PESALEME YA 115

₁Kganya ya hao, Jehova, se e nee rona; se e nee rona, o mpe o e nee lebitso la hao, ka baka la mohau wa hao le la nnete ya hao! ₂Ke kang ha ditjhaba di tla re: Na jwale Modimo wa bona o kae? ₃Athe Modimo wa rona o mahodimong; o etsa tsohle tseo o di ratang.

₄Ditshwantsho tsa bona ke silefera le kgauta, mosebetsi wa matsoho a batho. ₅Di na le melomo, mme ha di bue; di na le mahlo, mme ha di bone; ₆di na le ditsebe, mme ha di utlwe; di na le dinko, mme ha di fofonele; ₇di sitwa ho tshwara ka diatla tsa tsona; ka maoto a tsona ha di tsamaye, ha ho lentswe le tswang mmetsong wa tsona. ₈Kamoo di leng kateng, ba di etsang ba tla ba jwalo, le bohle ba beang tshepo ya bona ho tsona.

₉Iseraele, o itshepele Jehova: ke yena thuso ya bona le thebe ya bona. ₁₀Ntlo ya Aarone, o itshepele Jehova: Ke yena thuso ya bona le thebe ya bona. ₁₁Lona ba tshabang Jehova, itshepeleng Jehova: ke yena thuso ya bona le thebe ya bona.

₁₂Jehova o re hopotse; o tla re hlohonolofatsa; o tla hlohonolofatsa ntlo ya Iseraele; o tla hlohonolofatsa ntlo ya Aarone; ₁₃o tla hlohonolofatsa ba tshabang Jehova, ba banyenyane le ba baholo. ₁₄Jehova o tla le atisa, lona le bana ba lona. ₁₅Le bahlohonolofatswa ba Jehova, ya entseng mahodimo le lefatshe.

₁₆Haele mahodimo, ke mahodimo a Jehova, mme lefatshe o le neile bana ba batho. ₁₇Hase bafu ba ka rokang Jehova, leha e le ba theohelang nqalong e kgutsitseng; ₁₈empa rona, re tla boka Jehova, jwale le ho isa ho bo sa feleng! Bokang Jehova!