Buka e tiisitsweng ka tiiso tse 7 tse manolotsweng ke Konyana.
1Mme ka bona letsohong le letona la ya dutseng teroneng buka e ngodilweng kahare le kantle, e tiisitsweng ka ditiiso tse supileng. 2Mme ka bona lengeloi le matla le howang ka lentswe le phahamileng, le re: Ke mang ya nang le tokelo ya ho phetla buka le ya ho manolla ditiiso tsa yona? 3Mme ho ne ho se e mong lehodimong, leha e le lefatsheng, leha e le katlase ho lefatshe, ya neng a ka tseba ho phetla buka, leha e le ho e tadima. 4Mme nna, ka lla haholo, hobane ho ne ho se ya loketseng ho phetla buka, le ho e bala, leha e le ho e tadima. 5Yaba e mong wa baholo o re ho nna: Se lle; bona, tau ya leloko la Juda, lehlomela la Davida, e hlotse, e tle e tsebe ho phetla buka le ho manolla ditiiso tse supileng tsa yona.
6Yaba ke bona konyana e kang e hlabilwe, e eme mahareng a terone le a dibopuwa tse phelang tse nne, le mahareng a baholo, e na le dinaka tse supileng, le mahlo a supileng, e leng Meya e supileng ya Modimo, e rometsweng kahohle lefatsheng. 7Mme ya tla, ya nka buka letsohong le letona la ya dutseng teroneng.
8Eitse hobane e nke buka eo, dibopuwa tse phelang tse nne, le baholo ba mashome a mabedi a metso e mene, ba kgumama pela Konyana, ba nkile, e mong le e mong, harepa le pitsana ya kgauta e tletseng tse monko o monate, e leng merapelo ya bahalaledi. 9Ba bina sefela se setjha, ba re: O loketse ho nka buka, le ho manolla ditiiso tsa yona; hobane o ne o hlajwe, mme wa lopollela Modimo, ka madi a hao, batho ba mefuta yohle, le ba dipuo tsohle, le ba merabe yohle, le ba ditjhaba tsohle; 10mme o ba beile marena le baprista ho Modimo wa rona, mme ba tla busa hodima lefatshe.
11Jwale, ka tadima, mme ka utlwa mantswe a mangeloi a mangata a teetseng terone, le dibopuwa tse phelang tse nne le baholo hare, mme palo ya wona e ne e le dikete tse dikete le mashome a dikete a mashome a dikete. 12A ne a re ka lentswe le phahamileng: Konyana e neng e hlajwe e loketse ho nka borena, le monono, le bohlale, le matla, le hlompho, le kganya, le teboho.
13Mme ka utlwa dibopuwa tsohle tse lehodimong, le tse lefatsheng, le tse katlase ho lefatshe, le tse lewatleng, le tse ho tsona kaofela, di re: Ho ya dutseng teroneng le ho Konyana, e be teboho, le hlompho, le kganya, le matla, mehleng le mehla! 14Mme dibopuwa tse phelang tse nne tsa re: Amen! Mme baholo ba wa ka difahleho tsa bona, ba rapela.
