PESALEME YA 52

₁Wena mohale, o ithorisa keng ka bolotsana ba hao? Mohau wa Modimo ke wa kamehla. ₂Leleme la hao le rera tshenyo feela, jwaloka lehare le leoditsweng, wena ya etsang bohata. ₃O rata bobe haholo ho botle, le leshano haholo ho ditaba tse lokileng. (Sela.) ₄O rata dipolelo tsohle tsa tshenyo, wena ya nang le leleme le thetsang!

₅Empa le wena Ya matla wohle o tla o senya ka ho sa yeng kae, o tla o tshwara, a o pshemole tenteng ya hao, a o fothole lefatsheng la ba utlwang. (Sela.) ₆Ba lokileng ba tla bona hoo, ba tshabe; ba tla tsheha ka yena, ba re: ₇Ke eo motho ya sa kang a inkela Modimo ho mo etsa qhobosheane ya hae, ya neng a itshepisa ka maruo a hae a maholo, ya neng a ipea matla ka bolotsana ba hae!

₈Empa nna, ke jwaloka mohlwaare o motala ka tlung ya Modimo; ke itshepetse mohau wa Modimo kamehla yohle. ₉Ke tla o rorisa kamehla, hobane o sebeditse hoo; ke tla tshepa lebitso la hao, hobane le molemo ho bakgethehi ba hao.