BAROMA 12

₁Ka baka leo, banabeso, ke a le rapela hle ka mehauhelo ya Modimo, hore le ke le o beele mmele ya lona, e be sehlabelo se phelang, se halalelang, se kgahlisang Modimo; ke yona tshebeletso e le tshwanetseng. ₂Hape le se ke la ipapisa le lefatshe lena, le mpe le fetohe ka ntjhafalo ya kelello ya lona, le tle le lemohe ho ratwang ke Modimo, hore na ke hofe, ho molemo, ho kgahlehang, ho phethehileng.

₃Hobane ka mohau oo ke o neilweng, ke bolella motho e mong le e mong hara lona, hore a se ke a itekanya boholo bo tlodisang moo a tshwanetseng ho lekanya teng; a mpe a ikgopole ka se mo lekaneng, e mong le e mong ka tekanyo ya tumelo eo Modimo o mo abetseng yona. ₄Hobane, jwalokaha re ena le ditho tse ngata mmeleng o le mong, mme ditho tsohle di se na tshebetso e le nngwe, ₅ka mokgwa o jwalo, rona re leng bangata, re mmele o le mong ho Kreste, mme bohle re ditho ba bang tsa ba bang. ₆Jwale, haele moo re ena le dineo tse sa tshwaneng, kamoo re filweng mohau kateng, ha ekaba re na le ho porofeta, a re porofeteng ka tekanyo ya tumelo; ₇ya abetsweng tshebeletso, a tiye tshebeletsong; ya rutang, a tiye ho ruteng; ₈ya kgothatsang, a tiye kgothatsong; ya etsang dithuso, a thuse ka pelo e tshweu; ya laolang, a laole ka matla; ya etsang tsa mohau a di etse ka thabo.

₉Lerato a le ke le hloke boikaketso. Hloyang ho hobe, le kgomarele ho molemo. ₁₀Tlwaelanang hamonate ka lerato la boena; le nne le beane pele ka hlomphano. ₁₁Bakeng sa mafolofolo, le se ke la ba botswa; le be le tjheseho moyeng; le sebeletse Morena. ₁₂Thabelang tshepong, le mamelle matshwenyehong, le tiye thapelong. ₁₃Sielang bahalaledi ha ba hloka; le be mafolofolo ho amohela baeti. ₁₄Hlohonolofatsang ba le hlorisang; le hlohonolofatse, mme le se ke la rohaka. ₁₅Thabang le ba thabileng, mme le lle le ba llang. ₁₆Kgomarelanang hammoho ka pelo e le nngwe; le se ke la lakatsa tse phahameng, le mpe le ipapise le tse nyenyane. Le se ke la ipona bohlale.

₁₇Le se ke la busetsa bobe ka bobe, leha e ka ba ho mang le mang. Batlang tse leng ntle mahlong a batho bohle. ₁₈Ha ho ka etswa, mme ha e le ka lona, le dule ka kgotso le batho bohle. ₁₉Barutuwa, le se ke la iphetetsa e le lona, le mpe le etsetse bohale sebaka; hobane ho ngodilwe, ho thwe: Phetetso ke ya ka; ke nna ya tlang ho busetsa, ho rialo Morena. ₂₀Ka baka leo, eo e leng sera ho wena, ekare ha a lapile, o mo fepe; ha a nyorilwe, o mo nose; hobane ha o ntse o etsa jwalo, etlaba o mmokellela mashala a mollo hloohong. ₂₁O se ke wa hlolwa ke bobe, o mpe o hlole bobe ka botle.