata bona, le ba halofo ya leloko la Manasse, ba se ba nkile lefa la bona. ₁₅Meloko e mmedi eo le halofo ya leloko, ba se ba nkile lefa la yona ka mose o kwano wa Jordane, mabapa le Jeriko, ka nqa botjhabatsatsi.

₁₆Jehova a bua le Moshe, a re: ₁₇Mabitso a banna ba tlang ho le arolela naha ke ana: Moprista Eleasare, le Joshua, mora Nune. ₁₈Hape, le tla nka morena ka leloko le leng le le leng hore le arolelwe naha.

₁₉Ke ana mabitso a banna bao: Bakeng sa leloko la Juda, Kalebe, mora Jefunne; ₂₀bakeng sa leloko la bara ba Simeone, Samuele, mora Ammihude; ₂₁bakeng sa leloko la Benjamine, Elidade, mora Kislone; ₂₂bakeng sa leloko la bara ba Dane, morena Buki, mora Jogli; ₂₃bakeng sa bara ba Josefa, lelokong la bara ba Manasse, morena Hanniele, mora Efode; ₂₄bakeng sa leloko la bara ba Efraime, morena Kemuele, mora Shiftane; ₂₅bakeng sa leloko la bara ba Sabulone, morena Elitsafane, mora Parnake; ₂₆bakeng sa leloko la bara ba Issaskare, morena Paltiele, mora Assane; ₂₇bakeng sa leloko la bara ba Asere, morena Akihude, mora Shelomi; ₂₈bakeng sa leloko la bara ba Nefthali, morena Pedahele, mora Ammihude.

₂₉Ke bona bao Jehova a ba laetseng ho arolela bana ba Iseraele naha ya Kanana.