PESALEME YA 132

₁Jehova, hopola Davida le dihloreho tsa hae kaofela, ₂le kamoo a hlapantseng ho Jehova kateng, le kamoo a anneng ho Modimo o matla wa Jakobo kateng, ₃a re: Nke ke ka boela ka kena ka tlung ya ka, mme nke ke ka phomola diphateng tsa ka, ₄nke ke ka neela mahlo a ka boroko le dintshi tsa ka thobalo, ₅ha ke eso ho bonele Jehova nqalo, le Modimo o matla wa Jakobo tabernakele.

₆Bona, ra na ra utlwa areka ha e bolelwa Efrata, ra e fumana naheng ya Jaare. ₇A re keneng tabernakeleng ya hae, a re kgumameng pela bonamelo ba maoto a hae! ₈Tsoha, Jehova, o kene nqalong ya phomolo ya hao, wena le areka ya bokgabane ba hao. ₉Baprista ba hao a ba ke ba apare ho loka, bakgethwa ba hao ba tshele mehoo ya thabo! ₁₀Ka baka la Davida, mohlanka wa hao, o se ke wa furalla motlotsuwa wa hao!

₁₁Jehova o entse hlapanyo ya nnete ho Davida, a ke ke a e kwenehela; o itse: Ke tla bea mora ya tswetsweng ke wena teroneng ya hao. ₁₂Ekare ha bara ba hao ba boloka selekane sa ka, le melao eo ke ba rutang yona, le bona bana ba bona ba tla nne ba dule teroneng ya hao kamehla.

₁₃Hobane Jehova o ikgethetse Sione, o ratile ho tla ikahela teng, a re: ₁₄Mona ke nqalo ya phomolo ya ka ka ho sa feleng; ke rata ho aha teng; hobane ke ikgethetse yona. ₁₅Ke tla e fa nala, ba lesitsi ba yona ke ba kgorise bohobe. ₁₆Ke tla apesa baprista ba yona ka poloko, bakgethwa ba yona ba tshele ditlatse tsa thabo. ₁₇Ke tla medisetsa Davida lenaka ho yona, ke lokisetse motlotsuwa wa ka lebone. ₁₈Ke tla apesa dira tsa hae ka dihlong, moqhaka wa hae o tla kganya hloohong ya hae.