Baabi ba khabane ba mohau oa Molimo
1Erekaha Kreste a ile a mamella mahlōkō 'meleng, le lōna imatlafatseng ka maikutlo a tšoanang le a hae, hobane ea mameletseng mahlōkō 'meleng o khaohane le sebe, 2e le hore litšiung tse mo saletseng lefatšeng a se hlole a phelela litakatso tsa botho, empa a phelele thato ea Molimo. 3Le bile le nako e lekaneng le ntse le phetha tse ratoang ke bahedene, ka ho phela ka bokhopo, litakatso tse mpe, botahoa, botlofa lijong le linong, le ka litšebeletso tsa melimo ea bohata, tse sa lumeleheng. 4Baa makala, ebile baa le nyefola, ha le se le sa kheme le bona bophelong boo bo hlaha ka ho fetisisa. 5Ba tla ikarabella ho ea seng a loketse ho ahlōla ba phelang le ba shoeleng. 6Ke kahoo le bona bafu ba ileng ba phatlalletsoa molaetsa o molemo, e le hore, leha ka nqeng ea botho ba se ba ahlōtsoe joaloka batho bohle, ka nqeng ea moea ba tle ba phelele Molimo.
7Qetello ea lintho tsohle e atametse. E-bang le boitšoaro, 'me le falimehele ho rapela. 8Ho feta tsohle le ratane ka lerato le mofuthu, hobane lerato le tlosa libe tse ngata. 9E mong le e mong a amohele baeti a sa khanane. 10Ka ho ea ka nèo eo a e filoeng ke Molimo, motho ka mong a ke a sebeletse ba bang joaloka moabi ea khabane oa mohau oa Molimo, o iponahatsang ka mekhoa e mengata. 11Ea buang a bue tsa Molimo; ea sebeletsang a sebeletse ka matla ao a a filoeng ke Molimo; e le hore Molimo a tle a tlotlisoe linthong tsohle ka Jesu Kreste, eo tlōtla le matla e leng tsa hae kamehla le mehla. A ho be joalo!
Ho hlōkōfatsoa joaloka Kreste
12Baratuoa, le se ke la makala ha le le har'a mollo oa teko, joalokaha eka ke mohlolo. 13Thabo ea lōna e ke e lekane le kabelo eo le nang le eona mahlōkōng a Kreste, e le hore le tle le thabe, le nyakalle, mohla tlōtla ea hae e bonahatsoang. 14Ha le hlapaoloa ka baka la lebitso la Kreste, le lehlohonolo, hobane Moea o tlōtlehang, Moea oa Molimo, o ho lōna. 15Ho se be teng har'a lōna ea hlōkōfatsoang kahobane e le 'molai, kapa lesholu, kapa sesenyi, kapa ea itšunyakang litabeng tsa ba bang. 16Empa ea hlōkōfatsoang kahobane e le Mokreste, a se ke a ba lihlong, a mpe a tlotlise Molimo ka baka la lebitso leo. 17E se e le nako ea hore kahlōlo e qale, 'me e qale ka ba ntlo ea Molimo. Joale ha e le moo e qala ka rōna, qetello ea ba sa lumeleng molaetsa o molemo oa Molimo eona e tla ba joang?
18“Haesita le ea lokileng
a pholoha ka thata,
monyefoli le moetsalibe
ba tla fella kae?”
19Ha ho le joalo hè, ba hlōkōfatsoang ho ea ka thato ea Molimo ba ipee paballong ea 'Mōpi ea tšepahalang, ka ho etsa tse ntle.
