DIPROVERBIA 14

₁Mosadi ya bohlale o haha ntlo ya hae; empa ya se nang kutlo o e qhaqha ka matsoho a hae.

₂Ya tsamayang ka bokgabane o tshaba Jehova; empa ya kgopamisang ditsela tsa hae, o a mo nyedisa.

₃Molomong wa lewatla, ho na le thupa e otlang boikgohomoso ba lona; empa ba bohlale ba bolokwa ke melomo ya bona.

₄Moo kgomo di leng siyo, mediko e hloka dijo; empa matla a dipholo a ekeletsa leruo.

₅Paki e tshepehang e ke ke ya bolela leshano; empa paki e mano e fefetha mashano feela.

₆Monyefodi o batla bohlale, empa ha a bo fumane; athe tsebo e fumanwa ka bonolo ke ya masene.

₇Hlobohana le lewatla, ha o le bona; hobane ha le na molomo o nang le tsebo.

₈Bohlale ba motho ya masene bo mo bontsha tsela ya hae, empa bosawana ba setseketseke bo a se thetsa.

₉Mawatla a swaswa ka sebe, empa ba lokileng ba thabelana.

₁₀Pelo e itsebela ho baba ha yona; le teng, ho thaba ha yona ho ke ke ha kopanelwa ke motho e mong.

₁₁Ntlo ya e mobe e tla ripitlwa; empa motlotlwane wa ba lokileng o tla tiya.

₁₂Mohlomong, ho motho, tsela e nngwe e bonahala e ntse eka e lokile, athe bofello ba yona bo isa lefung.

₁₃Motho leha a tsheha, pelo ya hae e ntse e hlomohile, mme qetello ya thabo ke maswabi.

₁₄Ya pelo e ikgakanyang o tla tenwa ke mekgwa ya hae; empa motho ya lokileng o tla thabiswa ke diketso tsa hae.

₁₅Sethoto se dumela ditaba tsohle; empa ya nang le kelello o qamakisisa moo a hatang teng.

₁₆Ya bohlale o na le tshabo, o sesefa bobe; empa ya thotofetseng o tlatselela feela, mme o a itshepa.

₁₇Motho ya bohale o etsa tsa bowatla, mme ya ditaba tse lonya o a hlouwa.

₁₈Lefa la dithoto ke bowatla; empa ba masene ba tla rwala moqhaka wa tsebo.

₁₉E mobe o inama pela motho ya molemo, le ba lonya pela monyako wa ba lokileng.

₂₀Mofutsana o ilwa le ke wa habo; empa metswalle ya morui e mengata.

₂₁Ya nyedisang wa habo o etsa sebe; empa ho lehlohonolo motho ya leng molemo ho mofutsana.

₂₂Ba rerang bobe ha ba lahlehe na? Empa molemo le nnete ke tsa ba rerang botle.

₂₃Mosebetsi ka mong o na le moputso; empa ho qamota feela ho qephisa maruo.

₂₄Maruo a motho ya hlalefileng ke moqhaka wa hae; haele lewatla, bowatla ba lona e ntse e le bowatla.

₂₅Paki ya nnete e namolela bophelo ba batho; haele ya bohata, e fefetha mashano feela.

₂₆Ya tshabang Jehova o na le kgotso ya sebelebele, mme bana ba hae ba tla ba le setshabelo.

₂₇Ho tshaba Jehova ke sediba sa bophelo, ho qobisa batho mamena a lefu.

₂₈Kganya ya morena ke bongata ba batho; empa ho hlokahala ha bona ke tshenyeho ho ngwana morena.

₂₉Ya diehang ho halefa o na le kelello e kgolo; empa ya pelo e befang kapele o hlahatsa bothoto.

₃₀Pelo e tshweu e phedisa mmele wa motho; empa mona o bodisa masapo a hae.

₃₁Ya tubang mofutsana o nyedisa Mmopi wa hae; empa ya molemo ho mofumanehi o a mo rorisa.

₃₂Moetsadibe o kgoholwa ke bobe ba hae; empa motho ya lokileng o na le tshepo le lefung.

₃₃Bohlale bo ikahetse ka pelong ya motho ya masene; empa bohare ba mawatla bo a itshenola.

₃₄Ho loka ho hodisa setjhaba; empa bokgopo bo se apesa ka nyediso.

₃₅Mohlanka ya hlalefileng o kgahleha ho morena, empa eo o halefela ya hlabisang dihlong.