Jonathane o thusa Davida
1Joale Davida a baleha Naiote e Rama, a ea ho Jonathane, a fihla a re ho eena: “Ebe ke entse'ng? Bokhopo ba ka ke bofe? Ke sitetsoe ntat'ao ka eng, ha e le moo a batla ho mpolaea tjee?”
2Jonathane a re ho eena: “Hase ntho e ka etsahalang eno! U ke ke ua ba ua bolaoa! Ha ho letho le leholo kapa le lenyenyane, leo ntate a ka le etsang a sa mpolella lona. Joale a ka mpatela taba ee hobane'ng? Ha ho joalo!”
3Davida a boela a hlapanya, a re: “Ntat'ao o tseba hantle hore u nthata haholo; ke ka baka lena a itseng: ‘Jonathane a se ke a tseba taba ena, esere ea mo utloisa bohlōkō.’ Ruri ke hlapanya ka Morena ea phelang, le ka uena: Bophelo ba ka bo itšoareletse ka ntekeletsane.”
4Eaba Jonathane o re ho Davida: “U rata ha ke u etsetsa eng?”
5Davida a re ho Jonathane: “Bona mona, hosasane khoeli e tla be e thoasitse, 'me ke lokela ho ba lijong le khosi. Ntumelle ke tsamaee, ke e'o ipata naheng, ho fihlela ka phirimana ea letsatsi la boraro. 6Ha ntat'ao a bona ke le sieo, u tle u re ho eena: ‘Davida o ile a nqōphella hore ke mo lumelle a potlakele motseng ea habo oa Betlelehema, hobane hona teng lelapa labo lohle le tla etsa sehlabelo se etsoang ka selemo le selemo.’ 7Haeba a ka re: ‘Ho lokile,’ mohlanka oa hao o tla phutholoha, empa haeba a ka halefa, u tsebe hore o ntheretse bobe. 8Ka baka lena, tšepahala ho mohlanka oa hao, hobane eena le uena le entse selekane sa Morena. Empa haeba ke entse bokhopo, ke hle ke bolaoe ke uena ka sebele sa hao. U tla be u nkisetsa'ng ho ntat'ao?”
9Eaba Jonathane o re: “U se ke ua hopola ntho e joalo! Haeba ke ne ke tseba hore ntate o u reretse bobe, na ke ne nke ke ka u bolella?”
10Davida o botsa Jonathane, a re: “Ke mang ea tla ntsebisa haeba ntat'ao a u arabile hampe?”
11Jonathane a re ho Davida: “Tloo, re ee har'a naha.” Bobeli ba bona ba tsamaea, ba ea har'a naha.
12Jonathane a boela a re ho Davida: “Morena Molimo oa Iseraele, e be paki! Hosasane, ka eona nako ena, kapa ka letsatsi la boraro, ke tla botsa ntate. Haeba a u hopoletse tse molemo, ke tla u tsebisa. 13Empa haeba ntate a ikemiselitse ho u etsa hampe, Morena le eena a nketse joalo, le ho feta moo, haeba 'na nke ke ka u tsebisa, ka ba ka u lōkōlla hore u itsamaele ka khotso. Morena a ke a be le uena joalokaha a bile le ntate. 14Ha ke ntse ke phela, u mpontše lerato la Morena, empa haeba ke e-shoa, 15u se ke ua khaotsa ho rata lelapa la ka kamehla eohle; esita leha Morena a se a timelitse lira tsohle tsa Davida lefatšeng.”
16Eaba Jonathane o etsa selekane le ba ntlo ea Davida, o re: “Morena a ke a iphetetse ho lira tsa Davida.” 17Jonathane a re Davida a hlapanye hape hore o tla mo rata, hobane Jonathane le eena o ne a rata Davida joalokaha a ithata.
18Jonathane a re ho Davida: “Hosasane khoeli e tla be e thoasitse, 'me ho tla bonahala hore ha u eo, hobane setulo sa hao se tla be se se na motho. 19Ka letsatsi la boraro bosieo ba hao bo tla bonahala haholo; joale u tle u ee sebakeng seo u neng u ipatile ho sona mohl'a monene, u ipate kamora' qubu ea majoe. 20'Na ke tla betsetsa metsu e meraro ka nq'a moo u ipatileng teng, joalokaha eka ke betsa pakane. 21Joale ke tla rōma moshanyana, ke re ho eena: ‘Tsamaea u e'o batla metsu eane.’ Ha nka ka re ho moshanyana eo: ‘Bona, metsu e ka koano ho uena, e nke!’ joale uena Davida u tle, hobane ke hlapanya ka Morena ea phelang, khotso e tla be e le teng, 'me u ke ke ua tsoa kotsi. 22Empa ha nka ka re ho moshanyana: ‘Bona, metsu e ka nq'ane ho uena!’ uena u tle u tsamaee, hobane ke Morena ea reng u tsamaee. 23Ha e le tabeng eo rōna le uena re buileng ka eona, tseba hore Morena o pakeng tsa rōna le uena kamehla eohle.”
