1Lengeloi la bohlano la letsa terompeta ya lona, mme ka bona naledi e tswang lehodimong e wetseng lefatsheng; ya newa senotlolo sa sekoti sa dihele, 2mme ya kwaholla sekoti sa dihele, mme ha tswa sekoting mosi o kang mosi wa sebopi se seholo; mme letsatsi le sebaka tsa fifatswa ke mosi o tswang sekoting. 3Ditsie tsa tswa mosing, tsa tla lefatsheng, mme tsa newa matla a kang matla a diphepheng tsa lefatshe. 4Tsa bolellwa hore di se ke tsa senya jwang ba lefatshe, leha e le tsohle tse tala, leha e le difate tsohle; di mpe di tshwenye batho feela ba se nang letshwao la Modimo diphatleng tsa bona. 5Tsa laelwa hore di se ke tsa ba bolaya, di mpe di ba hlokofatse ka dikgwedi tse hlano; mme bohloko ba tsona bo ne bo le jwaloka bohloko ba phepheng, ha e hlabile motho. 6Mehleng eo, batho ba tla ipatlela lefu, empa ba ke ke ba le fumana; ba tla lakatsa ho shwa, empa lefu le tla ba balehela. 7Sebopeho sa ditsie tseo se ne se tshwana le sa dipere tse lokiseditsweng ntwa; dihloohong tsa tsona di ne di rwetse ho tshwanang le meqhaka e kang ya kgauta; difahleho tsa tsona di ne di le jwaloka difahleho tsa batho. 8Di ne di na le moriri o kang moriri wa basadi, mme meno a tsona a ne a le jwaloka a tau. 9Di ne di rwetse ditshireletso tsa sefuba, tse jwaloka ditshireletso tsa tshepe, mme modumo wa dipheo tsa tsona o no o le jwaloka modumo wa makoloi le wa dipere tse ngata tse mathelang ntweng. 10Di na le mehatla e jwaloka ya diphepheng, le ditsenene, mme matla a tsona a ho hlokofatsa batho ka dikgwedi tse hlano a mehatleng ya tsona. 11Mme di na le morena wa tsona, e leng lengeloi la sekoti; lebitso la hae ka Sebeheru, ke Abadone, ka Segerike le bitswa Apolione.
12Kotsi e nngwe e fetile, empa bonang, ho sa tla kotsi tse pedi kamora eo.
13Lengeloi la botshelela la letsa terompeta ya lona, mme ka utlwa lentswe le tswang dinakeng tse nne tsa aletare ya kgauta e pela Modimo, 14la re ho lengeloi la botshelela, le tshwereng terompeta: Lokolla mangeloi a mane a holehilweng nokeng e kgolo ya Eufrate. 15Yaba ho lokollwa mangeloi ao a mane, a seng a itokiseditse hora, le letsatsi, le kgwedi, le ngwaha, hore a tle a bolaye karolo ya boraro ya batho. 16Palo ya makgotla a ba kaletseng ke dimilione tse makgolo a mabedi; hobane ke ne ke utlwe palo ya bona. 17Ponong ya ka ka bona jwalo le tsona dipere, le ba di kaletseng; ditshireletso tsa bona e ne e le tsa mollo, le tsa hiasinthe, le tsa sebabole; dihlooho tsa dipere di ne di le jwaloka dihlooho tsa ditau; ho ne ho etswa melomong ya tsona mollo, le mosi, le sebabole. 18Mme ka ntho tse tharo tsena, mollo, mosi, le sebabole, tse tswang melomong ya tsona, karolo ya boraro ya batho ya eshwa. 19Hobane matla a dipere tseo a ne a le melomong ya tsona le mehatleng ya tsona; mehatla ya tsona e ne e tshwana le dinoha, e na le dihlooho tseo e senyang ka tsona. 20Mme batho ba setseng, ba sa kang ba bolawa ke dikotsi tseo, ha ba ka ba baka mesebetsing ya matsoho a bona, mme ha ba ka ba lesa ho rapela batemona, le medimo ya kgauta, le ya silefera, le ya koporo, le ya majwe, le ya mahong, e sa tsebeng ho bona, le ho utlwa, le ho tsamaya. 21Mme ha ba ka ba baka dipolaong tsa bona, le boloing ba bona, le bootsweng ba bona, le dikutsong tsa bona.
