PESALEME YA 148

₁Bokang Jehova!

Rorisang Jehova mahodimong! Mo roriseng bophahameng ba sebaka! ₂Mo roriseng, lona mangeloi a hae kaofela! Mo roriseng, lona makgotla a hae kaofela! ₃Mo roriseng, lona letsatsi le kgwedi! Mo roriseng kaofela, lona dinaledi tse kganyang! ₄Mo roriseng, lona mahodimo a mahodimo, le lona, metsi a hodimo ho mahodimo! ₅Tsohle tseo a di ke rorise lebitso la Jehova! Hobane o ne a laele, mme tsa eba teng; ₆o di beile hore di tle di be teng ka ho sa yeng kae le ka ho sa feleng; o di file melao, ha ho le e nngwe e e tlolang.

₇Rorisang Jehova lefatsheng, lona didrakone, le lona madiba kaofela; ₈mollo, le sefako, lehlwa le mehodi, meya ya difefo e phethang ditaelo tsa hae; ₉dithaba le dithabana kaofela, difate tse behang, le lona dikedare kaofela, ₁₀diphoofolo, le lona makgomo kaofela, dihahabi, le dinonyana tse mapheo, ₁₁marena a lefatshe le matjhaba kaofela, mahosana, le lona baahlodi bohle ba lefatshe, ₁₂bahlankana le barwetsana, maqheku hammoho le bana! ₁₃A ba ke ba rorise lebitso la Jehova, hobane lebitso la hae ke lona le nnotshi le phahamileng, bokgabane ba hae bo phahamile ho fetisa lefatshe le mahodimo. ₁₄O emisitse lenaka la setjhaba sa hae, a tle a roriswe ke bakgethwa ba hae kaofela, e leng bana ba Iseraele, setjhaba seo a ikatameleditseng sona.

Bokang Jehova!