Thoko e rokang Modimo ka tseo o di entseng ka matsatsi a supileng.
1Boka Jehova, moya wa ka! Jehova, Modimo wa ka, o moholo haholo, o apere kganya le bokgabane!
2O ipopa ka lesedi jwaloka hola ke kobo, o menolla mahodimo jwaloka lesela la tente; 3o thea matlo a hae hodima metsi, o etsa maru koloi ya hae, o tsamaya a kaletse mapheo a moya. 4O etsa meya manqosa a hae, malakabe a mollo ke bahlanka ba hae. 5O tiisitse lefatshe metheong ya lona; le ke ke la sisinyeha le ka mohla o le mong. 6O ne o le kgurumeditse ka bodiba jwaloka hoja ke kobo, metsi a ne a eme dithabeng; 7eitse ha o kgalemela, a baleha; ha a utlwa lentswe la diaduma tsa hao, a phakisa a itshuthisa; 8dithaba tsa phahama, diphula tsa kokobella dibakeng tseo o neng o di lokiseditse tsona. 9O beetse metsi meedi hore a se hlole a e tlola, a se ke a boela a apesa lefatshe.
10O kollisa didiba dikgutlong; metsi a tsona a iphallela pakeng tsa dithaba; 11di nwesa diphoofolo tsohle tsa naha; dipitsi tsa naha di itlosa lenyora ho tsona. 12Dinonyana tsa lehodimo di ikgahela pela tsona, di ntsha melodi ya tsona makaleng a difate. 13O nosetsa dithaba a le tlung ya hae e phahameng, mme lefatshe le kgora ditholwana tsa mesebetsi ya hae. 14O medisetsa makgomo jwang, o nea batho dimela tse ba lokelang; o ntsha bohobe bolemeng ba mobu, 15le veine e thabisang pelo ya motho, le ole e kgantshang sefahleho sa hae, le bohobe ba tiisang pelo ya motho. 16Difate tsa Jehova di kgotshe, e leng dikedare tsa Lebanone tseo a di hlomileng, 17moo dinonyana di ikgahelang dihlaha tsa tsona teng, moo mokotatsie o dutseng hodima dikiprese. 18Thaba tse phahameng ke tsa dikome, mme mafika ke setshabelo sa dipela.
19O entse kgwedi, ngwaha o tle o arohanngwe ke yona; letsatsi le tseba ho phirima ha lona. 20O etsa lefifi, mme ho be bosiu; yaba ke ha dibatana tsohle tsa meru di itsamaela, 21ditawana di puruma, di batla kgapo, di batla dijo tsa tsona ho Modimo. 22Letsatsi ha le tjhaba, di kgutle, di bothe mesimeng ya tsona. 23Ebe motho o tswela tshebetsong ya hae le mosebetsing wa hae ho fihlela mantsiboya.
24Jehova, mesebetsi ya hao e mengata hakakang! O e entse kaofela ka bohlale; lefatshe le tletse matlotlo a hao. 25Lewatleng le leholo leo, le phatlaletseng, ho tletse dihlapi tse sa balweng, tse nyenyane le tse kgolo. 26Ke moo dikepe di tsamayang teng, le leviathane eo o e bopileng hore e ipapalle teng. 27Dibopuwa tseo kaofela di lebeletse wena, hore o di fe dijo tsa tsona ka nako e tshwanetseng. 28Ha o di fa, di a thola; ha o fuparolla seatla, eba di kgora menono. 29Ha o pata sefahleho sa hao, di tsielehe; ha o di amoha phefumoloho, di fele, mme di kgutlele leroleng. 30Ha o boela o romela moya wa hao, di boele di tswalwe; mme o ntjhafatse tshobotsi ya lefatshe.
31Kganya ya Jehova e ke e hlolehe ka ho sa yeng kae! Jehova a ke a ithabele mesebetsing ya hae. 32O tadima lefatshe, le thothomele; o ama dithaba, di thunye mosi. 33Ke tla binela Jehova ha ke se ntse ke phela, ke rorise Modimo wa ka, ha ke sa ntse ke le teng. 34Nahano ya ka a e ke e o kgahlise. Ke tla etsa Jehova thabo ya ka. 35Baetsadibe a ba ke ba timelle lefatsheng, ba babe ba lese ho ba teng! Boka Jehova, moya wa ka! Bokang Jehova!
