Thapelo e rapellang setjhaba sa Jehova.
Ho monga baphokodi. Ka pina ya Shoshanime (mehaladitwe). Bopaki ba Asafe. Pesaleme.
1Sekeha tsebe, modisa wa Iseraele; wena ya tsamaisang Josefa jwalokaha ho tsamaiswa mohlape, wena ya dutseng hodima dikerubime, hlaha kganyeng ya hao! 2Tsosa bonatla ba hao pontsheng ya Efraime, le Benjamine, le Manasse, o tle ho re thusa. 3Oho Modimo, o boele o re ahise, o kgantshe sefahleho sa hao, mme re tla bolokeha!
4Jehova, Modimo wa makgotla, o tla nne o halefe ho isa kae, leha setjhaba sa hao se ntse se o rapela? 5O se jesa bohobe ba meokgo, o ba nosa meokgo ka tekanyo e kgolo. 6O re entse ba tsekwang ke ba bapileng le rona, dira tsa rona di re entse sesomo. 7Oho Modimo wa makgotla, o boele o re ahise, o kgantshe sefahleho sa hao, mme re tla bolokeha!
8O ne o fothole morara Egepeta, wa lelekisa ditjhaba, mme wa o hloma; 9wa o lokisetsa sebaka, mme wa nama metso, wa tlala naha, 10dithaba tsa kgurumetswa ke moriti wa wona, makala a wona a eba jwaloka dikedare tsa Modimo, 11wa namisa makalana a wona ho isa lewatleng, le mahlomela a wona ho isa nokeng. 12Na o rapalaleditseng metero ya wona, o tle o kotulwe ke bafeti kaofela? 13O sohlokanngwa ke dikolobe tsa meru, diphoofolo tsa naha di tlile ho hakolela teng! 14Oho boya, Modimo wa makgotla! tadima o le lehodimong, mme o bone, o ele morara ona hloko!
15O sireletse seo letsoho le letona la hao le se hlomileng, le lehlomela leo o ikgethetseng lona. 16Morara o tjhele ke mollo, o remilwe; ba fela ke tshokelo ya sefahleho sa hao. 17Sireletsa motho, mosebetsi wa letsoho la hao le letona, le mora wa motho eo o ikgethetseng yena. 18Mme ha re sa tla hlola re o tlohela; o boele o re phedise, mme re tla rapela lebitso la hao. 19Jehova, Modimo wa makgotla, o boele o re ahise, o kgantshe sefahleho sa hao, mme re tla bolokeha!
