Davida o hlōla Baamone le Baarame
1Kamorao ho mona, Nahashe, khosi ea Baamone, a shoa, 'me mora oa hae a mo hlahlama. 2Eaba Davida o re: “Hanune, mora oa Nahashe, ke tla mo etsetsa tse molemo, hobane ntat'ae le eena o ile a nketsetsa tse molemo.” Ka baka leo, Davida a rōma maqosa a hae ho isetsa Hanune matšeliso, ka baka la lefu la ntat'ae.
Bahlanka ba Davida ba fihla naheng ea Baamone ho isetsa Hanune matšeliso. 3Empa mahosana a Baamone a re ho Hanune: “U bona eka Davida o tlōtla ntat'ao, ha a rōmetse maqosa ho tla u tšelisa? Na bahlanka ba hae ha baa tla ho uena moo ho tla hlahloba naha, le ho e hloela, hore ba tle be e hape?”
4Eaba Hanune o tšoara bahlanka ba Davida, o ba beola litelu, o hahōla liaparo tsa bona ka lehare, ho ea fihla libōnōng, a nt'o re ba tsamaee. 5Davida a tsebisoa kamoo banna bao ba entsoeng kateng, 'me a rōmela maqosa ho ea ba khahlanyetsa, hobane banna bao ba ne ba hlabiloe ke lihlong haholo. Eaba khosi Davida o re ho bona: “Lulang moo Jeriko ho fihlela litelu tsa lōna li hlōmela, ebe joale lea khutla.”
6Ha Baamone ba bona hore ba khopisitse Davida, Hanune le Baamone ba rōmela silefera e boima ba likilo tsa likete tse mashome a mararo a metso e mene, ho ea hira likariki tsa ntoa, le bahlabani ba lipere ba tsoang Mesopotamia, le Maaka, le Soba. 7Ba hira likariki tsa ntoa tse likete tse mashome a mararo a metso e 'meli; ba hira le khosi ea Maaka le bahlabani ba eona, 'me bona ba tla, ba fihla ba hloma liahelo tsa bona haufi le Medeba. Baamone ba phutheha metseng ea bona, ba itokisetsa ho loana.
8Ha Davida a utloa taba ena, a rōmela Joabe le lebōtho lohle la bahlabani. 9Baamone ba tsoa, ba thea thekō ea ntoa kapele ho khoro ea motse. Likhosi tse neng li tlile ho tla thusetsa, li ne li le naheng, li le ling.
10Ha Joabe a bona hore ba lireng ba mo hlahile kapele le kamorao, a khetha mokhetho har'a bahale bohle ba Baiseraele, a o emisa ka thekō, oa thulana le Baarame. 11Bahlabani ba bang bona a ba bea tlas'a taolo ea ngoan'abo, Abishai, le bona ba thea thekō, ba thulana le Baamone. 12Joabe a re: “Haeba Baarame ba ka nkimela, uena u tla nthusetsa; le 'na ke tla u thusetsa haeba Baamone ba ka u imela. 13Tiisa matla, re loane ka sebete, re loanele sechaba sa habo rōna, le metse ea Molimo oa rōna. Morena a ke a etse seo eena a bonang hore se lokile.”
14Joale Joabe le bahlabani ba neng ba e-na le eena ba atamela thekōng ea Baarame, 'me lithekō tsa kopana. Baarame ba baleha. 15Ha Baamone ba bona hore Baarame ba balehile, le bona ba baleha Abishai, ba ba ba ea kena motseng. Joale Joabe a khutlela Jerusalema.
16Ha Baarame ba bona hore Baiseraele ba ba hlōtse, ba rōma maqosa hore a late Baarame ba neng ba le kamose oane ho Nōka, 'me ba tla ba eteletsoe pele ke Shofake, molaoli oa mabōtho a Hadade-Esere.
17Hoba Davida a tsebisoe hona, a khōbōkanya bahlabani bohle ba Baiseraele, a tšela Jorodane, 'me a fihla ho Baarame, a thea thekō ea ntoa. Ha a se a theile thekō ea ntoa kapele ho Baarame, ba mo loantša. 18Baarame ba baleha Baiseraele. Davida a bolaea Baarame ba likete tse supileng ba palamang likariki tsa ntoa, le banna ba litaaso ba likete tse mashome a mane. A bolaea le Shofake, molaoli oa mabōtho a bona.
19Ha bahlabani ba Hadade-Esere ba bona hore Baiseraele ba ba hlōtse, ba etsa khotso le Davida, ea e-ba bahlanka ba hae.
Baarame ba se ke ba hlola ba thusetsa Baamone.
