SEFELA SA SALOMONE 5

₁Ke tlile serapeng sa ka, ngwaneso, molebeletswa wa ka, ke ikgoletse mirra ya ka le nonetso ya ka, ka ja kgekge ya dinotshi tsa ka, ka nwa veine ya ka le lebese la ka ... Oho metswalle, jang, le nwe, le tahwe lerato.

₂Ke ne ke robetse, empa pelo ya me e ne e fadimeha ... Ke lentswe la moratuwa wa me! o a kokota: Mpulele, ngwaneso, thatohatsi ya ka, leebakgorwana la ka, mohlweki wa ka! Hobane hlooho ya ka e tletse phoka, thitsane ya ka e kolobile ke marothodi a bosiu. ₃Ke hlobotse kobo ya ka; ke tla e apara jwang? ke hlatswitse maoto a ka; ke tla a silafatsa jwang? ₄Moratuwa wa me a kenya letsoho la hae ka lesobeng la monyako, mme pelo ya me ya mo opela. ₅Ka tsoha ho bulela moratuwa wa me, mme matsoho a me a ne a rotha mirra, le menwana ya me e ne e rotha mirra e kwellang ditshepeng tsa senotlolo. ₆Ka bulela moratuwa wa me, empa moratuwa wa me o ne a se a tlohile, a ile; moya wa me o ne o idibana ha a bua le nna; ka mmatla, mme ha ke a ka ka mmona; ka mmitsa, mme ha a ka a araba. ₇Ka fumanwa ke dibohodi tse potapotang motseng; tsa nkotla tsa nthoba; ba lebelang marako ba nkamoha lesira la me. ₈Baradi ba Jerusalema, ke a le antsha, ke re: Ha le bona moratuwa wa me, na le tla reng ho yena? ... Le re: Ke bohloko ke lerato.

₉Moratuwa wa hao o na le eng eo a fetang moratuwa e mong ka yona, wena e motle hara basadi? Moratuwa wa hao o na le eng eo a fetang moratuwa e mong ka yona, ha o re antsha hakalo?

₁₀Moratuwa wa me o mosweu, o bile o mofubedu; o kgetheha mahareng a ba dikete tse leshome; ₁₁hlooho ya hae ke kgauta e tshekehileng, thitsane e forehileng ya hae e tshwana jwaloka lepheo la mokgwabane; ₁₂mahlo a hae a jwaloka a maebakgorwana pela melatswana, a hlatswehileng ka lebese, a dutseng naleng. ₁₃Marama a hae a jwaloka tema ya dinonetso le leifo la ditlama tse monko o monate; melomo ya hae ke mehaladitwe e rothanga mirra e kwellang; matsoho a hae ke moholoko ya kgauta e rokelletsweng dikrisolithe; ₁₄sefuba sa hae ke mosebetsi wa manaka a tlou a homilweng ka disafire; maoto a hae ke ditshiya tsa maramore tse tshetlamisitsweng dihlomellong tsa kgauta; ₁₅ponahalo ya hae e ka ya Lebanone, e kgethehile jwaloka ya dikedare. Lentswe la hae le monate haholo, mme botho ba hae kaofela ke bo kgahlisang. ₁₆Moratuwa wa me o jwalo, mokgotsi wa me o jwalo, lona baradi ba Jerusalema!