PESALEME YA 145
Thoko e rokang Modimo wa melemo yohle.
Pesaleme ya dithoko; ya Davida.
1Ke tla o hodisa, Modimo wa ka, Morena wa ka! ke tla boka lebitso la hao kamehla le ka ho sa yeng kae. 2Ke tla o boka ka matsatsi wohle, ke rorise lebitso la hao kamehla le mehla, le ka ho sa feleng.
3Jehova o moholo, o lokelwa ke dithoko tsohle, boholo ba hae ha bo na ho lekanngwa. 4Leloko le leng a le ke le bolelle leloko le hlahlamang mesebetsi ya hao, le tumise diketso tsa hao tse phahameng! 5Ke tla nahana bokgabane le kganya ya boholo ba hao, le diketso tse hlollang tsa hao. 6Ho ke ho bolelwe matla a diketso tse tshabehang tsa hao, mme ke bolele le boholo ba hao. 7Ho ke ho tumiswe kgopolo ya lereko la hao le leholo, ho rokwe ho loka ha hao.
8Jehova o mohau, o lereko, o dieha ho halefa, o hauhela haholo ho fetisisa. 9Jehova o molemo ho bohle, mehauhelo ya hae e aparetse mesebetsi yohle ya hae. 10Jehova, mesebetsi ya hao kaofela e tla o rorisa, bakgethwa ba hao ba o boke. 11Ba tla bolela kganya ya mmuso wa hao, ba tumise matla a hao, 12ba tle ba tsebise bana ba batho diketso tsa hao tse phahameng, le boholo ba kganya ya borena ba hao. 13Mmuso wa hao ke mmuso wa kamehla yohle, mme borena ba hao bo hlola ho isa melokong e sa feleng.
14Jehova o kokotledisa bohle ba kgothometsehang, o emisa ba inamisitsweng. 15Mahlo a dibopuwa kaofela a lebeletse wena, o di fa dijo ka nako e tshwanetseng. 16O fuparolla seatla sa hao, o kgodisa tse utlwang kaofela. 17Jehova o lokile ditseleng tsa hae tsohle, o mohau diketsong tsa hae tsohle. 18Jehova o haufi le bohle ba mo rapelang, le bohle ba mo rapelang ka nnete. 19O fa ba mo tshabang ho ratwang ke bona, o utlwa mehoo ya bona, mme o a ba lopolla. 20Jehova o boloka bohle ba mo ratang, empa o fedisa ba babe kaofela.
21Molomo wa ka a o ke o bolele dithoko tsa Jehova, dibopuwa tsohle di ke di boke lebitso la hae le kgethehileng kamehla le mehla.
© Bible Society of South Africa 1961. Used with permission. All rights reserved.
