PESALEME YA 139

₁Jehova, o ntekile, mme o ntsebile, ₂O tseba ha ke dula, leha ke tsoha; o tseba mohopolo wa ka, o le hole. ₃O ntekola leha ke tsamaya, leha ke robala, o tsebisisa ditsela tsa ka kaofela. ₄Hobane, ere lentswe le eso ho be lelemeng la ka, o se o le tseba kaofela, Jehova. ₅O ntika kapele le kamorao, letsoho la hao le dutse ho nna. ₆Tsebo eo ke mohlolo ho nna; e phahamile haholo, ke sitwa ho e fihlela.

₇Nka ya kae, ka ba hole le moya wa hao? Nka balehela kae, ka ba hole le sefahleho sa hao? ₈Ha nka nyolohela mahodimong, o teng; leha nka ya robala nqalong ya bafu, le moo o teng! ₉Leha nka kalla mapheo a mafube, ka ya ikahela bofellong ba lewatle, le teng seatla sa hao se ka ntsamaisa, mme letsoho la hao le letona le ka ntshwara. ₁₀Ha nka re: A nke ke patwe ke lefifi, le teng bosiu bo tla ela pela ka. ₁₁Ho wena esita le lefifi le ke ke la eba letsho, bosiu bo ka ela jwaloka motshehare, lefifi la eba jwaloka lesedi.

₁₂Efela ke wena o bopileng letheka la ka; o ntohile popelong ya mme. ₁₃Ke o boka ka baka la mohlolo wa popeho ya ka. ₁₄Mesebetsi ya hao e a makatsa, moya wa ka o tseba teng haholoholo. ₁₅Mmopo wa ka ho o a ka wa pateha ho wena, ha ke ntse ke bopjwa sephiring, ke lohuwa ditho botebong ba lefatshe. ₁₆Mahlo a hao a bone moloho wa tsona; matsatsi a ka a ngodilwe kaofela hammoho bukeng ya hao; a ne a se a badilwe, a eso ho be teng. ₁₇Modimo, mehopolo ya hao e ntshita hakakang! Palo ya yona e kgolo hakakang! ₁₈Ha ke rata ho e bala, e fetisa lehlabathe ka palo; leha ke phaphama, ke sa ntse ke le ho wena.

₁₉Oho Modimo, o ke o bolaye e mobe. Lona, batho ba madi, suthelang hole le nna: ₂₀hobane bao e leng dira ho wena, ba o bolela hampe, ba ntse ba tlaela ka lebitso la hao. ₂₁Jehova, ha ke re, ke hloile ba o hloileng? Ha ke re, ke halefetse ba o phahamelang? ₂₂Ke ba hloile ka hloyo ya sebele, ho nna ke dira. ₂₃Modimo, o ntlhohlotse, o lekole pelo ya ka; ₂₄o nteke, o tsebe mehopolo ya ka, o tadime hoba a tsela ya bokgopo e teng ho nna na, mme o ntsamaise tseleng e isang bophelong bo sa feleng.