PESALEME YA 29

₁Bara ba Modimo, busetsang ho Jehova, busetsang ho Jehova kganya le hlompho; ₂busetsang ho Jehova kganya ya lebitso la hae! Kgumamelang Jehova ka mekgabo e kgethehileng.

₃Lentswe la Jehova le duma hodima metsi; Modimo wa kganya o dumisa seaduma sa wona; Jehova o utlwahala hodima metsi a maholo. ₄Lentswe la Jehova le matla, lentswe la Jehova le kganya ka boholo! ₅Lentswe la Jehova le robakanya dikedare; Jehova o robakanya dikedare tsa Lebanone, ₆o di thadisa jwaloka manamane; le Lebanone, le Sirione, jwaloka dinare tse ntjha. ₇Lentswe la Jehova le phosa malakabe a mollo; ₈lentswe la Jehova le sisinya lefeella, le thothometsa nahathothe ya Kadeshe. ₉Lentswe la Jehova le tswadisa dikgama, le hlobodisa meru; ka tempeleng ya hae tsohle di re: Kganya!

₁₀A le teroneng ya hae, Jehova e ne e se e le morena mohla morwallo; teroneng ya hae o busa ka ho sa yeng kae. ₁₁Jehova o tla nea setjhaba sa hae matla; Jehova o tla hlohonolofatsa setjhaba sa hae ka kgotso.