24Davida a ea ipata naheng. Ha khoeli e se e thoasitse khosi ea lula, ea e-ja. 25Joaloka kamehla, khosi ea lula setulong sa eona se pel'a lebota. Jonathane a lula a shebane le khosi, Abinere eena a lula lehlakoreng la Saule; feela setulong sa Davida ho ne ho se na motho. 26Empa ka letsatsi leo Saule a se ke a bua letho, hobane monahano oa hae o ne o re: “O hlahetsoe ke ho hong, o sesila, ruri ha a ea hloeka.” 27Ka letsatsi la bobeli, e leng le hlahlamang la ho thoasa ha khoeli, setulo sa Davida se ne se ntse se se na motho. Joale Saule a re ho mora oa hae Jonathane: “Ke ka baka la'ng ha maobane le kajeno mora oa Jese a sa tla lijong?”
28Jonathane a araba Saule, a re: “Davida o ile a nqōphella hore ke mo lumelle a ee Betlelehema, 29a re: ‘Kea u rapela: Ak'u ntumelle ke tsamaee, hobane lelapa leso le tla etsa sehlabelo motseng, heso, 'me moholoane o ntaetse hore ke be teng. Joale haeba u fela u nthata, kea u rapela: Ntumelle ke tsamaee, ke e'o bona bana beso.’ Ke ka lebaka lena Davida a sa tlang lijong tsa khosi.”
30Khalefo ea Saule ea tlōkōmela Jonathane, a re ho eena: “Sekhaupane tooe! U re ekaba ha ke tsebe hore u motsoalle oa mora oa Jese! Ua itlontlolla, u bile u tlontlolla le bofeela ba 'm'ao! 31Ha feela mora enoa oa Jese a sa ntsane a phela lefatšeng mona, u ke ke ua ba ua mōna bokhosi! Ka baka leo, rōma maqōsa a e'o mo lata, a mo tlise koano, hobane o tlameha ho shoa!”
32Jonathane a araba ntat'ae Saule, a re ho eena: “O bolaeloa'ng? O entse'ng?” 33Saule a betsa Jonathane ka lerumo, a re oa mo hlaba. Joale Jonathane a tseba hore ntat'ae o tiile, o batla ho bolaea Davida.
34Jonathane a ema, a tloha lijong a tlōkōma ke khalefo, 'me ka letsatsi lena la bobeli la khoeli a se ke a ja letho. O ne a utloile bohlōkō ka baka la Davida, le kahobane ntat'ae o ne a mo tlontlolotse.
35Ka la hosasane Jonathane a ea naheng ka nako eo ba neng ba e ballane le Davida; a ea a e-na le moshanyana. 36A re ho moshanyana eo oa hae: “Matha, u e'o batla metsu eo ke tla e betsa!” Ha moshanyana a matha, Jonathane a betsetsa motsu ka nq'ane ho eena. 37Moshanyana a fihla moo Jonathane a betselitseng motsu teng. Jonathane a hōoeletsa moshanyana eo, a re: “Na motsu ha o ka nq'ela ho uena?” 38Jonathane a hōoeletsa moshanyana, a re: “Matha, u potlake, u se ke ua lieha!” Moshanyana oa Jonathane a bōkella metsu, a khutlela ho mong'a hae. 39Empa moshanyana eena o ne a sa tseba letho; ke Jonathane le Davida feela ba neng ba tseba hore na hona ho bolela'ng. 40Jonathane a nea moshanyana lihlomo tsa hae, a ba a re ho eena: “Li jare, u li ise motseng.”
41Hoba moshanyana a tsamaee, Davida a ema, a tloha kamora' qubu ea majoe, a itihela fatše ka sefahleho, a obama kapele ho Jonathane hararo. Bo-Jonathane le Davida ba akana, ba llelana, ho fihlela sello sa Davida se feta sa Jonathane.
42Joale Jonathane a re ho Davida: “Tsamaea ka khotso, hobane rōna ba babeli re ikanne ka lebitso la Morena, ra re: ‘Morena o tla ba le rōna ba babeli, a be a be le litlōhōlō tsa rōna kamehla eohle!’ ”
43Davida a ema, a itsamaela. Jonathane eena a khutlela motseng.
