DIPROVERBIA 6

₁Mora wa ka, ekare ha o itlamile ka molato wa wa heno, mme o neile wa mofuta osele letsoho; ₂ha dipolelo tsa molomo wa hao di o tshwasitse, mme mantswe a molomo wa hao a o bofile, ₃mora ka, o ye ho itokolla; o etse jwalo; kahobane o setse o le matleng a wa heno, eya kapele, o ithapelle ho wa heno. ₄O se ke wa ba wa lesa mahlo a hao a robala, le dintshi tsa hao tsa otsela. ₅O phonyohe jwaloka tshephe mameneng, le jwaloka nonyana lerabeng la setsomi.

₆Hela sekgoba! eya ho bohlwa, o qamake mekgwa ya bona, o tle o hlalefe. ₇Ha bo na modisa, leha e le mohlahlobi, kapa morena; ₈leha ho le jwalo, bo itokisetsa bohobe ba bona lehlabula, bo ipokellela dijo ha ho kotulwa. ₉Hela wena, sekgoba towe! o tla robala ho le hokae na? O tla soha neneng borokong ba hao na? ₁₀O re: A nke ke robale ho se hokaenyana, ke boele ke re shwa hanyenyane, ke iphuthe matsoho, nke ke otsele hanyenyane. ₁₁Ruri, bofuma bo tla o fihlela jwaloka senokwane, tlala e o hlahele jwaloka motho ya o hlomeletseng.

₁₂Motho wa lefeela, ya lonya, o tsmaya ka molomo o mano, ₁₃o qhwaya ka mahlo, o bua le ka maoto, o lekanya ditaba le ka menwana. ₁₄Pelo ya hae e senyehileng e rera bobe kamehla, e jala diphapang; ₁₅ka baka leo, tshenyeho ya hae e tla mo wela sehloho; o tla timela hanghang, ho se le thuso.

₁₆Ho na le ntho tse tsheletseng tse hloilweng ke Jehova; nka re, di supile tseo e leng manyala ho yena: ₁₇Ke mahlo a boikgohomoso, ke leleme le mano, le matsoho a tshollang madi a se nang molato; ₁₈ke pelo e rerang merero e mebe, le maoto a lebelo ho mathela bobeng; ₁₉ke paki e lehata, e bolelang mashano, le ya jalang diphapang bathong ba mofuta o le mong.

₂₀Mora ka, boloka ditaelo tsa ntatao, o se ke wa furalla thuto ya mmao. ₂₁O di tlamelle pelong ya hao kamehla, o di rwalle molaleng wa hao. ₂₂Ha o tsamaya, di tla o tsamaisa; leha o robetse, di tla o lebela; etlare ha o tsoha borokong, di o buise. ₂₃Hobane keletso ke lebone, thuto ke lesedi, mme dikgalemelo tsa tayo ke tsela ya bophelo; ₂₄ho o phemisa mosadi wa seotswa le leleme le lekang la mosadi ya lelerang. ₂₅O se ke wa lesa pelo ya hao ya duma bokgabane ba hae, o se ke wa hapuwa ke tjhadimo ya mahlo a hae. ₂₆Hobane mosadi wa seotswa o fumanehisa motho, a be a sallwe ke sengwathwana sa bohobe feela, mme letekatsi le tsoma ho phela ha motho ya qenehelwang. ₂₇Ana motho a ka ikokgella mollo sefubeng, diaparo tsa hae di sa tjhe na? ₂₈Hleka motho a ka hata mashala a hlenneng, maoto a hae a sa tlabohe na? ₂₉Ho dutse jwalo le ya yang ho mosadi wa wa habo; ya mo amang, leha e le mang le mang, a ke ke a hloka molato. ₃₀Shodu leha le lapile, ha le tlohellwe ho utswa, ho kgorisa mpa ya lona. ₃₁Empa mohla le tshwarwang, le tshwanelwa ke ho lefa hasupa, le be le hlakolwe leruo lohle la ntlo ya lona. ₃₂Ya febang le mosadi o feletswe ke kelello; ya etsang hoo o itimetsa moya wa hae kasebele. ₃₃O tla fihlelwa ke kotlo le dihlong, ho nyediseha ha hae ho ke ke ha ba ha hlakolwa. ₃₄Hobane lefufa la monna le a mo hlantsha, a be a hloke le mohau mohla a iphetetsang. ₃₅A ke ke a amohela tefo, bohale ba hae o ke ke wa ba wa bo tima, leha o ka mo thoothella dimpho tse ngata.